🌹നോട്ടുകെട്ടുകൾ 5 അവസാന ഭാഗം🌹

Part 1

Part 5

താഴ് വാരത്തുള്ളവർ, മലമുകളിലുള്ളവരോട് വിളിച്ച് വിവരം പറഞ്ഞതിനനുസരിച്ച് മലമുകളിലുള്ളവർ അരുവിക്കരയിലൂടെ താഴേയ്ക്കും തിരഞ്ഞുകൊണ്ടു മലയിറങ്ങി വന്നു.
അവരിലൊരാൾ കൂടെയുള്ളവരോട് പറഞ്ഞു. 

“സുമേഷിൻ്റെ വണ്ടി ഇന്നലെ രാത്രി റോഡരുകിൽ കിടക്കുന്നുണ്ടായിരുന്നു. അത് ആ പോലീസുകാരൻ സ്റ്റേഷനിലേയ്ക്ക് കൊണ്ടുപോയിട്ടുണ്ട്. സുമേഷിനെ കാണുകയാണെങ്കിൽ അവനോട് ഇന്ന് സ്റ്റേഷനിൽ ചെല്ലാൻ പറഞ്ഞിട്ടുണ്ട്. “

“അതിനവൻ വെള്ളമടിച്ച് ഓഫായതാണെങ്കിൽ നേരം വെളുക്കുമ്പോഴെങ്കിലും വീട്ടിലെത്തേണ്ടതല്ലേ, അവൻ്റെ പണിക്കിടുന്ന ഡ്രസ് കവറ് അരുവിയിൽ നിന്നു കിട്ടിയിട്ടുണ്ട്. അവന് എന്തോ പറ്റിയിട്ടുണ്ട്, ഉറപ്പാ. അല്ലേൽ അവനെങ്ങനെയെങ്കിലും വീട്ടിലെത്തിയേനെ. കാരണം അവന് മക്കളെന്നു വെച്ചാൽ ജീവനാണ്. “

“പിന്നെ ഇവനെങ്ങോട്ട് പോയോ എന്തോ”, കാട്ടുപൊന്തക്കാടിനുള്ളിലൂടെ നൂഴ്ന്നിറങ്ങിക്കൊണ്ട് അവർ പരസ്പരം പറഞ്ഞ് കൊണ്ടിരുന്നു. അതിലൊരാൾ വലിയ മരത്തിൻ്റെ വേരിൽ പിടിച്ച് അരുവിയ്ക്കുള്ളിലെ ഉരുളൻ കല്ലിൽ ചവിട്ടി ശ്രദ്ധയോടെ വലിയ ഗർത്തത്തിലേയ്ക്കിറങ്ങി. താഴെ വെള്ളം നിറഞ്ഞ വലിയ കുഴിയിൽ വേരിൽ കുടുങ്ങി സുമേഷിൻ്റെ ബോഡി കമഴ്ന്നു കിടക്കുന്ന നിലയിൽ കണ്ടപ്പോൾ അയാൾ നിലവിളിച്ചു കൊണ്ട് മേലേയ്ക്ക് കയറി വന്നു. പിന്നീട് ശ്വാസം കിട്ടാതെ മരത്തിൻ്റെ വേരിൽ ചാരിയിരുന്നു കൊണ്ട് ഉറക്കെ വിളിച്ചു കൂവി. 

“ആരേലും ഓടി വരണേ!!സുമേഷിതാ കുഴിയിൽ വീണു കിടപ്പുണ്ടേ, “

അയാളുടെ അർച്ച കേട്ട് താഴെ നിന്നും കൂടുതൽപ്പേർ ഓടി മുകളിലേയ്ക്കു വന്നു. അവരിൽ ചിലർ കുഴിയിലേയ്ക്കിറങ്ങി നോക്കി. പിന്നീട് മുകളിൽ കയറി വന്നു കൊണ്ടു പറഞ്ഞു. 

“ആരേലും പോലീസ് സ്റ്റേഷനിൽ വിളിച്ച് വിവരമറിയിക്ക്. ഫയർഫോഴ്സു
കാർക്കല്ലാതെ ബോഡി കയറ്റിക്കൊണ്ടുവരാനാവില്ല.” അയാൾ പറഞ്ഞതു കേട്ടപ്പോൾ അവരിലൊരാൾ പെട്ടെന്ന് തന്നെ പോലീസ് സ്റ്റേഷനിൽ വിളിച്ച് വിവരമറിയിച്ചു. 

ഒരു മുക്കാൽ മണിക്കൂറിനുള്ളിൽത്തന്നെ പോലീസ് വാഹനവും, ഫയർ ഫോഴ്‌സും, ആംബുലൻസും മലകയറി വന്നു. പോലീസ് ഉദ്യോഗസ്ഥരോടൊപ്പം, ഫയർ ഫോഴ്സ്കാരും ബോഡി മുകളിലെത്തിക്കാനുള്ള സജ്ജീകരങ്ങളുമായി മലയിറങ്ങി താഴേക്ക് വന്നു. 

പോലീസ് ഉദ്യോഗസ്ഥർ പെട്ടെന്ന് തന്നെ സുമേഷിൻ്റെ ബോഡി കിടക്കുന്ന ഭാഗത്ത് ചുറ്റുംകയർ വലിച്ചു കെട്ടിവെച്ചു. എന്നിട്ട് ആൾക്കാരോടായി വിളിച്ചു പറഞ്ഞു. 

“ആരും ഇങ്ങോട്ട് തള്ളിക്കേറി വന്ന് ഫയർഫോഴ്സിനും ഞങ്ങൾക്കും ബുദ്ധിമുട്ടുണ്ടാക്കരുത്. ഫയർഫോഴ്സ് ഉദ്യോഗസ്ഥർക്ക് താഴെയിറങ്ങി ബോഡി മുകളിലെത്തിക്കാനുളളതാണ്.”
അതു കേട്ടപ്പോൾ ആളുകൾ മാറി നിന്നു പോലീസുകാരോടു സഹകരിച്ചു. 

സുമേഷിൻ്റെ വിവരം ആരോ നിഷയോട് പറഞ്ഞപ്പോൾ നിഷ ബോധം കെട്ടു വീണു. ആളുകളിൽ ചിലർ അവളെയെടുത്ത് റോഡിലേയ്ക്ക് ചെന്നു. അവളെയും കുട്ടികളെയും പോലീസ് ജീപ്പിൽ കയറ്റി ആശുപത്രിയിലേയ്ക്ക് കൊണ്ടുപോകുമ്പോൾ അയൽപക്കക്കാരായ ചില സ്ത്രീകളും അവളുടെ കൂടെ ആശുപത്രിയിലേയ്ക്ക് കൂട്ടു പോയി. 

ഏറെ നേരത്തെ പരിശ്രമത്തിനൊടുവിൽ ഫയർഫോഴ്സുകാർ സുമേഷിൻ്റെ ബോഡി കരയ്ക്കെത്തിച്ച ശേഷം, നാട്ടുകാരുടെ സഹായത്തോടെ മല കയറി ആംബുലൻസിൽ എത്തിച്ചു. 

പോലീസ് വണ്ടി നിഷയെയും കൊണ്ട് പോയതിനാൽ, പോലീസുകാരും ഫയർ ഫോഴ്സുകാരും ഫയർ ഫോഴ്സ് വണ്ടിയിൽ തിരിച്ച് ടൗണിലേയ്ക്ക് പോയി. അവരുടെ പുറകെ ആംബുലൻസിൽ സുമേഷിൻ്റെ ബോഡിയോടൊപ്പം അവൻ്റെ സുഹൃത്തുക്കളും മെഡിക്കൽ കോളേജിലേക്ക് പോസ്റ്റുമോർട്ടത്തിനായി അനുഗമിച്ചു. 

മലയിലുണ്ടായ രണ്ടു കുടുബത്തിലെ ദുരന്തം പെട്ടെന്ന് തന്നെ വാർത്തയായി മാധ്യമങ്ങിലും സോഷ്യൽ മീഡിയയിലും പ്രചരിച്ചു തുടങ്ങി. 

സുമേഷിൻ്റെ മരണം അപകടമരണമാണോ, അതോ കൊലപാതകമാണോ എന്നന്വേഷിക്കാനായി വീണ്ടും ഉച്ചയോടെ പോലീസ് ഉദ്യോഗസ്ഥർ അവൻ്റെ ബോഡി കണ്ടെടുത്ത സ്ഥലവും മിഷ്യൻ പുരയിലുമെല്ലാം അന്വേഷണ ഉദ്യോഗസ്ഥർ കയറിയിറങ്ങിപ്പരിശോധിച്ചു. സംശയാസ്പദമായി ഒന്നും കണ്ടെടുക്കാൻ കഴിയാതായപ്പോൾ ഉദ്യോഗസ്ഥർ അരുവിക്കരയിലേയ്ക്ക് നടന്നു. അവരുടെ പുറകെ കാമറക്കണ്ണുകളുമായി മാധ്യമങ്ങളുടെ പട തന്നെയുണ്ടായിരുന്നു. 

അവർ അവിടെയുള്ള കാഴ്ചകളോരോന്നും ഒപ്പിയെടുത്തു കൊണ്ട് സംപ്രേക്ഷണം ചെയ്തു കൊണ്ടിരുന്നു. അവരോടായി അന്വേഷന ഉദ്യോഗസ്ഥൻ പറഞ്ഞു

” സംശയാസ്പദമായി ഒന്നും തന്നെ കണ്ടെത്താൻ കഴിയാത്തത് കൊണ്ട് ഇത് ഒരു അപകട മരണമാവാനാണ് സാധ്യത. കാരണം സുമേഷും മനോജും പണിയും കഴിഞ്ഞ് വന്ന് മിഷ്യൻ പുരയിൽ ഇരുന്ന് മദ്യപിച്ചു കാണും, പിന്നെ മനോജ് യാത്ര പറഞ്ഞ് വീട്ടിലേയ്ക്ക് പോയിക്കാണും. സുമേഷ് മുഖം കഴുകാനോ മറ്റോ അരുവിയിലേയ്ക്കിറങ്ങിയപ്പോൾ കാലു വഴുതി കൊക്കയിലേയ്ക്ക് മറിഞ്ഞു വീഴാനാണ് സാധ്യത. മനോജ് ആ വിവരമറിഞ്ഞു കാണാൻ സാധ്യതയുമില്ല, അയാൾ വീട്ടിലെത്തിയപ്പോൾ അയാളുടെ ഭാര്യ ആത്മഹത്യ ചെയ്തതായിട്ടാണ് അയാൾ കാണുന്നത്. അതു കണ്ടതോടെ അയാളുടെ മാനസിക നില തെറ്റിപ്പോവുകയും ചെയ്തു. അയാളിപ്പോൾ പരസ്പര വിരുദ്ധമായി ഓരോന്ന് സംസാരിച്ചു കൊണ്ടിരിക്കുകയാണ്, അത്രയ്ക്കും വലിയ ഷോക്കാണ് അയാളുടെ മനസ്സിനേറ്റിരിക്കുന്നത്. അതിനിടയ്ക്ക് അയാളുടെ ഭാര്യയുടെ കയ്യിൽ നിന്നും പണം നഷ്ടപ്പെട്ടതായി പറയുന്നുണ്ട്. അതാർക്കു കിട്ടി എന്നതിനെപ്പറ്റി യാതൊരു അറിവുമില്ല, അത് കിട്ടിയവർ പോലീസ് സ്റ്റേഷനിൽ ഏൽപ്പിച്ചിട്ടുമില്ല. ഇനിയിപ്പോൾ ടൗണിൽ വെച്ച് തന്നെ വണ്ടിയിൽ നിന്ന് കളവുപോയതാണോ എന്ന് അന്വേഷിക്കേണ്ടതുണ്ട്.
എന്തായാലും രണ്ടു പേരുടെയും പോസ്റ്റുമോർട്ടം റിപ്പോർട്ട് കിട്ടിയാലേ കൂടുതൽ വിവരങ്ങളറിയാൻ സാധിക്കൂ, പോസ്റ്റ്മോർട്ടം റിപ്പോർട്ട് നാളെയോടെ കിട്ടും അപ്പോൾ എല്ലാ കാര്യങ്ങൾക്കും ഒരു തീരുമാനമാവും.” അദ്ദേഹം പറഞ്ഞു നിർത്തി.

അന്വേഷണ ഉദ്യോഗസ്ഥൻ്റെ വെളിപ്പെടുത്തലുകൾ അപ്പപ്പോൾത്തന്നെ മീഡിയക്കാർ ലൈവായി സംപ്രേക്ഷണം ചെയ്തു കൊണ്ടിരുന്നു. 

വൈകീട്ടാവുമ്പോഴേയ്ക്കും ധന്യയുടെ പോസ്റ്റ്മോർട്ടം റിപ്പോർട്ട് ലഭിച്ചു. അവളുടെ മരണം ആത്മഹത്യയാണെന്നു സ്ഥിരീകരിച്ചു കൊണ്ടുള്ളതായിരുന്നു, റിപ്പോർട്ട്. അവളുടെ ശരീരത്തിൽ ബലപ്രയോഗത്തിൻ്റെയോ, മനോജിൻ്റെ വീട്ടിൽ അക്രമം നടന്നതിൻ്റേയോ, ബലപ്രയോഗത്തിലൂടെ കൊന്ന ശേഷം കെട്ടിത്തൂക്കിയതിൻ്റെയോ യാതൊരു അടയാളവും കാണാൻ അന്വേഷണ ഉദ്യോഗസ്ഥർക്ക് കഴിഞ്ഞിരുന്നില്ല. 

പോസ്റ്റുമോർട്ടം കഴിഞ്ഞതോടുകൂടെ ധന്യയുടെ മൃതദേഹം ബന്ധുക്കൾക്ക് വിട്ടുകിട്ടി, രാത്രിയോടുകൂടെ അവളുടെ അന്ത്യകർമ്മങ്ങൾ നടത്തി, മൃതദേഹം ദഹിപ്പിക്കപ്പെട്ടു. അപ്പോഴും നാട്ടുകാരിൽ ചിലർ, എന്താണ് സംഭവിച്ചതെന്നറിയാതെ അവളുടെ മരണത്തിലും എന്തോ ദുരൂഹതയുള്ള പോലെ അടക്കം പറഞ്ഞു കൊണ്ടിരുന്നു. 

അന്ന് ഉച്ചയോടെ തന്നെ മനോജിനെ ആശുപത്രിയിൽ പ്രവേശിക്കപ്പെട്ടു. സ്ഥലകാല ബോധം നഷ്ടപ്പെട്ട നിലയിലുള്ള പെരുമാറ്റമായതുകൊണ്ടും പരസ്പര വിരുദ്ധമായി സംസാരിക്കുന്നതുകൊണ്ടും മനോജിനെ മെൻ്റൽ ഹോസ്പ്പിറ്റലിൽ അഡ്മിറ്റ് ചെയ്യപ്പെട്ടു. അതിൻ്റെ പിറ്റേ ദിവസമായിരുന്നു സുമേഷിൻ്റെ പോസ്റ്റ്മോർട്ടം കഴിഞ്ഞ് റിപ്പോർട്ട് പോലീസ് ഉദ്യോഗസ്ഥർക്ക് ലഭിച്ചത്. പോസ്റ്റ്മോർട്ടം റിപ്പോർട്ട് വായിച്ചു കൊണ്ട് അന്വേഷണ ഉദ്യോഗസ്ഥൻ, സ്റ്റേഷൻ റൈറ്ററോടു പറഞ്ഞു. 

“സുമേഷിൻ്റെ പോസ്റ്റുമോർട്ടം റിപ്പോർട്ടിൽ പറയുന്നത് തലയുടെ പിൻഭാഗത്തേറ്റ ക്ഷതം മൂലമാണ് മരണം സംഭവിച്ചിരിക്കുന്നത് എന്നാണ്. പിന്നെ അത്രയും ഉയരത്തിൽ നിന്നും പാറയിൽ വീണത് കൊണ്ട് ഒടിവും ചതവും ധാരളമുണ്ടുതാനും. പിന്നെ ശ്വാസകോശത്തിൽ വെള്ളത്തിൻ്റെ അംശം കാണാനില്ല. അത് സുമേഷ് താഴെയുള്ള പാറക്കെട്ടിൽ വീണപ്പോൾത്തന്നെ തലയിടിച്ചു മരിച്ചു കാണും, പിന്നീടാവാം വെള്ളത്തിലേയ്ക്ക് ഉരുണ്ടു വീണത്. അല്ലെങ്കിൽ വെള്ളമില്ലാത്ത ഭാഗത്ത് വീണ് മരിച്ച ശേഷം, പിന്നീട് രാത്രി ശക്തമായ മഴപെയ്തപ്പോൾ അതിൻ്റെ കുത്തൊഴുക്കിൽ ബോഡി ഒലിച്ച് താഴെ വെള്ളത്തിൽ കമഴ്ന്ന് വീണതുമാവാം.
എന്തായാലും ഒന്നിനും ദൃക്സാക്ഷികളും തെളിവുമില്ല. കൂടെയുണ്ടായിരുന്നു എന്നു പറയുന്നവനാണെങ്കിൽ വെളിവുമില്ല. അവൻ നോർമലായാലേ എന്താണ് സംഭവിച്ചതെന്ന് നമുക്കറിയാൻ പറ്റു. “

“അവന് ഭാര്യ മരിച്ച ഷോക്കിൽ കിളി പോയിരിക്കാണ്, ഇതിപ്പോ സ്വാഭാവിക മരണം എന്നെഴുതി കേസ് ക്ലോസ് ചെയ്യണോ, അതോ അസ്വഭാവിക മരണമെന്നെഴുതി കേസന്വേഷണം തുടരുന്നുവെന്നും, നിർണ്ണായകമായ മൊഴി തരാനുള്ള ആൾ മെൻ്റൽ പേഷ്യൻ്റ് ആയത് കൊണ്ട് അയാൾക്ക് അസുഖം മാറി, നോർമലായ ശേഷം അന്വേഷണം തുടരേണ്ടതുണ്ട് എന്നെഴുതി കേസ് ക്ലോസ് ചെയ്യണോ?”

” സ്വഭാവിക മരണമല്ലാലോ, അപകടമരണം എന്നെഴുതി കേസവസാനിപ്പിച്ചേക്ക്. ഇനിയിതിൻ്റെ പുറകെ അന്വേഷിച്ചിട്ട് എന്തു കിട്ടാനാ?”

” അങ്ങനെ അന്വേഷണം അവസാനിപ്പിക്കാൻ വരട്ടെ സാറേ” എന്നു പറഞ്ഞു കൊണ്ട് ഒരു പോലീസ് ഉദ്യോഗസ്ഥർ എസ് ഐയുടെ റൂമിലേക്ക് കയറിവന്നു എന്നതിന് ശേഷം പോസ്റ്റുമോർട്ടം റിപ്പോർട്ട് ഒന്നുകൂടെ വായിച്ച ശേഷം എസ് ഐയോട് ചോദിച്ചു. 

“അല്ല സാറേ !! സംഭവം നടന്ന ദിവസം രാത്രി സുമേഷ് മരിച്ച സമയം എട്ടുമണിയോടുകൂടെയാണെന്നാണ് പോസ്റ്റുമോർട്ടം റിപ്പോർട്ടിൽ പറഞ്ഞിരിക്കുന്നത്. പക്ഷേ അന്നേ ദിവസം തന്നെ രാത്രി ഒൻപതു മണിയോടെ സുമേഷിൻ്റെ ഫോണിലേക്ക് അയാളുടെ ഭാര്യയുടെ നമ്പറിൽ നിന്നും കോൾ ചെയ്യപ്പെട്ടിട്ടുണ്ട്. സ്വാഭാവികമായും സുമേഷ് എട്ടു മണിക്ക് മരിച്ചതാണെങ്കിൽ ഒൻപതു മണിക്ക് അയാളുടെ ഭാര്യ വിളിച്ചപ്പോൾ ആദ്യ ഫോൺ കോൾ മിസ്ഡ് കോളായിട്ടാണ് ഡ്യൂറേഷൻ രേഖപ്പെടുത്തിയിരിക്കുന്നത്. പക്ഷേ അവരുടെ ഫോണിൽ നിന്നും വീണ്ടും വിളിച്ചപ്പോൾ മൂന്നു സെക്കൻറിൽ ആ ഫോൺ കോൾ ആരോ കട്ടു ചെയ്തിട്ടുണ്ട്. ദേ, ഈ പേപ്പർ ഞാനിപ്പോ സൈബർ സെല്ലിൽ നിന്നുള്ള റിപ്പോർട്ട് ഡൗൺലോഡ് ചെയ്തെടുത്തതാ, അപ്പോൾ ആ ഫോൺ കോൾ കട്ടു ചെയ്തത് ആരാ?”

” ങ്ഹേ, അങ്ങനെയുണ്ടോ” എന്നു ചോദിച്ചു കൊണ്ട് എസ് ഐ സീറ്റിൽ നിന്നും ചാടിയെന്നേറ്റു. എന്നിട്ട് പോലിസുകാരൻ്റെ കയ്യിലെ പേപ്പർ വാങ്ങി നോക്കി വായിച്ചു കഴിഞ്ഞ ശേഷം പറഞ്ഞു. 

“എങ്കിൽ അസ്വഭാവിക മരണമാണെന്നും കേസന്വേഷണം തുടരുന്നു എന്നും എഴുതിക്കോ, മെൻ്റൽ ഹോസ്പിറ്റലിലെ ഡോക്ടറുടെ നിർദ്ദേശപ്രകാരം ഇനി അന്വേഷണം തുടരാം, കാരണം ഇപ്പോഴവന് ബോധമില്ല, അവൻ്റെ സമനില ശരിയാവട്ടെ. അതുവരെ നമുക്ക് കാത്തിരിക്കാം. ഇല്ലെങ്കിൽ അവൻ കൊന്നതാണെങ്കിലും കോടതിയിൽ നിന്നും മാനസിക രോഗി എന്നുള്ള പരിഗണനയിൽ ശിക്ഷയിൽ നിന്നും ഊരിപ്പോവും. ഇടയ്ക്ക് പോയി ആശുപത്രിയിലെ ഡോക്ടറുടെ അനുവാദത്തോടെ അവനെ ചോദ്യം ചെയ്യണം എന്തെങ്കിലും തുമ്പു കിട്ടാതിരിക്കില്ല.” എസ് ഐ പറഞ്ഞു നിർത്തി. 

സുമേഷിൻ്റെ ബോഡിയും പോസ്റ്റുമോട്ടത്തിനു ശേഷം വിട്ടു കിട്ടിയപ്പോൾ യഥാവിധി അന്ത്യകർമ്മങ്ങളോടെ അടക്കം ചെയ്തു. തളർന്നു കരഞ്ഞ് ബോധം പോയ നിഷയെ എന്തു പറഞ്ഞു സമാധാനിപ്പിക്കണമെന്നറിയാതെ അവളുടെ ബന്ധുക്കളും നാട്ടുകാരും നന്നേ വിഷമിച്ചു. അച്ഛൻ കൊണ്ടുവരുന്ന മിൽക്കീ ബാറും പ്രതീക്ഷിച്ച് സുമേഷിൻ്റെ കുഞ്ഞ് മുറ്റത്തു കൂടെ ഓടിക്കളിച്ചു കൊണ്ടിരുന്നു. 

ആശുപത്രിയിൽ അഡ്മിറ്റ് ചെയ്ത മനോജിൻ്റെ അസുഖത്തിൽ കാര്യമായ മാറ്റമൊന്നും ഇല്ലാത്തതിനാൽ മനോജിൻ്റെ പേരിൽ കേസു ചാർജ് ചെയ്യാനോ, കോടതിയിൽ കുറ്റപത്രം സമർപ്പിക്കാനോ പോലീസിനു കഴിഞ്ഞില്ല. സുമേഷിൻ്റെ മരണം, അപകട മരണമോ, കൊലപാതകമോ എന്ന കാര്യത്തിൽ ഉറപ്പുവരുത്താനാവാതെ കേസ് അനന്തമായി നീണ്ടുപോയി. മാസങ്ങൾ കഴിയവേ ധന്യയെയും സുമേഷിനെയും അവരെപ്പറ്റിയുള്ള വാർത്തകളും ജനങ്ങളും, പോലീസും മറന്നു. ഓരോ കമ്മീഷണർ മാറി, മാറി വരുമ്പോഴും പെൻഡിംഗ് കേസുകളിൽ തീരുമാനമെടുക്കാനുള്ള ഉത്തരവ് വരും. അപ്പോഴൊക്കെയും വീണ്ടും സുമേഷിൻ്റെ കേസുമായി ബന്ധപ്പെട്ട് പോലീസ് മെൻ്റൽ ഹോസ്പിറ്റലുമായി ബന്ധപ്പെടും. അപ്പോഴൊക്കെയും ഭ്രാന്തമായി അലറിക്കൊണ്ടിരിക്കുന്ന മനോജിൻ്റെ അവസ്ഥ കണ്ട് പോലീസുകാർ തിരിച്ചു പോവും

പിന്നീട് ഒന്നുരണ്ടു വർഷങ്ങളോളമുള്ള ചികിത്സയ്ക്കൊടുവിൽ മനോജിൻ്റെ മനോനിലയിൽ മാറ്റം വന്നു കൊണ്ടിരുന്നു, അസുഖം പൂർണ്ണമായി ഭേദപ്പെട്ടു എന്ന റിപ്പോർട്ട് കിട്ടിയതോടെ മനോജിനെ പോലീസ് അറസ്റ്റു ചെയ്തു കോടതിയിൽ ഹാജരാക്കി. കോടതി റിമാൻ്റ് ചെയ്ത മനോജ് ജയിലിലായി. വീണ്ടും കുറേ വർഷങ്ങൾ കോടതി നടപടിയുമായി കടന്നുപോയി. ദൃക്സാക്ഷികളോ, സാഹചര്യത്തെളിവുകളോ ഇല്ലാത്തതിനാലും, മനോജിന് പലകാര്യങ്ങളുംഓർമ്മയില്ലാത്തതിനാലും
സംശയത്തിൻ്റെ ആനുകൂല്യത്തിൽ മനോജിനെ കോടതി വെറുതേ വിട്ടു. 

ജയിലിൽ നിന്നിറങ്ങിയ മനോജ് നേരെ പോയത്, മിഷ്യൻ പുരയിലേയ്ക്കാ
യിരുന്നു.. അറിയാതെ സംഭവിച്ചു പോയ കൈപ്പിഴവിൽ നഷ്ടപ്പെട്ടുപോയ കൂട്ടുകാരനെയോർത്തവൻ നെഞ്ചു പൊട്ടിക്കരഞ്ഞു. കൊല്ലണമെന്നുവിചാരിച്ചു ചെയ്തതായിരുന്നില്ലയെങ്കിലും, തലയ്ക്കു പിടിച്ച മദ്യ ലഹരിയിലും കുട്ടികളില്ലാത്ത തനിക്ക് കുട്ടികൾ വേണമെന്ന വിചാരത്താലും പണം കിട്ടിയാൽ തനിക്കൊരു ജീവിതമുണ്ടാകുമെന്ന ചിന്തയിലും അപ്പോൾ അബദ്ധത്തിൽ ചെയ്തു പോയതായിരുന്നു. ഒരിക്കലും സംഭവിക്കാൻ പാടില്ലാത്തത് സംഭവിച്ചു പോയിരിക്കുന്നു. ഇനിയത് ഒരിക്കലും തിരിച്ചു പിടിക്കാനുമാവില്ല, ഓരോന്നോർത്തു കരഞ്ഞു കൊണ്ട് അവനെത്ര നേരം അവിടെയിരുന്നുവെന്നറിയില്ല. 

പിന്നീടവനെഴുന്നേറ്റ് നേരെ സുമേഷിൻ്റെ വീട്ടിലേയ്ക്ക് നടന്നു. അപരിചിതനായ ഒരാൾ വീട്ടിലേയ്ക്ക് കയറി വരുന്നത് കണ്ടപ്പോൾ മുറ്റത്ത് നിന്നു കളിക്കുകയായിരുന്ന കുട്ടികൾ ഒരേ സ്വരത്തിൽ അകത്തേയ്ക്ക് നോക്കി വിളിച്ചു പറഞ്ഞു. 

” അമ്മേ, ദേ, ആരോ വന്നിരിക്കുന്നു. “

ആരാണെന്നു നോക്കാനായി ഉമ്മറത്തേയ്ക്കിറങ്ങി വന്ന നിഷ, മനോജിനെ കണ്ടപ്പോൾ ഞെട്ടിപ്പുറകോട്ടു മാറി ചുമരിൽ പിടിച്ചു നിന്നു. എന്നതിനു ശേഷം കരഞ്ഞു കൊണ്ട് ചോദിച്ചു. 

” മനോജേട്ടാ, ങ്ള് സത്യം പറ, സുമേഷേട്ടന് അന്ന് എന്താ പറ്റിയേ?” 

മുറ്റത്ത് കളിച്ചു കൊണ്ടിരിക്കുന്ന അഞ്ചുവയസ്സുകാരിയെ എടുത്തുയർത്തി കവിളിൽ ഉമ്മ വെച്ചു കൊണ്ട് മനോജ് പറഞ്ഞു. 

“എനിക്കറിയില്ല നിഷേ, ഞങ്ങളന്ന് നല്ലോണം കുടിച്ചിരുന്നു. പിന്നീട് ഞാൻ വീട്ടിലേക്ക് പോയി. വീട്ടിൽ ചെന്നപ്പോഴുള്ള അവസ്ഥ നീ കണ്ടതല്ലേ, പിന്നീടൊന്നും എനിക്കോർമ്മയില്ല. “

“നിങ്ങള് ശരിക്കുമൊന്ന് ഓർത്തു നോക്ക് മനോജേട്ടാ, നിങ്ങളോട് എന്തേലും കയ്യബദ്ധം സംഭവിച്ച് പോയിരുന്നോ?”

” ഇല്ല നിഷേ, എനിക്കൊന്നും ഓർമ്മയില്ല. അത്രയും പറഞ്ഞ് മനോജ് തൻ്റെ കയ്യിലുള്ള കവറെടുത്ത് സുമേഷിൻ്റെ മൂത്ത മകൻ്റെ കയ്യിൽ കൊടുത്തു കൊണ്ട് നിഷയോടായി
പറഞ്ഞു. 

” ഇത്രയും കാലം ജയിലിൽ പണി ചെയ്ത് കിട്ടിയ പണമാണ്, ഇത് നിങ്ങൾക്കിരിക്കട്ടെ. “

പിന്നീടവൻ മടിക്കുത്തിൽ നിന്നും രണ്ടു മിൽക്കീബാറെടുത്ത് കുട്ടികൾക്ക് നേരെ നീട്ടി. അതു കണ്ടപ്പോൾ കുട്ടികൾ രണ്ടു പേരുമത് വാങ്ങി കവറ് പൊട്ടിച്ച് നുണയാൻ തുടങ്ങി. നിറഞ്ഞു വന്ന കണ്ണുകളോടെ മനോജ് അത് നോക്കി നിന്നു. 

പിറ്റേന്ന് രാവിലെ ബാങ്ക് തുറന്നപ്പോൾ തന്നെ മനോജ് ബാങ്കിലെത്തി. ധന്യയും നിഷയും കൂടെ എടുത്ത ലോണ് എത്രയെന്ന് കണക്കുകൂട്ടി തരാൻ പറഞ്ഞ ശേഷം കയ്യിലുള്ള മൂന്നു ലക്ഷം രൂപ അവിടെ ലോണിലേയ്ക്ക് അടച്ചു. പിന്നീടു വരുന്ന സംഖ്യ കുറേശ്ശെയായി താൻ അടച്ചോെളാമെന്ന് പറഞ്ഞ ശേഷമവൻ ടൗണിലേയ്ക്ക് നടന്നു. 

അവൻ പണിക്കു പൊയ്ക്കൊണ്ടിരുന്ന മേസ്തിരിയെ കണ്ട് നാളെ മുതൽ താൻ പണിക്ക് വരുന്നുണ്ടെന്നറിയിച്ചു. 

പിറ്റേന്നു മുതൽ അവൻ പണിക്കു പോയിത്തുടങ്ങി. പണി കഴിഞ്ഞ ശേഷം രണ്ടു മൽക്കീബാറും വാങ്ങിയവൻ നേരെ സുമേഷിൻ്റെ വീട്ടിൽ ചെന്നു. ഉമ്മറത്തിരുന്നു പഠിക്കുകയായിരുന്ന കുട്ടികളുടെ കയ്യിലേയ്ക്ക് മിൽക്കീബാർ കൊടുത്തു കൊണ്ട് നിഷയെ വിളിച്ചു

ഉമ്മറത്ത് വന്ന നിഷ അവനെ കണ്ടപ്പോൾ ചോദിച്ചു. 

“എന്താ മനോജേട്ടാ, 

അവനതിനു മറുപടിയൊന്നും പറയാതെ കയ്യിലിരുന്ന പണിക്കൂലിയെടുത്ത് അവളുടെ കയ്യിൽ വെച്ചു കൊടുത്തു. പിന്നീട് ഒന്നും മിണ്ടാതെ നിറഞ്ഞു വന്ന കണ്ണുകൾ തുടച്ചു കൊണ്ട് തിരിഞ്ഞു നടന്നു. 

പിന്നീടുള്ള എല്ലാ ദിവസവും മനോജ് പണികഴിഞ്ഞ് വീട്ടിലേയ്ക്ക് പോകുമ്പോൾ സുമേഷിൻ്റെ വീട്ടിൽ കയറി രണ്ടു മിൽക്കീ ബാറും പണിക്കൂലിൽ നിന്നൊരു സംഖ്യയും അവർക്ക് കൊടുക്കും. 

അപ്പോൾ നിഷ ചോദിക്കും, 

“എന്തിനാണ് മനോജേട്ടാ ഇങ്ങനെയൊക്കെ, 

അതിനു മറുപടി പറയാതെവൻ നിറഞ്ഞു വരുന്ന കണ്ണുകൾ തുടച്ചു കൊണ്ട് തിരിഞ്ഞു നടക്കും. 

✍️ഷിജിത് പേരാമ്പ്ര