🌹അവസാനത്തെ ആഗ്രഹം🌹

 കഴിഞ്ഞീസം രാത്രി ഉറങ്ങാൻ കിടന്നപ്പോൾ നെഞ്ചിൽന്ന് ഒരു വേദന, ചെർതായി ഒരു കൊളുത്തിപ്പിടിക്കലൊക്കെ… നെഞ്ചിൽ കൈ വെച്ച് ഞാൻ വേദന സഹിച്ച് ഉറങ്ങാൻ ശ്രമിച്ച്, വേദനയും അസ്വസ്ഥതയും കൊണ്ട് ഉറക്കം ശരിയായില്ല. പക്ഷേ എപ്പോഴോ എന്നോടൊന്ന് മയങ്ങിപ്പോയി. 

മയങ്ങുന്നതിന് മുമ്പായി എൻ്റെ കാറ്റ് പോവും ന്ന് എനിക്കൊരു തോന്നലുണ്ടാ
യിരുന്നു. വിചാരിച്ച പോലെ തന്നെ മയക്കത്തിലതാ, എൻ്റെ മുന്നിൽ കാലൻ ചിരിച്ചോണ്ട് നിൽക്കുന്നു. മൂപ്പരെ അപ്പോ ആർക്ക് കണ്ടാലും ‘കാലേട്ടാ ” ന്ന് വിളിക്കാൻ തോന്നും, അമ്മാതിരി തേജസ്സോടെയാ മൂപ്പരുടെ നിൽപ്പ്. കാലൻ വാതിൽപ്പടിയിൽ നിൽക്കുന്നത് കണ്ട് ഞാൻ പുള്ളിയോട് പറഞ്ഞു, 

“ബാ, കേറി ബാ, എന്തേയ് അവിടെത്തന്നെ നിന്നു കളഞ്ഞത്. “

“ഒന്നൂല്ല ഒരാളുടെ വരാനുണ്ട്. ഓൻ വീടിൻ്റെ മുറ്റത്ത് പോത്തിനെ കെട്ടാനുള്ള സ്ഥലം നോക്കാ. കെട്ടിയിട്ടില്ലേൽ ശരിയാവില്ല, അടുത്ത വീട്ടിലൊക്കെ എരുമകളുള്ളതാ. ലെവൻ അങ്ങോട്ട് പോയാൽ പിന്നെ തിരിച്ച് വിളിച്ചാൽ വരാൻ പാടാ, അതോണ്ട് കെട്ടിയിട്ടിട്ട് ഓനിപ്പം വരും.

“അതാരാ ഇങ്ങളെ പോത്തിൻ്റെ ഡ്രൈവറാ ?”

“ഡ്രൈവറൊന്നുമല്ല പഹയാ, ചിത്രഗുപ്തനാ”

” അയെന്തിനേയിപ്പോ ഗുപ്തേട്ടനെ ഒപ്പം കൂട്ടുന്നത്, ഇങ്ങക്ക് ഒറ്റക്ക് പോന്നാപ്പോരായിനോ?”

”അതോ, ഗുപ്തന് കേരളത്തിൽ വന്നിട്ട് കട്ടൻ ചായ ഊതി, ഊതി കുടിക്കണം ന്ന് ഒരാഗ്രഹം. അപ്പോ ഞാനിങ്ങ് കൂട്ടിയതാ. അത് മാത്രമല്ല എനിക്കിപ്പോ പഴേ പോലെ കണ്ണും പിടിക്കുന്നില്ല, കഴിഞ്ഞ ദിവസം തന്നെ ഒറ്റക്കുന്നുമ്മൽ കണാരൻ മകൻ സദാശിവനെ കൂട്ടിക്കൊണ്ടു പോകാനുള്ളതിന് എന്നോടാളുമാറിപ്പോയി”

“എന്നിട്ട്, വേറെ ആളേ കൊണ്ടുപോയോ?”

“പിന്നല്ലാണ്ട്… എന്നോട്, കുന്ന് മാറിപ്പോയി, ഇരട്ടക്കുന്നുമ്മൽ കണാരൻ മകൻ സദാശിവനെയാ കൂട്ടിക്കൊണ്ടുപോയത്. “

“എന്നിട്ട്?”

“എന്നിട്ടെന്താ, ഇരട്ടക്കുന്നൻ നെലോളിച്ചോണ്ട് പരലോകത്തൂടെ നടപ്പുണ്ട്.”

“പാവം, അത് വല്യ മോശായിപ്പോയില്ലേ, ഒരു പാവത്തിനെ കൊന്നില്ലേ?”

“എന്താ ചെയ്യാ, അബദ്ധം പറ്റിപ്പോയില്ലേ? ജീവനെടുക്കാനല്ലേ എനിക്ക് പറ്റൂ, കൊടുക്കാൻ പറ്റൂലാലോ? ബ്രഹ്മാവിനോട് ചോദിച്ചപ്പോ മൂപ്പർക്ക് വല്യ ഡിമാൻഡ്, ഇന്നോടാരാ ആളുമാറി കൊല്ലാൻ പറഞ്ഞത് ന്ന് ചോദിച്ച് എൻ്റെ നേരെ മൂപ്പര് നാല് ചാട്ടം. എഐ സംവിധാനം വന്നതോടെ മനുഷ്യരെല്ലാം കുട്യോളെ എഐ ൽക്കൂടെ ഉണ്ടാക്കി ജീവൻ കൊടുക്കാനുള്ള പരിപാടി നോക്കുന്നുണ്ട്. അതോണ്ട് ബ്രഹ്മാവിൻ്റെ പണി പോവോന്ന് പേടിച്ചരിക്കാണ് മൂപ്പര്, അപ്പോഴാ മരിച്ചോന് ജീവൻ കൊടുക്കോന്ന് ചോദിച്ച് ഞാനവിടെ ചെല്ലുന്നത്. ഞാൻ പറഞ്ഞത് കേട്ട് മൂപ്പരെന്നെ കൊന്നില്ലാന്നേള്ളൂ.”

“എന്നാലും ആള് മാറിപ്പോവാന്ന് വെച്ചാല് അത് വല്യ തെറ്റല്ലേ?”

“തെറ്റാണ്, പക്ഷേ പറ്റിപ്പോയി ദാസാ. ഇനി പറ്റാതിരിക്കാനാ, ചിത്രഗുപ്തനേം കൂടെക്കൂട്ടിയത്”

“ഉം, അതൊക്കെപ്പോട്ടെ. ഇപ്പോ ഇബിടേക്ക് എഴുന്നള്ളിയതെന്തിനാണാവോ?”

” അന്നെ കൊണ്ടോവാൻ, അനക്ക് നെഞ്ച് വേദനയല്ലേ? അതിപ്പോ കൂടിക്കൂടി പെട്ടെന്ന് നിൻ്റെ കാറ്റു പോവും. ഇപ്പോ നീ മയക്കത്തിലാ, ഒരു ദിവസം നിനക്ക് സമയം ണ്ട്. അതോടെ നിൻ്റെ പണി തീരും. “

”ആണോ, അപ്പോ ഗുപ്തേട്ടന് കട്ടൻചായ വേണ്ടേ?”
” ങ്ഹാ, മാണം. ചാവുന്നതിന് മുന്നേ ‘യ്യ് ഓന് ഇച്ചിരെ കട്ടൻ ചായ വെച്ച് കൊടുക്ക്”

“അത് ഞാൻ വെച്ച് കൊടുക്കാ, എന്തായാലും ചാവാൻ പോവ്വല്ലേ… മൂപ്പർക്ക് കട്ടനും വെച്ച് കൊടുക്കണ്ടേ? അപ്പോ ‘ ബെയ്ലി പാലം ഇട്ടാല് പട്ടാളത്തിനും നാട്ടാർക്കും നടക്കാം ന്നാണല്ലോ പ്രമാണം, അതുകൊണ്ട് കട്ടൻ ചായക്ക് പ്രതിഫലമായി ൻ്റെ ഒരു ആഗ്രഹം സാധിപ്പിച്ച് തര്വോ?”

“അയിനെന്താ മുത്തേ, അൻ്റെ ഏതാഗ്രഹവും ഈ ഗുപ്തേട്ടൻ സാധിപ്പിച്ച് തരും. ഇയ്യ് പറ മുത്തേ” ന്നും പറഞ്ഞ് റൂമിലേക്ക് പെട്ടെന്ന് ചിത്രഗുപ്തൻ കേറി വന്നു. 

” ങ്ഹാ ഇങ്ങള് വന്നോ, ഇരിക്കീംന്നും പറഞ്ഞ്, ഞാൻ വേഗം അടുക്കളയിലേക്ക് നടന്നു. 

പെട്ടെന്ന് കട്ടൻ ചായ ഉണ്ടാക്കി രണ്ടാൾക്കും കൊടുത്തു. ഗുപ്തൻ കട്ടൻ ചായ ഊതിയൂതി കുടിക്കുന്നത് ഞാൻ നിർവൃതിയോടെ നോക്കി നിന്നു. രണ്ടാൾക്കും തണുത്തിട്ട് വിറയ്ക്കുന്നുണ്ടായിരുന്നു. പാവങ്ങള് മഴയത്ത് കാർമേഘത്തിനിടയിൽക്കൂടെ നനഞ്ഞൊലിച്ച് വന്നതല്ലേ, നല്ലോണം തണുക്കുന്നുണ്ടാവും.

ചായ കുടിച്ചു കൊണ്ടിരിക്കുന്നതിനിടയിൽ ഗുപ്തൻ ചോദിച്ചു. 

“അല്ല, അൻ്റെ ഏതോ ആഗ്രഹം സാധിപ്പിച്ച് തരണം ന്ന് പറഞ്ഞില്ലേ, യ്യ് പറ. അനക്ക് എന്താ മാണ്ടത്, ബുർജ് ഖലീഫയില് റൂമ് മാണോ? അതോ തൽക്കാലം ഒരീസം ലീലാ പാലസില് ഒറങ്ങിയാ മതിയോ, അതോ പള്ള നെറച്ചും കോയി ബിരിയാണി മത്യോ, അതോ കാട്ടാച്ചി ‘ റം ” മാറ്റി അനക്ക്, മോഗൻലാലൊക്കെ കുടിക്കുന്ന
കോണ്യാക്ക്, മാണോ, അതോ ബീമാനത്തില് കേറണോ, യ്യ് പറ. ഒരീസം കൊണ്ട് സാധിക്കുന്ന എന്തും അനക്ക് നമ്മള് സാധിപ്പിച്ച് തരും, ല്ലേ കാലേട്ടാ?”

കാലനെ നോക്കി ചിരിച്ചു കൊണ്ട് ഗുപ്തൻ ചോദിച്ചു. 

“പിന്നല്ലാണ്ട്, നല്ല ഒന്നൊന്തരം കട്ടൻ ചായ, ഇത്രേം നല്ല ചായ ഞമ്മള് കുടിച്ചിട്ടേയില്ല. അതോണ്ട് യ്യ്, മടിക്കാണ്ട് പറഞ്ഞാളി”

”ഞാൻ പറയുന്ന ആഗ്രഹം ഇങ്ങക്ക് സാധിപ്പിച്ച് തരാൻ പറ്റിയില്ലേൽ ഇങ്ങക്ക് എന്നെ കൊല്ലാതിരിക്കാൻ പറ്റ്വോ, പറ്റില്ലാ, ലേ”

” അതെന്താ മുത്തേ അങ്ങനെയൊരു ടോക്ക്.. നമ്മക്ക് സാധിപ്പിക്കാൻ പറ്റാത്ത എന്ത് കാര്യാണ് ഭൂമിയിലുള്ളത്, അഥവാ സാധിപ്പിക്കാൻ പറ്റീലെങ്കിൽ, അന്നെ ഞമ്മള് കൊല്ലാണ്ട് വിടും, പോരേ?
പിന്നെ അൻ്റെ വെളവൊന്നും ഞമ്മളെയടുത്ത് നടക്കൂല മോനേ, യ്യ് എന്ത് ചോദിച്ചാലും ഇരുപത്തിനാലു മണിക്കൂറിനുള്ളിൽ ഞമ്മള് സാധിപ്പിച്ച് തരും. എന്നിട്ട് അന്നെ ഞമ്മള് കൊണ്ടോവേം ചെയ്യും, കാരണം അൻ്റെ ‘എക്സ്പെയറി ഡേറ്റ് ഒരീസം കൊണ്ട് കഴിയും. യ്യ് ആഗ്രഹം പറ മുത്തേ, അൻ്റെ കാര്യം ശരിയാക്കീട്ട് വേണം വേഗം പോവാന്.. “

” ന്നാ ഞാൻ പറയട്ടേ, ആഗ്രഹം?”

“യ്യ് പറയെടോ”

” ന്നാല്, ചാവുന്നേന് മുന്നേ എനിക്ക് ബല്യൊരു ആഗ്രഹം ഉണ്ടേയ്നി” 

“ന്താദ്?”

” ൻ്റെ ഏതേലും പോസ്റ്റിന് എഫ് ബീല് നൂറ് ലൈക്കും കമൻ്റും കിട്ടണം ന്ന്…”

“ൻ്റെ പഹയാ ഇത് വല്ലാത്തൊരു ഒലക്കേ മ്മലെ ആഗ്രഹം ആയിപ്പോയല്ലോ, ഇത് ഞമ്മളെക്കൊണ്ട് കൂട്ട്യാ കൂടൂല പഹയാ. സുക്കറണ്ണൻ വിചാരിച്ചാപ്പോലൂം നടക്കൂലാ. ഗുപ്താ, ബാ, പൂവാം, പോത്തിനെ അയിച്ചോള്, ഇവൻ്റെടുത്ത് നമ്മളെ കളിയൊന്നും നടക്കൂലാ”

ഞാൻ പെട്ടെന്ന് കണ്ണു തുറന്ന് നോക്കു മ്പോൾ മുന്നില് ആരുംല്ലാ, പുറത്ത്ന്ന് പോത്തിൻ്റെ അമറലും പോത്തിൻ്റെയൊരു മുശ്ക്ക് മണോം ഉണ്ടായിരുന്നു. 

✍️ ഷിജിത് പേരാമ്പ്ര