ജീവിതത്തിൽ നല്ലതും, ചീത്തയുമുണ്ട്.
കയ്പ്പും , മധുരവുമുണ്ട്.
രാവും ,പകലുമുണ്ട്.
വേനലും, ശൈത്യവുമുണ്ട്.
ജീവിതം അങ്ങിനെയാണ്.
അത് നിറയെ അനുഭവങ്ങളാണ്…
സാധ്യമാകുന്ന എല്ലാ രീതിയിലും അതിനെ അടുത്തറിയണം… അനുഭവിക്കണം…
അനുഭവങ്ങളെ ഒരിക്കലും ഭയപ്പെടരുത്. ഭയത്താൽ നയിക്കപ്പെടരുത്.
കൗതുകം സന്തോഷം അതുമല്ലെങ്കിൽ ചില നിമിഷങ്ങളോടുള്ള തോന്നുന്ന ഇഷ്ടം ചിലതിനോടുള്ള മോഹം ഇതൊക്കെയാണ് പല പൊള്ളുന്ന സത്യങ്ങളിലും കാൽ തെറ്റി വീണുപോകുമ്പോഴും നമ്മെ മുന്നോട്ട് നയിക്കുന്ന കാരണങ്ങൾ. മനസ്സിന്റെയും ചിന്തകളുടെയും സ്വപ്നങ്ങളുടെയും സ്വാതന്ത്ര്യം അറിഞ്ഞവർക്ക് മാത്രമേ ജീവിതവും, സൗഹൃദവും, പ്രണയവും, കാമവും, സർഗ്ഗാത്മകതയും ശരിയായി അനുഭവിക്കുവാൻ കഴിയൂ. അവർക്ക് മാത്രമേ സ്വന്തം മനസ്സിനെ തിരിച്ചറിയുവാൻ കഴിയൂ. സ്വതന്ത്രമായ മനസ്സും, ചിന്തകളും, ശരീരവുമുള്ളവർക്ക് മാത്രമേ സത്യത്തിന്റെയും പരമാനന്ദത്തിന്റെയും പ്രണയത്തിന്റെയും, പ്രതാപത്തിന്റെയും, ഭംഗിയുടെയുമൊക്കെ ഹിമാലയ സമാനമായ അവസ്ഥകൾ മനസ്സിലാവൂ.
കാലേകൂട്ടിയുള്ള തീരുമാനങ്ങൾ ഇല്ലാതെ തികച്ചും അപ്രതീക്ഷിതമായി ജീവിതത്തെ സമീപിക്കുന്നതിൽ ഒരു പ്രത്യേക ഭംഗിയുണ്ട്. അപ്പോഴൊക്കെ ജീവിതത്തിനു ഒരു പുതുമയും യുവത്വവുമുണ്ട്. ഒരു ഒഴുക്കുണ്ട് അതിന്. ഒട്ടേറെ ഭംഗിയുള്ള, ആശ്ചര്യം നിറഞ്ഞ നിമിഷങ്ങൾ നമുക്ക് മുന്നിലേക്ക് നീക്കി വയ്ക്കപ്പെടാൻ ഉണ്ടാവും.
വെറുതെ ഇരുന്നതുകൊണ്ടായില്ല. മലമറിക്കണം എന്നല്ല പറഞ്ഞു വരുന്നത്. എന്നാൽ മനസ്സ് കൊണ്ട് സാഹസികരാകണം. മനസ്സിന്റെ സാഹസികതകൾ
നഷ്ടപ്പെടുത്തുവാനുള്ളതല്ല. നമ്മൾ സാഹസികരാകുന്നതിന്റെ പേരിൽ പ്രത്യേകിച്ചൊന്നും നഷ്ടപ്പെടുവാനുമില്ല. അത്ര സുഖമുള്ള വഴികളാണ് സാഹസങ്ങൾ നിറഞ്ഞത് എന്നല്ല പറയുന്നത്. പക്ഷെ ചിന്തകൾ, സ്വപ്നങ്ങൾ, ഓർമ്മകൾ, സങ്കല്പങ്ങൾ എന്നിവയിൽ കൂടി നമ്മൾ അവിടെ വളരുകയാണ്. സ്വത്വത്തിന്റെ (Soul) സ്വാഭാവികമായ വളർച്ചയാണ് അത്.
നമ്മളെ എടുത്തങ്ങ് ലയിപ്പിച്ചു കളയുന്ന കാവ്യാത്മകമായ രീതികളുണ്ട് ജീവിതത്തിൽ. അനുഭൂതികളും അനുഭവങ്ങളും പലവിധമായ വികാരങ്ങളും എല്ലാം ഒഴുകി വന്ന് മനസ്സിനോട് ഒട്ടുന്ന നേരങ്ങളാണ് അതൊക്കെ. സ്വയം നിർവചിച്ച ജീവിത വഴികളോട് അറിയാതലിഞ്ഞു കീഴ്പ്പെട്ടു പോകുന്ന അവസ്ഥ. . മനസ്സിന്റെ ഇഷ്ടങ്ങൾക്ക് കാതോർത്തു വീണ്ടും ആഴങ്ങളിലേക്ക് ഇറങ്ങി ഇറങ്ങി ചെല്ലുമ്പോൾ അവിടെ ആത്മാവിന്റെ ഇടപെടൽ ഉണ്ടാകും പകരം വെക്കുവാനില്ലാത്തതെന്ന് നമ്മളെക്കൊണ്ടു തോന്നിപ്പിക്കുന്ന ആത്മ ബന്ധങ്ങൾ…അപ്പോൾ
മനസ്സിന്റെ ജാലകങ്ങൾ അദ്ഭുതങ്ങളിലേക്ക് നമ്മളെ എത്തിക്കും.
