പ്രണയത്തിൽ നാം ചെയ്യുന്ന ഏറ്റവും വലിയ തെറ്റുകളിൽ ഒന്ന് എന്താണെന്നോ?
അവർക്കായി നമ്മളെത്തന്നെ മാറ്റാൻ ശ്രമിക്കുന്നത്, നമ്മളെത്തന്നെ മറക്കുന്നത്!
ഉദാ: അവർ ക്രിക്കറ്റ് പ്രേമിയാണെങ്കിൽ, മറ്റുള്ളവരോട് ക്രിക്കറ്റിനെപ്പറ്റി വാ തോരാതെ സംസാരിക്കുന്നത് കാണുമ്പോൾ, നമുക്കും തോന്നും ക്രിക്കറ്റിനെപ്പറ്റി പഠിച്ചെങ്കിലും അവരോടു സംസാരിച്ചാൽ അവർക്ക് നമ്മളോടുള്ള ഇഷ്ടം കൂടുമെന്ന്. പക്ഷെ ഇഷ്ടപ്പെടാത്ത കാര്യങ്ങൾ ചെയ്യുന്നത് സന്തോഷത്തെ നശിപ്പിക്കും, നമ്മളെ അസ്വസ്ഥരാക്കും. കൃത്രിമമായി ആരെയെങ്കിലും ആകർഷിക്കാൻ/പ്രീതിപ്പെടുത്താൻ ശ്രമിക്കുമ്പോൾ അത് അധികകാലം നിലനിൽക്കില്ല. കാരണം നമ്മൾ അല്ലാത്ത ആരെയോ അഭിനയിക്കുന്നത് അത്ര എളുപ്പമല്ല. ഒരിക്കൽ സത്യം പുറത്തുവരുമ്പോൾ, ബന്ധം തകർന്നുപോകാൻ സാധ്യതയുണ്ട്.
ഒരാൾക്ക് പല കാര്യങ്ങളോടും താൽപ്പര്യം ഉണ്ടായിരിക്കും എന്നത് സ്വാഭാവികമാണ്. അതേ കാര്യങ്ങളോട് നമുക്കും ഇഷ്ടം ഉണ്ടെങ്കിലേ, നമ്മൾ തമ്മിൽ “സെറ്റ്” ആവൂ എന്ന് വിചാരിക്കേണ്ടതില്ല.. opposites attract എന്ന് പറയാറില്ലേ? അതുപോലെ, ചിലപ്പോൾ നമുക്ക് ഇഷ്ടമുള്ള മറ്റ് കാര്യങ്ങൾ അവർക്ക് പുതുമ ആയിരിക്കാം.
അവരെ ആകർഷിക്കുന്നത് നമ്മുടെ വ്യത്യസ്തതകളാണ്. നമ്മൾ എല്ലാവരും ഒരേപോലെയാണെങ്കിൽ, പ്രണയത്തിന് പിന്നെന്തർത്ഥം? അത് കൊണ്ട് സ്വയം മാറ്റാൻ ശ്രമിക്കേണ്ട ആവശ്യമില്ല. ഇപ്പോഴുള്ള നിങ്ങളെയാണ് അവരിഷ്ടപ്പെട്ടത് എന്നത് മനസിലാക്കുക.
ഒരു ബന്ധം എന്നത് രണ്ട് പൂർണ്ണ വ്യക്തികളുടെ ഒന്നിച്ചുള്ള ജീവിതമാണ്. സ്വത്വം നിലനിർത്തുകയും അന്യോന്യം സ്വീകരിക്കുകയും ചെയ്യുക എന്നതാണ് പ്രധാനം. പരസ്പരം ബഹുമാനിക്കുക, പരസ്പരം പഠിക്കുക. നിങ്ങളായിരിക്കുക; താൽപ്പര്യങ്ങളും അഭിപ്രായങ്ങളും അനിഷ്ടങ്ങളും തുറന്നു പറയുക.
