പ്രണയമേ നിനക്കായി ..…..

എന്റെ പ്രണയമേ… 

മറന്നുവോ നീ എന്നെ?

മറക്കാൻ കഴിയില്ല എന്ന് അറിയാം എങ്കിലും എൻ്റെ മനസ്സിനെ ബോധ്യപ്പെടുത്താൻ ഒരു പാഴ്ശ്രമം എന്നു കൂട്ടിക്കോളൂ വെറുതെ… ഒരു ശ്രമം

ചിരിക്കണ്ട… നിനക്കറിയാല്ലോ എനിക്കോ നിനക്കോ അതിനാവില്ല എന്ന്… 

പ്രണയം എന്നു പറഞ്ഞാൽ തന്നെ ഒരു തിരിച്ചറിവല്ലേ.. ഒരാൾക്ക് പകരമാവാൻ മറ്റാർക്കും കഴിയില്ലെന്ന തിരിച്ചറിവ് ശരിക്കും ആ തിരിച്ചറിവിലാണല്ലോ നമ്മൾ… 

എടോ സ്നേഹിക്കപ്പെടുക എന്നതിനേക്കാൾ ഭാഗ്യം മറ്റെന്തിനാണ് ഉള്ളത്?

ഒരാളിനാൽ അത്രമേൽ പ്രണയിക്കപ്പെടുക… 

കാമിക്കപ്പെടുക… 

കാത്തിരിക്കപ്പെടുക… 

ഊണിലും… ഉറക്കത്തിലും… 

ശ്വാസത്തിലും… നിശ്വാസത്തിലും… കനവിലും, നിനവിലും എവിടെയും ഒരാൾ മാത്രം… 

ഹാ… അതിനെന്തൊരു സൗന്ദര്യമാണെടോ..!!!!

എൻ്റെ ഹൃദയത്തിൽ പതിഞ്ഞ ഒരേ ഒരാൾ അത് നീ മാത്രമാണ്. ഹൃദയത്തിൽ പതിഞ്ഞ് ഹൃദയമിടിപ്പായി പിന്നിട് എൻ്റെ ശ്വാസമായി നി മാറിയില്ലേ? അതെ എൻ്റെ ജീവവായു

നമ്മുടെ പ്രണയത്തിൽ നീ എന്നും മിടുക്കുള്ള ഒരു കുതിരക്കാരൻ ആയിരുന്നു. വികാരങ്ങളെ പക്വതയോടെ കടിഞ്ഞാൺ ഇടുന്ന സമർത്ഥനായ ഒരു കുതിരക്കാരൻ. ആ കുതിരസവാരിയിൽ എനിക്കിത്തിരി സാമർത്ഥ്യം പോരെങ്കിലോ? ഞാൻ തോൽവി സമ്മതിക്കട്ടെ എന്നിലെ ഗൗരവക്കാരിയായ ഞാൻ ഇവിടെ മരിക്കുന്നു ഒപ്പം ഒട്ടൊരഭിമാനത്തോടെ ഞാൻ കാത്തു പോന്ന എന്റെ സ്വകാര്യതയും. നിനക്ക് എന്താണ് ഇത്ര വലിയ പ്രത്യകത എന്നു ചോദിച്ചാൽ എനിക്ക് ഏറ്റവും പ്രിയപ്പെട്ട പ്രണയവും സൗഹൃദവും നിന്നിൽ നിന്നാണ്… 

കണ്ടുമുട്ടാൻ വൈകിയെങ്കിലും നീ എനിക്കായി ഒരു പൂക്കാലവും, സന്തോഷത്തിൻ്റെ പറുദീസയും കാത്തു വെച്ചിട്ടുണ്ടായിരുന്നു ഇതുവരെ അനുഭവിക്കാത്ത ഒരു ലോകം എനിക്കു സമ്മാനിച്ചത് നീയാണ്… 

നീ എന്നിൽ പടർന്നുപിടിക്കുമ്പോൾ മാത്രമേ എന്നിൽ ഇലഞ്ഞി പൂക്കൾ പൂത്തു നില്ക്കുന്നണ്ടെന്നും… അതിനൊരു മനം മയ്ക്കുന്ന ഗന്ധമുണ്ടെന്നും ഞാൻ പോലും അറിയൂ… 

അങ്ങിനെയുള്ള നിന്നെ ഒന്നിനു വേണ്ടിയും ഒഴിവാക്കാൻ എനിക്കാവില്ല… അല്ല നമുക്ക് അതിന് കഴിയില്ല

ജീവനായ് സ്നേഹിക്കാൻ നിനക്കു കഴിയുമെങ്കിൽ… 

എന്നിൽ ജീവനുള്ള കാലം… ആ സ്നേഹത്തിന് ജീവൻ നൽകാൻ ഞാൻ ഉണ്ടാകും കൂടെ… 

എന്താകും? ഇതെല്ലാം എവിടെ ചെന്ന് അവസാനിക്കും എന്നൊന്നും എനിക്കറിയില്ല ഒന്നറിയാം എനിക്കിഷ്ടമാണ് ഒരു പാട്… ഒരുപാട് ഇഷ്ടമാണെനിക്ക്… ഇനി ഒരിക്കലും ഒന്നിനു വേണ്ടിയും നഷ്ടപ്പെടുത്താൻ ആഗ്രഹിക്കാത്ത ഇഷ്ടം

ആത്മാവിൽ അലിഞ്ഞുചേർന്നോരി ഇഷ്ടം… ജൻമ ജൻ മാന്തരങ്ങളിലൂടെ ഞാൻ തേടിയ ഒരിഷ്ടം… 

ചേർന്നിരിക്കാൻ ഒരുപാട് കൊതിക്കുന്നുണ്ട് മനസ്സ്… സമയമായില്ല പോലുമെന്ന് കാലം പറയുമ്പോൾ ആ സന്തോഷത്തിനായി ഇനിയും കാത്തിരിക്കാം ഞാൻ നിനക്കായി മാത്രം…