മാതൃത്വം

ഭൂമിയിലെ ഏറ്റവും മഹത്തായ അവസ്ഥയാണ് ഒരു സ്ത്രീ അമ്മയാവുക എന്നത്. സ്ത്രീകൾക്ക് മാത്രം കഴിയുന്ന ഒരവസ്ഥ.

ആർക്കും ഗർഭം ധരിച്ചു പ്രസവിയ്ക്കാം. അത് സ്വാഭാവികമായ ഒരു പ്രക്രിയ തന്നെ. എന്നാൽ അമ്മയാകാൻ തീർച്ചയായും നല്ല തയ്യാറെടുപ്പ് തന്നെ ആവശ്യമാണ്.

തീർച്ചയായും ഒരു വിധം എല്ലാ പെൺകുട്ടികളിലും  ചെറുപ്പം മുതലുള്ള ഒരു തയ്യാറെടുപ്പ് പ്രകൃതി തന്നെ അതിനായ് ഒരുക്കുന്നുണ്ട്.

ജനിക്കുമ്പോൾ തന്നെ ലക്ഷക്കണക്കിന് അണ്ഡങ്ങളുമായാണ് ഒരുക്കങ്ങൾ ആരംഭിക്കുന്നത്. പിന്നെ വളർച്ചയുടെ ഓരോ ഘട്ടത്തിലും അവയുടെ എണ്ണം കുറഞ്ഞു വരുന്നു. ഓരോ മാസവും പക്വമായ ഒരോ അണ്ഡങ്ങളുമായാണ് ഓവുലേഷൻ തുടങ്ങുന്നത്. ബീജത്തെ സ്വീകരിക്കുകയാണെങ്കിൾ മാത്രം അടുത്ത നടപടികളിലേക്ക് കടന്നു ഭ്രൂണമായി വളരുന്നു. ഇല്ലെങ്കിൽ അവ നശിക്കുകയും അവശിഷ്ടങ്ങൾ ആർത്തവമായി പുറത്ത് പോകുകയും ചെയ്യുന്നു. ഭ്രൂണം വളരുകയും ശാരീരികമായി മാറ്റങ്ങൾ ഉണ്ടാവുകയും വളർച്ച പൂർത്തിയായി ഇരുന്നൂറ്റി എഴുപത് ദിവസങ്ങൾക്കുള്ളിൽ പ്രസവിക്കുകയും ചെയ്യുന്നു

മാനസികമായും ശാരീരികമായും ഉള്ള വലിയ മാറ്റങ്ങളാണ് അമ്മയാകുന്നതിലൂടെ ഒരു സ്ത്രീ അനുഭവിക്കുന്നത്. തീർച്ചയായും മഹത്തായ അനുഗ്രഹമാണ് അവൾക്ക് ലഭിക്കുന്നത് എന്നതിൽ സംശയമില്ല.

തന്റെ സ്വന്തം ശരീരത്തിലെ ഒരു ഭാഗം എന്ന നിലയിൽ മാസങ്ങൾ ഗർഭപാത്രത്തിൽ വളരുകയും വളർച്ചയുടെ ഓരോ നിമിഷവും അറിയുകയും ചെയ്ത് ആ കുഞ്ഞ് ഭൂമിയിലേക്ക് പിറന്നു വീഴുമ്പോൾ പ്രത്യേകമായ ഒരു അനുഭൂതിയും അനുഭവവുമാണ് ആ അമ്മയ്ക്ക് ഉണ്ടാവുക.

പ്രസവശേഷം കുഞ്ഞിനെ മുലയൂട്ടാനും താരാട്ട് പാടിയുറക്കാനും ഓരോ നിമിഷവും കരുതലോടെ ശ്രദ്ധിക്കാനും തുടങ്ങുമ്പോൾ തന്നെ കുഞ്ഞ് അമ്മയുടെ ജീവിതത്തിന്റെ ഒരു ഭാഗമായി മാറിക്കഴിഞ്ഞിരിക്കും.

പിന്നെ ഒരിക്കലും വേർപിരിയാത്ത വേർപിരിയാൻ വയ്യാത്ത ഒരു ബന്ധമായി അത് വളരുന്നു.

ആധുനിക സാങ്കേതിക വിദ്യകൾ വളർന്നപ്പോൾ കൃത്രിമഗർഭധാരണം, സാധാരണ പ്രസവം അല്ലാതെ സിസേറിയൻ വഴിയുള്ള കുഞ്ഞിൻ്റെ പിറവി. ഇപ്പോൾ തന്നെയുള്ള സറോഗസി പോലുള്ള മാർഗങ്ങൾ ഭാവിയിൽ തന്നേക്കാം വരുന്ന പുരുഷൻ്റെ ഗർഭധാരണം പ്രസവം തുടങ്ങിയവയൊക്കെ ഉണ്ടായാലും മാതൃത്വം എന്നത് മഹത്തായ ഒരു അനുഭവം അനുഭൂതി ആയിത്തുടരും.

ചിലപ്പോൾ മാത്രംചില സാഹചര്യങ്ങളിൽ ആവശ്യമില്ലാത്ത അല്ലെങ്കിൽ അങ്ങനെ കരുതപ്പെടുന്ന മാതൃത്വങ്ങളും ഉണ്ടാകുന്നുണ്ട് എന്ന് നമുക്ക് മറച്ചു വെക്കാൻ പറ്റില്ല.പ്രണയബന്ധങ്ങളും

അതിന്റെ തുടർച്ചയായ ശാരീരികബന്ധങ്ങളും ഗർഭധാരണങ്ങളും അതിൽ ഒന്നാണ്. അവർക്ക് ആ കുഞ്ഞിനെ വളർത്താൻ ബുദ്ധിമുട്ട് അല്ലെങ്കിൽ അപമാനം.

അത് ചിലപ്പോൾ വളരെ നേരത്തെ സ്റ്റേജിൽ തന്നെ ഇല്ലാതാക്കും.അല്ലെങ്കിൾ രഹസ്യമായി പ്രസവിച്ചു കുഞ്ഞിനെ അനാഥാലയങ്ങളിലോ ഇപ്പോഴത്തെ അവസ്ഥയിൽ അമ്മത്തൊട്ടിലിലോ ഉപേക്ഷിച്ചു കളയുന്നു.

വേറെ ചിലർ വളരെ ക്രൂരമായി പ്രസവിച്ച ഉടനെ കുഞ്ഞിനെ കൊല്ലുകയും ചെയ്യുന്നു. മറ്റ് പല സംസ്ഥാനങ്ങളിലും അവയുടെ എണ്ണം വളരെ കൂടുതലാണ്.കേരളത്തിൽ പുരോഗമന ചിന്താഗതിക്കാർ ഉള്ളതിനാൽ അവയുടെ എണ്ണം കുറവാണ്.

സ്നേഹവും കാരുണ്യവും കരുതലും ശ്രദ്ധയും പരിചരണവും നൽകുന്ന അമ്മമാരാണ് അധികവും.

എന്നാൽ അങ്ങനെയല്ലാതെ അമ്മയും അച്ഛനും ഉണ്ടെങ്കിൽ പോലും അനാഥമായി വളരുന്ന വരുന്നുണ്ട്. സാഹചര്യങ്ങൾ കൊണ്ടാകാം.അത്തരം അനേകം കുഞ്ഞുങ്ങൾ കഴിവില്ലാത്തത് കൊണ്ട് മാത്രം അനാഥാലയങ്ങളിൽ വളരുന്നുണ്ട്. മാതൃത്വം മഹനീയവികാരമാണെങ്കിലും സാമ്പത്തികനില കൂടി അതിന് അനുകൂലമായ നിലപാട് എടുക്കാൻ ആവശ്യമുണ്ട് എന്നാണ് അത്തരം അനുഭവങ്ങൾ പറയുന്നത്.

# കൂട്ടക്ഷരങ്ങൾ

#മാതൃദിനം രചനാമത്സരം

#വിഷയം_മാതൃത്വം

#രചന_രാമചന്ദ്രൻടിവി