അഗ്നിപരീക്ഷ വിധിച്ച രാമനോ
വസ്ത്രാക്ഷേപം ചെയ്ത ദുശ്ശാസനനോ,
ശസ്ത്രവീര്യത്താൽ വരിച്ച അർജ്ജുനനോ ,
ഐവർക്കു പകുത്ത വാക്കുധർമ്മമോ,
സോദരധർമ്മം പാലിച്ച ലക്ഷ്മണനോ
ഹരണം ചെയ്ത രാവണനോ,
അധർമ്മങ്ങൾക്കുനേരെ കണ്ണുകെട്ടിയ ഗാന്ധാരിയോ
ഇതിഹാസങ്ങളിൽ കണ്ണീർഗാഥയായി രചിച്ചു പെണ്മയെ,
മണ്ണും പെണ്ണും കീഴ്പ്പെടുത്തലിന്റെ മുഷ്ടികളിലമരുമ്പോൾ,
ഏതേതുരൂപങ്ങളിൽ ക്രൗര്യത നടമാടുന്നീ ലോകത്തിൽ,
മാതൃകകൾ പോലും വികലമാവുമ്പോൾ,
സ്ത്രീത്വം തൃണതുല്യമാവുമ്പോൾ ,
അധികാരം കണ്ണടയ്ക്കുമ്പോൾ ,
അബലയെന്നു മുദ്ര കുത്തും പ്രബലർ തൻ കാലഹരണപ്പെട്ട കാഴ്ച്ചപ്പാടുകളിൽ,
സുരക്ഷയും അതിജീവനവും ജലരേഖയാവുന്നുവോ..
ആധാരശിലയാം പെണ്മയ്ക്കു വിലയിടാൻ അധികാരം നൽകിയ കൈകളേതോ,
അവളെന്നതവനു സമമല്ലെന്നാരു ചൊല്ലി ,
അവനിയിൽ ലിംഗഭേദത്തിനു ഉടമയും അടിമയും ഭാവം പകർന്നതാരോ,
സുരക്ഷയെന്ന കാൽവിലങ്ങിൽ
അതിരുകളുടെ കളം വരച്ചതാരോ,
ചുറ്റും ചൂഴ്ന്നു നിൽക്കും ചങ്ങലക്കെട്ടുകൾക്കിടയിലുമവൾ സുരക്ഷിതയോ,
എത്രമേൽ ഭയക്കണം പിറക്കുമോരോ ജീവനും
നാളെയേതു കരാളഹസ്തങ്ങൾ പിടിമുറുക്കുമെൻ ജീവിതത്തിൽ,
എന്നതോർത്തെത്ര ഭീതിദമാം ഇരവുപകലുകൾ താണ്ടണം,
ഉരുവാകും പെൺജീവനെ പിഴുതെറിഞ്ഞും
ഉയിരെടുത്തതിന്റെ ഇളംനാമ്പുകൾ നുള്ളിയും,
അരുതുകളുടെ കാരാഗൃഹത്തിലടച്ചും
അധീശത്വത്താൽ അധിനിവേശം ചെയ്തും
ഉന്മൂലനം ചെയ്യപ്പെടുമീ ലോകത്തിൽ,
പ്രതിരോധത്തിൻ കവചമണിഞ്ഞൊരു പോരാട്ടത്തിൻ ഗാഥ രചിക്കാൻ
അണിചേരുക വിളംബം കൂടാതോരോ നൽചിന്തകരും..
***നിഷിബ എം നിഷി ***
5 Comments
Beautiful lines 👍
👌👌👌😍
👌👌
👌👌❤️
സ്നേഹം 😍