വെറുതെ കയ്യിൽ വെച്ചാൽ ഇന്ന് നാളെ എന്ന് പറഞ്ഞു അതങ്ങ് തീരും….
എന്നായാലും വേണ്ടതല്ലേ….
ദിനമേറും തോറും വിലയും ഏറും…
മക്കളും വലുതാകുകയല്ലേ…
ആ വർത്തമാനത്തിൽ കാര്യമില്ലാതില്ല
ഒടുവിൽ… അല്ല…ആദ്യത്തിൽ
കുഞ്ഞാനശാരി വന്നു കുറ്റിയടിച്ചു..
ജെ സി ബി വന്നു തറ കീറി..
മുസ്ലിയാർ വന്നു തറക്കല്ലിട്ടു…
കല്ല് വന്നു മണ്ണ് വന്നു സിമന്റ് വന്നു
പിന്നെ പണിക്കാർ വന്നു….
പണി കഴിഞ്ഞ തറയിൽ താടിക്ക് കയ്യും കൊടുത്ത്….
അന്തവും കുന്തവുമില്ലാതിരിക്കുമ്പോൾ..
മറ്റൊരസ്ത്രം കാതിൽ തറച്ചു…
ഇതിങ്ങനെ ഇട്ടാൽ മതിയോ…
കൊല്ലം രണ്ടു കഴിഞ്ഞില്ലേ…
പാളി നോക്കിയത് പെണ്ണുംമ്പിള്ളയുടെ…
കൈ തണ്ടയിലേക്കായിരുന്നു….
നോക്കണ്ട ബാങ്കിലാ…
….ഹേയ് അതല്ല
കയ്യിലെന്തോ കരി പോലെ….
ഒരു മഴയും വെയിലും തറ കൊള്ളണം..
അത് നിയമം…
കൂടുതൽ കൊണ്ടാലിപ്പോ എന്താ…
മുട്ടു ചോദ്യത്തിന് മുറു മുറുപ്പ് മറുപടി..
പിന്നെ മരവും കല്ലും കടവും ഒരുമിച്ചു വന്നു…
വീട് വളർന്നു… കടവും…
ഒരിടത്തു സന്തോഷം സംതൃപ്തി…
മറ്റൊരിടത്തു ആധിയും വ്യാധിയും…
മക്കൾക്ക് വേണ്ടി വീട് വെച്ചു…
മക്കൾ വേറെ വീട് വെച്ചു…
ആരവമില്ല ആളുകളില്ല…
ഭിത്തിയിലെ പല്ലി…
കൊഞ്ഞനം കാട്ടി ചിരിച്ചു…
തൂങ്ങിയാടുന്ന ഘടികാര പൽചക്രം പിന്നെയും കറക്കം തുടർന്നു…
അടുത്ത തലമുറയെയും കാത്ത്….
