🌹അന്നത്തെ രാത്രിയിൽ🌹

“അഖിലേ ഇത്തിരി മെല്ലെ പോടാ.. “

ഹെൽമറ്റും വെച്ച് മുറ്റത്തു നിന്നും വണ്ടിയെടുത്ത് ചീറിപ്പായുന്നതിനിടയിൽ അഖിലൊന്നു തിരിഞ്ഞു നോക്കി. 

അവന്റെ അമ്മ പിന്നിൽ നിന്നുംവിളിച്ച് പറഞ്ഞത് ആര് കേൾക്കാൻ, 

പ്ലസ് ടു കഴിഞ്ഞപ്പോ തുടങ്ങിയതാ ബൈക്ക് വാങ്ങി കൊടുക്കണംന്നുള്ള ബഹളം. പത്താം ക്ലാസ് കഴിഞ്ഞപ്പോൾ മുതല് പറയുന്നുണ്ട്, പ്ലസ് ടു ജയിച്ചാൽ ബൈക്ക് വാങ്ങി കൊടുക്കണമെന്ന്.

പക്ഷേ അന്ന് “നിനക്ക് വയസ്സായില്ല പതിനെട്ട് വയസ്സായിട്ടേ വാങ്ങിത്തരുന്ന് പറഞ്ഞ് ഒരു വിധം സമാധാനിപ്പിച്ചതാ.
പ്ലസ് ടു വി ന് നല്ല മാർക്ക് വാങ്ങിയാൽ വാങ്ങിത്തരാംന്ന് പറഞ്ഞു. 

അവൻ ജയിക്കുമെന്ന് പോലും വിചാരിച്ചതല്ല. അതാ അത്ര ധൈര്യത്തിൽ പറഞ്ഞത്. പക്ഷേ അവന്റെ റിസൽട്ട് വന്നപ്പോ
നാല് എ പ്ലസ്സും രണ്ട് എ യുമുണ്ട്. പിന്നെ പറഞ്ഞു പോയ വാക്ക് പാലിക്കാതിരിക്കാൻ പറ്റില്ലാലോ. 

കുടുംബശ്രീ ലോണെടുത്ത് അഖിലിന്റെ അമ്മ അവന് ബൈക്ക് വാങ്ങിക്കൊടുത്തു. സെക്യൂരിറ്റി ഗാർഡ് ജീവനക്കാരനായ അച്ഛൻ ദാമോദരൻ അപ്പോഴേ പറഞ്ഞു.. 

“ഇവനിപ്പോ ബൈക്കൊന്നും വാങ്ങിക്കൊടുക്കണ്ടായിരുന്നു. എന്റെ ചെറിയ വരുമാനത്തിൽ നിന്ന് ഇതിനും കൂടെ അടയ്ക്കാനുള്ളത് തികയുമെന്ന് തോന്നുന്നില്ല.. 

കോപ്പിയടിച്ചെങ്കിലും തന്റെ ആഗ്രഹം നിറവേറ്റണംന്നുള്ള അഖിലിന്റെ പരിശ്രമവും വിജയം കണ്ടു. അത് മാത്രമല്ല, പ്ലസ് വൺ മുതൽ അവൻ ആഗ്രഹിച്ചതാ അനുശ്രീയെ. ബൈക്കില്ലാത്ത ഒറ്റക്കാരണത്താൽ അവൾ മൈൻഡ് ചെയ്യാറുമില്ല. ഇപ്പോ ബൈക്ക് വാങ്ങിയതിന് ശേഷം അവളെയും കൊണ്ടവൻ കറങ്ങാത്ത സ്ഥലവുമില്ല. ഹെൽമറ്റ് ഇടാതെ പോവാനാ അവന് ഇഷ്ടം
പക്ഷേ പോലീസ്, മോട്ടോർ വാഹന വകുപ്പ് ചെക്കിംങ്ങ് കൂടുതലായപ്പോ ഹെൽമറ്റിടാതെ ഒരു രക്ഷയുമില്ല. ഫൈൻ അടയ്ക്കാൻ പത്ത് പൈസ തരില്ലാന്ന് അച്ഛനുമമ്മയും പറഞ്ഞ് കഴിഞ്ഞു.. അത് കൊണ്ട് തൽക്കാലം പഴയൊരു ഹെൽമറ്റ് സംഘടിപ്പിച്ച് സ്റ്റിക്കർ വർക്കൊക്കെ നടത്തി ഉപയോഗിച്ച് വരുന്നു. നല്ല മാർക്ക് കിട്ടിയത് കൊണ്ട് ടൗണിലെ കോളേജിൽ തന്നെ അവന് അഡ്മിഷനും കിട്ടി.
ബൈക്ക് വാങ്ങിയപ്പോ ദിവസവും കോളേജിൽ പോയി വരാനും എളുപ്പം. 

ബൈക്ക് കിട്ടിയതോടു കൂടി അഖിൽ ആളാകെ മാറി. കോളേജിൽ ഇഷ്ടം പോലെ കുട്ടുകാര്, അനാവശ്യ കുട്ടുകെട്ടുകൾ, കൂട്ടുകാരിൽ പലരും വലിയ പണക്കാരുടെ മക്കൾ. അവരുടെ നിലവാരത്തിലെത്താൻ അഖിലിന് പലതും ചെയ്യേണ്ടി വന്നു. 

പലപ്പോഴും രാത്രി വൈകിയാണ് വീട്ടിൽ എത്താറ്, ഷർട്ടിന് സിഗരറ്റിന്റെ മണം.  രാത്രി വൈകി വീട്ടിൽ വരുന്നതെന്താന്ന് ചോദിക്കുമ്പോൾ അവൻ അമ്മയോട് തട്ടിക്കയറി. 

“ഞാൻ ചെറിയ കുഞ്ഞൊന്നുമല്ലാലോ അമ്മേ !! ഇത്തിരി വൈകിയാലും വീട്ടിലെത്തുന്നില്ലേ.. എനിക്ക് വേണൽ ഹോസറ്റലിൽ നിൽക്കാലോ? എന്നിട്ടും ഞാൻ വീട്ടിലെക്ക് വരുന്നില്ലേ?
അതിവിടെ രാത്രി അമ്മ തനിച്ചായത് കൊണ്ടല്ലേ.”

 അത്രയും കേട്ടാ മതിയായിരുന്നു ആ അമ്മയ്ക്ക്. ചോദിക്കാനുംപറയാനുമുള്ളതു മുഴുവനും മകന്റെ ആ ഒരു വാക്കിൽ ഒതുങ്ങിപ്പോയി. 

നേരം വെളുത്ത് അഖിൽ കോളേജിൽ പോവാൻ ഇറങ്ങിയപ്പോ അവനോട് അമ്മ പറഞ്ഞു.
“മോനെ നിന്നോടൊരു കാര്യം പറയാൻ അച്ഛൻ പറഞ്ഞേൽപിച്ചിട്ടുണ്ട്.” 

“എന്താ അമ്മേ കാര്യം?”

“അത് അച്ഛന് മാസം സെക്യൂരിറ്റി ഏജൻസിയുടെ പിടുത്തവും കഴിഞ്ഞ് ചെറിയ സംഖ്യയേ വരുമാനമുള്ളൂ. അതുകൊണ്ട് നിന്റെ വണ്ടിയുടെ ലോൺ അടയ്ക്കാൻ നിന്നോട് വല്ല പാർട്ട് ടൈം ജോലിയും ചെയ്യാൻ പറ്റോന്ന് പറയാൻ പറഞ്ഞു. വല്ല ഓൺലൈൻ ബിസിനസ്സോ ഏതേലും ഷോപ്പിൽ ബില്ലടിക്കാനോ മറ്റോ ജോലിക്ക് ശ്രമിക്ക്, 

“ശരിയമ്മേ, ഞാൻ നോക്കാം. “

പിറ്റേന്ന് കോളജിൽ പോയപ്പോൾ അവന്റെ ആലോചന കണ്ടു കൂട്ടുകാരിലൊരാളായ ഹരി. ചോദിച്ചു. 

“എന്തുപറ്റിയെടാ, ഒരു മന്ദഗതിയാണല്ലോ നിനക്കിന്ന്”

” ഒന്നുമില്ലെടാ, എന്തേലും ചെറിയൊരു ജോലി കണ്ടെത്തണം, അച്ഛന്റെ ചെറിയ വരുമാനത്തിൽ എന്റെ പഠിത്തവും വീട്ടുചിലവും, പിന്നെ ബൈക്കിന്റെ ലോണും എല്ലാം കൂടെ നടക്കുന്ന ലക്ഷണം കാണുന്നില്ല, ഇന്നലെ അമ്മയെന്നോട് പറഞ്ഞു, എന്തെങ്കിലും ചെറിയ ജോലി ശരിയാക്കണമെന്ന്. വല്ല ഷോപ്പിലോ മറ്റോ ജോലിക്ക് കേറാൻ, ബൈക്കിന്റെ ലോൺ ഇനി എന്നോട് അടച്ചോളാനാ പറഞ്ഞത്. “

“അതിപ്പോ നീ കോളേജ് ടൈം കഴിഞ്ഞ് ഏതെങ്കിലുമൊരു ഷോപ്പിൽ ജോലിക്ക് കയറിയാൽ വളരെ തുച്ഛമായ വരുമാനമേ കിട്ടു. ചിലപ്പോൾ ഒരു മാസം പെട്രോളടിക്കാനുള്ള വരുമാനം പോലും കിട്ടിയെന്ന് വരില്ല. “

“അതാ ഞാനും ആലോചിക്കുന്നത് എന്ത് ജോലിക്കാണ് പോകേണ്ടതെന്ന്. “

“എന്തായാലും ഞാനൊന്നു ശ്രമിച്ച് നോക്കട്ടെ, എന്തു ജോലിയും ചെയ്യാൻ നീ തയ്യാറാണോ.. “

“എന്തു ജോലിക്കും ഞാൻ തയ്യാറാണ്. എനിക്ക് കുറച്ച് പൈസ ഉണ്ടാക്കിയേ പറ്റൂ. വണ്ടിയുടെ ടയറ് മാറ്റാനായി. ഓയിൽ സർവ്വീസിന് വണ്ടി കമ്പനിയിൽ കൊണ്ടുപോകാനായിട്ടുണ്ട്.. അച്ഛന്റെ ഈ അവസ്ഥയിൽ അച്ഛനോട് പൈസ ചോദിക്കുന്നത് ശരിയല്ല. കുടുംബശ്രീയിൽ മാസ അടവ് തെറ്റിയെന്ന് അമ്മയിന്നലെ പറയുന്നത് കേട്ടു. അടവ് തെറ്റിയാൽ കുടുംബശ്രീ ചേച്ചിമാരുടെ വായിലിരിക്കുന്നത് മുഴുവൻ അമ്മ കേൾക്കേണ്ടിവരും.
അതുകൊണ്ട് എത്രയും പെട്ടെന്ന് കുറച്ച് പണമുണ്ടാക്കിയേ തീരൂ.” 

“ഓഹോ അപ്പോൾ പ്രശ്നം ഇത്തിരി സങ്കീർണ്ണമാണ് ല്ലേ, നമുക്ക് വഴിയുണ്ടാക്കാം. ഞാൻ നാളെ വരുമ്പോൾ നിനക്കൊരു ജോലിയുമായിട്ടേ വരൂ. “

പിറ്റേന്ന് ഹരി കോളേജിലെത്തിപ്പോൾ തന്നെ അഖിലിനെ കണ്ട്, അവനെയും കൂട്ടി കാന്റീനിലേക്ക് നടന്നു. 

രണ്ട് ചായയും ഓർഡർ ചെയ്ത് ചായക്ക് കാത്തിരിക്കുമ്പോൾ ഹരി സ്വകാര്യമായി അഖിലിനോട് പറഞ്ഞു.. 

“എടാ മച്ചാ.. അഖീ.. നീയിന്നലെ എന്നോടൊരു ജോലിക്കാര്യം പറഞ്ഞില്ലേ? ഞാനത് സെറ്റാക്കിയിട്ടുണ്ട്. പക്ഷേ ഇത്തിരി റിസ്കുള്ള പണിയാണ്. പക്ഷേ പണമുണ്ടാക്കാം. “

“ജീവിതത്തിൽ റിസ്കെടുത്തിട്ടുള്ളവർക്കേ വിജയമുണ്ടായിട്ടുള്ളൂ. അതുകൊണ്ടിത്തിരി റിസ്കെടുക്കാനും ഞാൻ തയ്യാറാണ്. അതുകൊണ്ട് നീ വേഗം കാര്യം പറ.”

” അതൊന്നുമില്ല.. നീ കോളേജ് വിട്ട് നാട്ടിലേക്ക് പോകുമ്പോൾ നിന്റെ കയ്യിലൊരാളൊരു പൊതി തരും അത് നിന്റെ നാട്ടിലുള്ളൊരാൾക്ക് കൈമാറിയാ മതി. നീ ചെല്ലുമ്പോൾ നിന്റെ നാട്ടിൽ അയാൾ നിന്നെയും കാത്തുനിൽക്കുന്നുണ്ടാവും. നിനക്ക് അപ്പോൾ തന്നെ നിനക്കുള്ള പൈസയും കിട്ടും.”

” അതെന്ത് ജോലിയാ ഹരീ.. വല്ല കള്ളക്കടത്തുമാണോ.. “

“അങ്ങനെ ചോദിച്ചാൽ കള്ളക്കടത്ത് തന്നെയാ.. പക്ഷേ സ്വർണ്ണമൊന്നുമല്ല. സാധനം കഞ്ചാവാ”

“കഞ്ചാവോ, അതൊക്കെ പിടിച്ചാൽ വല്യ കേസാവില്ലേ?” 

“അതല്ലേ നിന്നോട് ആദ്യമേ പറഞ്ഞത്, റിസ്ക്കുള്ള പണിയാണെന്ന്. നഗരത്തിൽ നിന്നും നിന്റെ നാട്ടിലേക്ക് കൊണ്ടുപോകുന്ന പച്ചക്കറി വണ്ടിയിലും മീൻ വണ്ടിയിലുമൊക്കെയായിരുന്നു മുമ്പ് ഇവർ കഞ്ചാവ് കടത്തികൊണ്ടിരുന്നത്. പക്ഷേ അതൊക്കെയിപ്പോൾ പോലീസിന്റെയും എക്സൈസിന്റെയുമൊക്കെ നിരീക്ഷണത്തിലാണ്. അപ്പോഴാണ് നിന്റെ കാര്യം ഞാനവരോട് പറഞ്ഞത്.
നീയാവുമ്പോൾ ആരും ശ്രദ്ധിക്കില്ല. കോളേജ് പയ്യൻ, നിന്റെ ബാഗിലെന്താണെന്നാരും ശ്രദ്ധിക്കുകയുമില്ല. അതുകൊണ്ടാണ് ഇങ്ങനെ ഒരു ഐഡിയ ഞാനവരോട് പറഞ്ഞത്. നിനക്ക് പറ്റുമെങ്കിൽ ഇപ്പോൾ തന്നെ സമ്മതം പറയ്. നീ സമ്മതിച്ചാൽ നിന്റെ വണ്ടിയുടെ ലോണും മറ്റു ബാധ്യതകളുമൊക്കെ നിനക്ക് തീർക്കാം.
നീയൊന്നാലോചിച്ച് മറുപടി പറയ്. “

അഖിൽ അൽപ നേരം മിണ്ടാതിരുന്നു. ഒന്നാലോചിച്ച ശേഷം മറുപടി പറഞ്ഞു. 

“എനിക്ക് സമ്മതമാണെടാ. നീയവരോട് പറഞ്ഞേക്ക്. എന്നുമുതലാണ് ഞാൻ വരേണ്ടതെന്ന് നീയവരോട് ചോദിക്ക്. “

“എന്നാ ശരിയെടാ, ഞാനിന്ന് തന്നെ പറഞ്ഞ് സെറ്റാക്കാം. എന്തു തന്നെയായാലും നീ വളരെയധികം ശ്രദ്ധിക്കണം കേട്ടോ, പിന്നെ, .. ഈ കാര്യം മറ്റാരോടും പറയാൻ നിൽക്കേണ്ട. ഇപ്പോ നമ്മുക്ക് ക്ലാസിലേക്ക് പോകാം.”

ചായ കുടിയും കഴിഞ്ഞ് രണ്ടു പേരും ക്ലാസിലേക്ക് നടന്നു. 

അഖിൽ ക്ലാസ്സിലിരിക്കുമ്പോൾ, ഹരി പറഞ്ഞ കാര്യം തന്നെ ഓർത്തു കൊണ്ടേയിരുന്നു. 

പിറ്റേന്ന് മുതൽ അഖിലിന് ജോലി ശരിയായി. നഗരത്തിലെ കഞ്ചാവ് വിതരണക്കാരിൽ നിന്നും അവന്റെ ഗ്രാമത്തിലെ കഞ്ചാവ് വിൽപ്പനക്കാർക്ക് എത്തിച്ച് കൊടുക്കുക. 

അതിന് വേണ്ടി നാലരക്ക് കോളേജ് വിട്ടാലും രാത്രി പത്ത് മണി കഴിയാതെ അവന് നഗരത്തിൽ നിന്നും വീട്ടിലേക്ക് വരാൻ സാധിക്കാറില്ല. രാത്രി നഗരത്തിലെ മാർക്കറ്റിൽ വരുന്ന പച്ചക്കറി വണ്ടിയിലും. പാർസൽ ലോറികളിലും എത്തുന്ന കഞ്ചാവിന് വേണ്ടി അവൻ നഗരത്തിൽ കാത്തു നിന്നു. 

അങ്ങനെ രാത്രിയാത്ര അവന് ഹരമായി, നേർത്ത നിലാവ്, ചെറിയ തണുപ്പ് രാത്രിയിലെ ബൈക്ക് യാത്ര അവന് സന്തോഷവും പണവും നൽകി. ബൈക്കിന്റെ ലോൺ അടച്ചാലും പണം ബാക്കി വന്നു. പലപ്പോഴും കൂട്ടുകാരുമൊത്ത് ലഹരി പാർട്ടി, നടത്തി കോളേജിലെ ജീവിതമവൻ ആർഭാടമാക്കി. 

പാതിരാത്രി വീട്ടിലെത്തുന്ന മകന് വേണ്ടി ആ അമ്മ ഉറക്കമൊഴിഞ്ഞ് കാത്തിരുന്നു.. നിലത്തുറയ്ക്കാത്ത കാലുകളുമായി വരുന്ന മകനെ ആ അമ്മ പേടിയോടെ നോക്കി. എന്തെങ്കിലും അവനോട് പറയാൻ ചെന്നാൽ അവൻ തട്ടിക്കയറും. 

“കോളേജ് ലൈഫ് അല്ലേ അമ്മേ! അപ്പോ ഇങ്ങനെയൊക്കെ ഉണ്ടാവും
അല്ലാതെ മുടിയിൽ കാച്ചിയ വെളിച്ചെണ്ണയും തേച്ച്, പശു നക്കിത്തുടച്ച കിടാവിനെപ്പോലെ കോളേജിലേക്ക് ചെന്നാൽ കൂട്ടുകാര് എന്നെ നിർത്തിപ്പൊരിക്കും. ഇത്തിരി അടിച്ച് പൊളിച്ച് ജീവിക്കണ്ടേ?” 

അതിന് മറുപടി പറയാതെ ക്ഷീണിച്ച് വന്ന മകന് ചോറു വിളമ്പി കൊടുക്കാനായി ആ അമ്മ അടുക്കളയിലേക്ക് ചെന്നു. 

ഒരിക്കൽ രാത്രി അഖിലിന് കഞ്ചാവ് കൈമാറുമ്പോൾ ഗ്യാങ്ങ് ലീഡർ അർജുൻ ഭായ് അവനോട് പറഞ്ഞു.
“നീ ശ്രദ്ധിക്കണം.. പോലീസിന്റെ കയ്യിൽ പെട്ടാലും എക്സൈസിന്റെ കയ്യിൽ പെടരുത്. പോലീസിന്റെ കയ്യിൽ പെട്ടാൽ ചിലപ്പോ തല്ല് കിട്ടില്ല. കേസ് ചാർജ്ജ് ചെയ്ത് കോടതിയിൽ ഹാജരാക്കുകയേ ഉള്ളൂ – പക്ഷേ എക്സൈസിന്റെ കയ്യിൽ കിട്ടിയാൽ നല്ലോണം തല്ല് കിട്ടും എല്ല് വെള്ളമായിപ്പോവും.. നൂറ് ഗ്രാം കഞ്ചാവ് കിട്ടിയാലും ഒരു കിലോ കഞ്ചാവ് കിട്ടിയാലും എക്സൈസ്കാര് തല്ലി പഴുപ്പിക്കും പറഞ്ഞില്ലാന്ന് വേണ്ട, അതു കൊണ്ട് ശരിക്ക് ശ്രദ്ധിക്കണം.” 

ആഞ്ഞുവലിച്ച കഞ്ചാവിന്റെ ലഹരിയാൽ അഖിൽ പറഞ്ഞു

“അതൊക്കെ ഞാനേറ്റുഭായ്. ഒന്നും പേടിക്കണ്ട. “

ഗ്രാമത്തിലെ ഏജന്റിനെ ഏൽപ്പിക്കേണ്ട കഞ്ചാവുമായി രാത്രി അഖിൽ ബൈക്കിൽ ചീറിപ്പാഞ്ഞു. ടൗണിൽ നിന്നും വരുമ്പോൾ തന്നെ അഖിലിനെ എക്സൈസുകാർ പിൻതുടരുന്നുണ്ടായിരുന്നു. 

പാതിവഴിയിൽ വെച്ച് തന്നെ അഖിൽ തന്നെ പിൻതുടരുന്ന വണ്ടി ശ്രദ്ധിച്ചിരുന്നു അവൻ ഊടുവഴികളിലൂടെ ബൈക്ക് പറത്തി കൊണ്ടിരുന്നു. പാതിരാത്രി വീട്ടിലെത്തി. 

ദേഹം മുഴുവൻ ചോരയുമായി വീട്ടിൽ കയറി വന്ന മകനെ കണ്ട് അമ്മ വേവലാതിയോടെ ഓടി വന്നു. 

“അയ്യോ ഷർട്ടൊക്കെ കീറിയല്ലോ. ചോര വരുന്നുണ്ടല്ലോ എന്ത് പറ്റി മോനെ ?

കുഴഞ്ഞ ശബ്ദത്താൽ അവൻ പറഞ്ഞു. 

“അത് അമ്മേ രാത്രി വരുന്ന വഴിക്ക് പട്ടിയോ മറ്റോ വണ്ടിക്ക് മുന്നിൽ ചാടി വണ്ടി ചെറുതായി മറിഞ്ഞ് ഞാൻ വീണു.
കൈമുട്ടിലെ തൊലി പോയി
അത് കുഴപ്പമില്ല. ഞാൻ കുളിച്ച് ഡ്രസ് മാറി വരട്ടെ. അമ്മ ചോറ് എടുത്ത് വെച്ചോ ഞാനിതാ വരുന്നു..
അതും പറഞ്ഞ് അവൻ വാതില് വലിച്ചടച്ച ശേഷം പെട്ടെന്ന് ഫോണെടുത്ത് കോൾ ചെയ്തു. 

അങ്ങേതലയ്ക്കൽ ഫോൺ എടുത്തപ്പോൾ തന്നെ അവൻ പറയാൻ തുടങ്ങി. 

“അർജുൻ ഭായ്, എന്റെ പുറകെ എക്സൈസ് വണ്ടി ഉണ്ടായിരുന്നു. ഞാൻ പിടികൊടുത്തില്ല. വണ്ടിയുടെ നമ്പർ പ്ലേറ്റും മാറ്റിയിരുന്നു.
പക്ഷേ ഒരു കുഴപ്പം പറ്റി. ഞാൻ ഊടുവഴികളിലൂടെയാ വന്നത്.
ഒരു ചെറിയ വഴിയിലേക്ക് ബൈക്ക് ഓടിച്ച് കയറ്റിയപ്പോ.. പെട്ടെന്ന് ഒരു കിളവൻ. വണ്ടിക്ക് മുന്നിൽ ചാടി വണ്ടി തട്ടി അയാൾ തെറിച്ച് പോയി. അയാളും വീണു, ഞാനും വീണു. ഞാൻ പെട്ടെന്ന് എഴുന്നേറ്റ് വണ്ടി നേരെയാക്കി ഓടിച്ച് പോന്നു. പുറകെ തന്നെ എക്സൈസ് വണ്ടിയുണ്ടായിരുന്നു. ചിലപ്പോളവരയാളെ ആശുപതിയിൽ കൊണ്ട് പോയിക്കാണും. “

“കിഴവൻ തട്ടിപ്പോവോ?”

“സാധ്യതയുണ്ട് നല്ല ഇടിയാ, ഇടിച്ചത്. റോഡരുകിലേക്ക് തലയിടിച്ച് തെറിച്ച് പോവുന്നത് കണ്ടു. ഞാനതൊന്നും നോക്കാൻ നിന്നില്ല. പെട്ടെന്ന് മറിഞ്ഞു വീണ വണ്ടി നേരെയാക്കി എടുത്തു പോന്നു.
മറ്റു വണ്ടിക്കാരൊന്നും അപ്പോ അതുവഴി വന്നിട്ടുണ്ടായിരുന്നില്ല. ആരും കണ്ടതുമില്ല. പിന്നെ ആ വഴി പോലീസിന്റെ ക്യാമറയും ഇല്ല.” 

“എന്നാ പേടിക്കാനൊന്നുമില്ല. “

“സാധനം എന്റെ കയ്യിലുണ്ട്, രാവിലെ ആരെയെങ്കിലും ഇങ്ങോട്ട് വിട് സാധനം കൊടുത്ത് വിടാം എന്റെ കൈയിലെയും കാലിലെയും തൊലി പോയിട്ടുണ്ട്. ഭയങ്കര വേദന. “

“എന്നാ ശരി അഖിലേ, നീ പോയി കിടന്നുറങ്ങിക്കോ.”

അമ്മയുടെ വാതിലിനുള്ള മുട്ട് കേട്ടാണ് അഖിൽ രാവിലെ ഉണർന്നത്. 

“അഖിലേ.. അഖിലേ, നിന്നെ അന്വേഷിച്ച് ആരോ വന്നിരിക്കുന്നു.” 

“ങാ ദാ.. വരുന്നു.. 

കയ്യിലുള്ള കഞ്ചാവിന്റെ പൊതിയും കോളേജ് ബാഗിലാക്കി അഖിൽ വരാന്തയിലേക്ക് നടന്നു. 

“അഖിലേ ഞാൻ ഭായ് പറഞ്ഞിട്ട് വന്നതാ. “

“മനസ്സിലായി.. ദാ ബാഗ് കൊണ്ട് പോയ്ക്കോ. ഞാൻ കോളേജിൽ നിന്ന് ബാഗ് വാങ്ങിക്കോളാം..” 

സംശയത്തോടെ നോക്കുന്ന അമ്മ കേൾക്കാനായി അഖിൽ വിളിച്ചു പറഞ്ഞു. 

സാധനവും വാങ്ങി അയാൾ പോയി. 

“അച്ഛനെ വിളിച്ചിട്ട് കിട്ടുന്നില്ലാലോ മോനെ, ഫോൺ റിംങ് ചെയ്യുന്നുണ്ട് പക്ഷേ എടുക്കുന്നില്ല. വീട്ടിലെത്തേണ്ട സമയമായി. ഇതുവരെ വന്നില്ലാലോ.”

നേരം വെളുത്തിട്ടും ഭർത്താവ് വീട്ടിലെത്താത്തതിന്റെ ആവലാതിയോടെ ആ സ്ത്രീ പറഞ്ഞു കൊണ്ടിരുന്നു.. 

“അമ്മ ടെൻഷനടിക്കാതെ അച്ഛൻ ചെറിയ കുട്ടിയൊന്നുമല്ലാലോ എവിടെയെങ്കിലും പൊയ്ക്കാണും. ചിലപ്പോ സെക്യുരിറ്റി ഓഫീസിൽ പൊയ്ക്കാണും.” 

“ഉം ശരി.. ഞാൻ നിനക്ക് ചായയെടുക്കാം.” അതും പറഞ്ഞ് അമ്മ അടുക്കളയിലേക്ക് നീങ്ങി. 

“ഇതേ സമയം അഖിലിന്റെ അച്ഛൻ ജോലി ചെയ്യുന്ന കമ്പനിയിലെ മാനേജർ സെക്യുരിറ്റി ഓഫീസിലേക്ക് വിളിച്ചു.. 

“ഹലോ സെക്യുരിറ്റി ഏജൻസി ഓഫീസല്ലേ?”

“അതേ..” 

“നിങ്ങളുടെ ഏജൻസിയിൽ നിന്നും നൈറ്റ് ഫിഫ്റ്റിന് നിയോഗിച്ച സെക്യുരിറ്റി ജീവനക്കാരൻ ഇവിടെ ഇല്ല. രാവിലെ കമ്പനിയിലെ ഹൗസ് കീപ്പിംഗ് സ്റ്റാഫുകൾ വന്നപ്പോ ഗെയിറ്റ് പൂട്ടി കിടക്കുന്നു. ആള് സ്ഥലത്തില്ല. കമ്പനിയിലേക്ക് വന്നു കൊണ്ടിരിക്കുന്ന വാഹനങ്ങൾ മുഴുവൻ റോഡിൽ പാർക്ക് ചെയ്ത് റോഡ് ബ്ലോക്കായി കൊണ്ടിരിക്കാണ്. ഇത്രയും ഉത്തരവാദിത്വമില്ലാത്ത സ്റ്റാഫിനെയാണോ നിങ്ങൾ ഇവിടെ ജോലിക്ക് വെച്ചിരിക്കുന്നത്.. അതുകൊണ്ട് നിങ്ങളുടെ ഏജൻസിയുടെ എഗ്രിമെന്റ് ഞങ്ങൾ ക്യാൻസൽ ചെയ്യാൻ തീരുമാനിച്ചിക്കുന്നു. “

“ഹലോ സാർ, പെട്ടെന്ന് തീരുമാനം എടുക്കാതെ. എന്താ സംഭവിച്ചത് എന്ന് ഞങ്ങൾ ഒന്ന് അന്വേഷിക്കട്ടെ.” 

സെക്യൂരിറ്റി ഓഫീസിൽ നിന്നും അഖിലിന്റെ അച്ഛന്റെ ഫോണിലേക്ക് കോൾ പൊയ്ക്കൊണ്ടിരുന്നു
ഫോൺ റിംങ്ങ് ചെയ്തതല്ലാതെ ആരും അറ്റൻഡ് ചെയ്തില്ല. 

അഖിൽ ചായ കുടിച്ചു കൊണ്ടിരിക്കുമ്പോഴായിരുന്നു കോളിംഗ് ബെൽ ശബ്ദിക്കുന്നത് കേട്ടത്. ചായ ഗ്ലാസ് കയ്യിലെടുത്ത് കുടിച്ചു കൊണ്ടു തന്നെ അഖിൽ വാതിൽ തുറന്നു മുറ്റത്തേയ്ക്ക് നോക്കി. മുറ്റത്തൊരു പോലീസുകാരൻ പുറംതിരിഞ്ഞു നിൽക്കുന്നത് കണ്ടു. 

അഖിൽ പഞ്ചായത്ത് റോഡിലേക്ക് നോക്കി. മുറ്റത്തിനുമപ്പുറത്തെ പഞ്ചായത്ത് റോഡിൽ ഒരു പോലീസ് വാഹനം നിർത്തിയിട്ടിരിക്കുന്നത് കണ്ടു. അതിൽ നിന്നും ഒരു എസ് ഐയും ഒരു കോൺസ്റ്റബിളും കൂടെ നടന്നുവന്നത് കണ്ടു. 

അഖിൽ ചോദ്യഭാവത്തിൽ പോലീസുകാരനെയൊന്നു നോക്കി. 

പോലീസുകാരൻ ചിരിച്ചു കൊണ്ടു ചോദിച്ചു.. 

“അഖിൽ ദാമോദരൻ അല്ലേ?”

“അതേ.. എന്താ സാർ കാര്യം.. ?

“ഈ ബൈക്ക് അഖിലിന്റെയാണോ?”

” അതേ സാർ”

“ബൈക്ക് എവിടെയോ മറിഞ്ഞു വീണത് പോലെയുണ്ടല്ലോ. പെട്രോൾ ടാങ്ക് ചളുങ്ങിയിരിക്കുന്നു. മിറർ ഒന്ന് പൊട്ടിപ്പോയിരിക്കുന്നു. പെയിന്റ് പല സ്ഥലത്തും പോയിരിക്കുന്നു..” 

” അത്.. അത്.. ഇന്നലെ ഞാൻ കോളേജിൽ നിന്നു വരുമ്പോൾ ഒരു പട്ടി കുറുകെ ചാടിയതാണ് സാർ”

” എന്നിട്ട് പട്ടിക്ക് വല്ലതും പറ്റിയോ?”

” ഇല്ല സാർ. പട്ടി ചാടിയപ്പോൾ തന്നെ ഞാൻ ബ്രേക്കിട്ടത് കൊണ്ട് അതിനൊന്നും പറ്റിയില്ല. പക്ഷേ പെട്ടെന്നുള്ള ബ്രേക്കിലായത് കൊണ്ട് ഞാൻ വീണു. ദേ.. കണ്ടില്ലേ എന്റെ കയ്യും കാലുമൊക്കെ ഉരഞ്ഞ് തൊലി പോയിട്ടുണ്ട്.” 

അഖിൽ അത്രയും പറഞ്ഞപ്പോൾ തന്നെ എസ് ഐ ഉമ്മറത്തേക്ക് കയറി വന്ന് അഖിലിന്റെ മോന്തയ്ക്കൊന്ന് പൊട്ടിച്ചു.. 

” ഒരു പാവത്തിനെ വണ്ടിയിടിപ്പിച്ച് തട്ടിത്തെറുപ്പിച്ച് കൊന്നിട്ട്, നിന്ന് ന്യായം പറയുന്നോടാ കഴുവർടെ മോനേ” അവൻ പട്ടിയെ ആണ് പോലും തട്ടിയത്, 

“കോൺസ്റ്റബിൾ അതിങ്ങ് കാണിച്ചു കൊടുത്തേ..” 

കോൺസ്റ്റബിളിന്റെ കയ്യിൽ കരുതിയ ഒരു കാർഡ് അയാൾ അഖിലിനെ കാണിച്ചു കൊടുത്തു കൊണ്ട് അയാൾ അഖിലിനോട് ചോദിച്ചു. 

“ഇത് നിന്റെയല്ലേ.. പേര് ശരിക്ക് നോക്ക്. അഖിൽ ദാമോദരൻ എന്ന് കാണാം.” 

പകപ്പോടെ അടി കിട്ടിയ കവിൾ തുടച്ചുകൊണ്ട് അവൻ ആ ഐഡന്റിറ്റി കാർഡിലേക്ക് തുറിച്ചു നോക്കി.. തന്റെ കോളേജ് ഐഡൻറ്റിന്റെ കാർഡാണ് പോലീസുകാരൻ ഉയർത്തിപ്പിടിച്ചിരിക്കുന്നത്. 

അതും കാണിച്ചു കൊണ്ടയാൾ പറഞ്ഞു. 

“നീയയാളെ തട്ടിത്തെറപ്പിച്ച് മറിഞ്ഞു വീണപ്പോൾ നിന്റെ കയ്യിൽ നിന്നു നീയറിയാതെ നഷ്ടപ്പെട്ടു പോയതാ അത്. അതു മാത്രമല്ല. നിന്റെ ബൈക്കിന്റെ മഡ്ഗാർഡിന്റെ ഒരു കഷ്ണവും അവിടുന്നു കിട്ടിയിട്ടുണ്ട്. 

മുറ്റത്തുള്ള ബൈക്കിന്റെ മഡ്ഗാർഡിൽ പോലീസുകാരെന്റെ കയ്യിലെ കഷ്ണം ചേർത്തു വെച്ചു കാണിച്ചു കൊടുത്തു കൊണ്ട് എസ് ഐ പോലീസുകാരനോട് പറഞ്ഞു.. 

“അവനെ പിടിച്ച് വണ്ടിയിൽ കയറ്റ് ബാക്കിയെല്ലാം സ്റ്റേഷനിൽ ചെന്നിട്ടവന് പറഞ്ഞ് മനസ്സിലാക്കിക്കൊടുക്കാം.” 

ഉമ്മറത്തു നിന്നും അഖിലിനെ പോലീസുകാർ പിടിച്ച് ജീപ്പിനരുകിലേക്ക് നടത്തി കൊണ്ടുപോവുമ്പോൾ അവന്റ അമ്മ അലമുറയിട്ടു കരഞ്ഞു കൊണ്ടോടി വന്നു. 

“എന്തായിത്.. എന്താപ്രശ്നം എന്റെ മോനെന്തു ചെയ്തിട്ടാ?” 

ഓടി വരുന്ന അമ്മയെ തടഞ്ഞു നിർത്തിക്കൊണ്ട് എസ് ഐ പറഞ്ഞു. 

” നിങ്ങളുടെ മോൻ ഓടിച്ചു വന്ന ബൈക്ക് തട്ടി ഒരാൾ മരിച്ചു. പക്ഷേ അവൻ വണ്ടി നിർത്താനോ, തട്ടി വീണ ആളെ ആശുപത്രിയിലെത്തിക്കാനോ ശ്രമിച്ചില്ല. ഒന്നു പോലീസ് സ്റ്റേഷനിൽ വന്ന് വിവരം പറയുകയോ ചെയ്തില്ല.. അതുകൊണ്ട് ഇവനെ അറസ്റ്റു ചെയ്ത് കോടതിയിൽ ഹാജരാക്കേണ്ടിവരും.. നിങ്ങളൊരു വക്കീലിനെ ഏർപ്പാട് ചെയ്ത് കോടതിയിൽ എത്തിയാ മതി.” 

സംഭവത്തിന്റെ ഗൗരവമറിയാതെ അഖിലിന്റെ അമ്മ നെഞ്ചത്തടിച്ചു കരഞ്ഞു കൊണ്ടിരുന്നു. 

അഖിലിനെയും കൊണ്ട് പോലീസുകാർ സ്റ്റേഷനിലേക്ക് പോയി. 

കുറച്ചു ദൂരം ചെന്നപ്പോൾ തന്നെ റോഡിൽ നിറയെ വാഹനങ്ങൾ നിർത്തിയിട്ടിരിക്കുന്നത് കണ്ടു. അഖിൽ തലയും കുമ്പിട്ടിരുന്നു കരഞ്ഞു കൊണ്ടിരുന്നു. 

പുറകിലിരിക്കുന്ന അഖിലിനെ നോക്കി എസ് ഐ പറഞ്ഞു. 

“നീയിന്നലെ വണ്ടിയിടിപ്പിച്ചു തെറിപ്പിച്ചയാളാ കൊക്കയിലേക്ക് വീണിട്ടുണ്ട്. മരത്തിൽ തട്ടിവീണത് കൊണ്ട് അധികം താഴേക്ക് പോയിട്ടില്ല. ഫയർഫോഴ്സുകാര് ഇറങ്ങിയെടുക്കാൻ പോയിട്ടുണ്ട്. ഇപ്പോ എടുത്തിട്ടുണ്ടാവും.” 

ആൾക്കൂട്ടത്തിനു നടുവിലൂടെ പോലീസ് വാഹനം മെല്ലെ നീങ്ങി. 

കുറച്ചു മുന്നോട്ട് നീങ്ങിയപ്പോൾ റോഡ് സൈഡിൽ നിന്നും ഫയർഫോഴ്സിന്റെ സ്ട്രെക്ച്ചറിൽ ഒരാളെ കടത്തികൊണ്ട് നാലു പേർ പിടിച്ച് ഫയർഫോഴ്സിന്റെ ആംബുലൻസിൽ കയറ്റാനായി കൊണ്ടുവരുന്നത് കണ്ടു. പോലീസ് ജീപ്പിനടുത്തെത്തിയപ്പോൾ എസ് ഐ അതിലൊരാളോടായി ചോദിച്ചു.. 

“ബോഡി കിട്ടിയല്ലേ? ആളെ തിരിച്ചറിഞ്ഞോ?” 

“ഇല്ല സാർ.. പലരോടും അന്വേഷിച്ചു വരുന്നേയുള്ളൂ”

പോലീസ് വാഹനത്തിൽ നിന്നും എസ് ഐ ഇറങ്ങി വന്ന്, മൃതദേഹത്തിൽ മൂടിയിട്ട വെള്ളത്തുണി മുഖത്തിന്റെ ഭാഗത്തു നിന്നും മാറ്റി നോക്കി. 

തുണി മാറ്റിയത് കണ്ട് അഖിലും അതിലേക്കൊന്നെത്തി നോക്കി.. 

അവനൊന്നേ നോക്കിയുള്ളൂ.. 

“അച്ഛാ..” യെന്നവൻ അലറിക്കരഞ്ഞു.. 

അവന്റെ കരച്ചിൽ കേട്ട എസ് ഐ അവനോടായി പറഞ്ഞു.. 

“സ്വന്തം അച്ഛനെ തന്നെയാണ് നീ വണ്ടിയിടിപ്പിച്ച് കൊന്നത് ഇല്ലേടാ, വണ്ടി തട്ടിയപ്പോൾ നീ നേരെ സ്റ്റേഷനിൽ വന്നു വിവരം പറഞ്ഞിരുന്നെങ്കിലീ പാവം ചിലപ്പോഴിപ്പോ ജീവിച്ചിരുന്നേനെ.” 

അവനെയൊന്ന് രൂക്ഷമായി നോക്കിയ ശേഷം, എസ് ഐ ഫയർഫോഴ്സിന്റെ ആംബുലൻസ് ഡ്രൈവറോടായി
പറഞ്ഞു. 

” ബോഡി മെഡിക്കൽ കോളേജിലേക്ക് പോസ്റ്റുമോർട്ടത്തിനയക്കണം വണ്ടി അങ്ങോട്ട് വിട്ടോ.”

ആംബുലൻസ് മുന്നെയും, പോലീസ് വാഹനം പുറകിലുമായി ഓടിക്കൊണ്ടിരുന്നു. 

പോലീസ് വാഹനത്തിലിരുന്ന് അഖിൽ നെഞ്ചുപൊട്ടി ആർത്തലച്ചു കരഞ്ഞു. 

✍️ഷിജിത് പേരാമ്പ്ര🌹