🌹പ്രണയനിഴലുകൾ 7🌹

Part 1 മുതൽ വായിക്കൂ..

Part 7 (തുടർക്കഥ )

 

“സാരമില്ല പാട്ടീ, ഞാനിങ്ങുവന്നില്ലേ. ഇവിടുന്ന് തിരിച്ച് പോവുമ്പോ പാട്ടിയും കൂടെ വരണം കൂട്ടികൊണ്ടുപോവാനാ ഞാൻ വന്നത്. “

 

“എന്തായാലും മാംഗല്യചടങ്ങുകളൊക്കെ കഴിയട്ടെ എന്നിട്ട് പോവാം മോനെ. “

 

“അതത്രയേ ഉള്ളു. ഒരാഴ്ച ഞാനിവിടെ ഉണ്ടാവും. എന്റെ കാൽമുട്ടിനു വേദനയുണ്ട്. ശരിക്കും നടക്കാൻ കഴിയുന്നില്ല. നീർ കെട്ടുണ്ട്ന്ന് തോന്നുന്നു. “

 

“നീ അകത്തേയ്ക്ക് വാ  നിന്നെ കാണാനൊരാള് കാത്തിരിയ്ക്കാണ് ”

 

“ആര് സ്വാതിയോ, അവരൊക്കെ വന്നോ?”

 

“ഓ, അവരൊക്കെ രാവിലെ തന്നെ എത്തി. “

 

“അവരെയൊക്കെ പിന്നെ കാണാം പാട്ടീ, എനിക്ക് പാട്ടിയോട് ഒരു കാര്യം പറയാനുണ്ട്. തിരക്ക് കഴിയട്ടെ പിന്നെ പറയാം. “

 

പാട്ടിയുടെ കൂടെ എല്ലാരും അകത്തേയ്ക്ക് നടന്നു. ഉമ്മറത്ത് തന്നെ കാത്തുനിൽക്കുന്ന സ്വാതിയോട് കുശലം പറഞ്ഞ് മഹേഷ് അകത്തേക്ക് നടന്നു. വീടും പരിസരവും നിറയെ ആളുകൾ. മുറ്റത്ത് കൂടെ ഓടി കളിയ്ക്കുന്ന കുട്ടികൾ ‘എങ്ങും സന്തോഷവും ചിരിയും കളിയും. കൂടെ അനീറ്റയുണ്ടായിരുന്നെങ്കിൽ. അവൻ ഓർത്തു. 

 

അന്ന് രാത്രി അനീറ്റ അവനെ വിളിച്ചു. 

 

“മഹീ.. അവിടെ എത്തിയോ?”

 

“പിന്നേ.. ഞങ്ങള് രാവിലെ തന്നെ എത്തി. 

നീയെന്താ വിളിച്ചത്.. “

 

“ഒന്നൂല്ല വെറുതേ.. നീ അവളെ കണ്ടോ?”

 

“ആരെയാ. അനീറ്റാ” അവൻ ചോദിച്ചു. 

 

ഓ.. അറിയാത്ത പോലെ. സ്വാതിയെ”

 

“ആഹാ അതറിയാനാണോ വിളിച്ചത്. 

കണ്ടു സംസാരിച്ചു. ഒന്നിച്ചിരുന്നു ഭക്ഷണം കഴിച്ചു. എന്തേയ്?”

 

“ഒന്നുമില്ല”, പെട്ടെന്നവൾ ഫോൺ കട്ടാക്കി. കണ്ണുകൾ നിറഞ്ഞുവരുന്നതവളറിഞ്ഞു. തന്റെ കല്യാണം ഉറപ്പിച്ചു. പക്ഷേ മഹി അവളെ കണ്ടു, ഒന്നിച്ചിരുന്നു, എന്നൊക്കെ അറിഞ്ഞപ്പോൾ അനീറ്റയ്ക്ക് എന്തു കൊണ്ടോ സഹിയ്ക്കാൻ കഴിഞ്ഞില്ല. 

 

പെട്ടെന്ന് അനീറ്റയുടെ ഫോണിൽ മഹേഷിന്റെ കോൾ വന്നു. 

 

കോൾ എടുത്ത് അനീറ്റ മിണ്ടാതിരുന്നു. 

 

“ഹലോ അനീറ്റാ, നീയെന്താ മിണ്ടാത്തത്?”

 

“ഒന്നുമില്ല മഹീ പറഞ്ഞോളു ഞാൻ കേൾക്കുന്നുണ്ട്.” ഇവരുടെ സംസാരത്തിനിടയ്ക്ക് അനീറ്റയുടെ ഫോണിലേക്ക് ക്രിസ്റ്റിയുടെ നമ്പർ തെളിഞ്ഞു വന്നു. 

 

മഹി പറഞ്ഞ് തീരുന്നതവരെ അനീറ്റ ക്രിസ്റ്റിയുടെ കോൾ എടുത്തില്ല. 

 

“ഞാനവളെ കണ്ടു എന്നല്ലാതെ സംസാരിച്ചൊന്നുമില്ല അനീറ്റാ. നിന്നെ വെറുതേ ദേഷ്യം പിടിപ്പിക്കാൻ പറഞ്ഞതാണ്.” അവൻ ചിരിച്ചു കൊണ്ട് പറഞ്ഞു. പിന്നെ നിന്റെ വിവാഹം കഴിയാതെ എന്റെ കാര്യത്തിൽ ഒരു തീരുമാനം ഞാൻ എടുക്കില്ല. 

 

അനീറ്റയുടെ ഫോണിൽ ബീപ്.,, ബീപ് ശബ്ദം കേട്ടുകൊണ്ടിരുന്നു. 

 

“എനിക്ക് മറ്റൊരു കോൾ വരുന്നുണ്ട് മഹീ ഞാൻ വെയ്ക്കാണ് പിന്നെ വിളിക്കാം കേട്ടോ.” അവൾ കോൾ കട്ടാക്കിയതും ക്രിസ്റ്റിയുടെ നമ്പർ തെളിഞ്ഞു കണ്ടു പെട്ടെന്നവൾ കോൾ അറ്റൻഡ് ചെയ്തു. 

 

കോൾ കണക്ടായപ്പോൾ തന്നെ  ആദ്യം കേട്ടത് ക്രിസ്റ്റിയുടെ തെറിവിളിയാണ്, പെട്ടെന്ന് തന്നെ അനീറ്റ  കോൾ റെക്കോർഡ് ബട്ടൺ അമർത്തി. 

 

“നിനക്കെന്താടി ഫോൺ എടുക്കാൻ ഇത്ര താമസം. കുറേ നേരമായല്ലോ ശൃംഗാരം, ആരോടാണ് പഴയ ബന്ധം വല്ലതും ആണെങ്കിൽ നിർത്തിക്കോ”, അവൻ പിന്നേയും എന്തൊക്കെയോ പറഞ്ഞു കൊണ്ടിരുന്നു. അനീറ്റ ഒരക്ഷരം മറുപടി പറഞ്ഞില്ല’. എല്ലാം കേട്ട് കഴിഞ്ഞപ്പോൾ അവൾ ക്രിസ്റ്റിയോടായി പറഞ്ഞു. 

 

“ക്രിസ്റ്റീ, നമ്മുടെ വിവാഹം ഉറപ്പിച്ചിട്ടേ ഉള്ളൂ. സ്കൂൾ കാലഘട്ടം മുതലുള്ള ഫ്രണ്ട്സും മറ്റും ഉണ്ടെനിക്ക്. പിന്നെ എന്റെ വർക്കിന്റെ ആവശ്യത്തിന് വേണ്ടിയും എനിക്ക് പലരെയും ഫോൺ വിളിക്കേണ്ടിവരും. “

 

“അതൊന്നും എനിയ്ക്കറിയണ്ട.. ഞാൻ വിളിയ്ക്കുമ്പോൾ എനിക്ക് നിന്നെ കിട്ടിയിരിയ്ക്കണം അങ്ങനെ വിളിയ്ക്കാനുളളവരെ പകൽ വിളിച്ചോളണം. “

 

“ബുദ്ധിമുട്ടാണ് ക്രിസ്റ്റി, പലരും ഫ്രീയാവുന്നത് ഈ ടൈമിൽ ആണ്. പിന്നെ ഇങ്ങനെ ദേഷ്യവും, ചീത്തവിളിയും. ആണെങ്കിൽ എനിക്ക് ഒന്നുകൂടെ ആലോചിക്കേണ്ടിവരും. “

 

“എന്താ നിനക്കിത്ര ആലോചിക്കാൻ?”

 

“നമ്മുടെ വിവാഹക്കാര്യം തന്നെ”

 

“അത് ഉറപ്പിച്ചിട്ടാണല്ലോ ഞാൻ ഗൾഫിലേക്ക് പോന്നത്. “

 

“അതാ ഞാൻ പറഞ്ഞത് ഉറപ്പിച്ചിട്ടേയുള്ളൂന്ന്, പക്ഷേ ഇപ്പഴേ ഇങ്ങനെ ആയാൽ കെട്ടിക്കഴിഞ്ഞാൽ എന്താവും സ്ഥിതി. മമ്മി ഫുഡ് കഴിയ്ക്കാൻ വിളിയ്ക്കുന്നുണ്ട്. ഞാൻ കോൾ കട്ടാക്കുകയാണ്. “

 

അവൻ്റെ മറുപടിയ്ക്ക് കാത്തു നിൽക്കാതെ അവൾ ഫോൺ കട്ടു ചെയ്ത് ഓഫ് ചെയ്തു വെച്ചു. 

 

ടേബിളിൽവെച്ച കൈയ്ക്കു മേലെ തലവെച്ച് അവൾ കുനിഞ്ഞിരുന്നു തേങ്ങി. 

 

ചുമരിൽ പതിഞ്ഞ നിഴൽ അവളെ നോക്കി പരിഹസിച്ചു ചിരിച്ചു. 

മറ്റുള്ളവരുടെ സുഖത്തിനും സന്തോഷത്തനും വേണ്ടി സ്വയം ബലിയാടാവുന്നവൾ. നിഴലിനു പോലും അവളോട് വെറുപ്പ് തോന്നി. 

 

“മോളെ അനീറ്റാ”, മമ്മിയുടെ വിളി കേട്ടപ്പോൾ അവൾ മെല്ലെ താഴേയ്ക്ക് നടന്നു. പോകുമ്പോൾ അവൾ ഫോൺ കയ്യിലെടുത്തു. 

 

അടുക്കളയിൽ ചെന്ന അനീറ്റയുടെ മുഖം കണ്ട് മമ്മി ചോദിച്ചു

“നിന്റെ മുഖമെന്താ വല്ലാതെ. “

 

അവൾ ഒന്നും മിണ്ടാതെ ഫോൺ ഓൺ ചെയ്ത്, ക്രിസ്റ്റിയുടെ സംഭാഷണം മമ്മിയെ കേൾപ്പിച്ചു കൊടുത്തു. 

 

“അയ്യോ മോളെ ! ഇവനിപ്പഴേ ഇങ്ങനെ തുടങ്ങിയാൽ നിങ്ങളൊന്നിച്ച് ജീവിയ്ക്കാൻ തുടങ്ങിയാൽ എന്താവും സ്ഥിതി. “

 

“എനിക്കറിയില്ല ! എന്താ ചെയ്യാന്ന്. ഇത് ശരിയാവുംന്ന് എനിക്ക് തോന്നുന്നില്ല. ഇപ്പഴേ ഇത്ര ടോക്സിക്ക് ആയി സംസാരിക്കുകയും, പെരുമാറുകയും ചെയ്യുന്ന ഒരാളുടെ കൂടെ വിവാഹശേഷം ഒരു ജീവിതകാലം മുഴുവൻ എങ്ങനെ ജീവിച്ചു തീർക്കും മമ്മീ. മമ്മി പപ്പയോട് ഒന്ന് സംസാരിയ്ക്ക്. മറ്റുള്ളവരുടെ തൃപ്തിയ്ക്കും, സന്തോഷത്തിനും വേണ്ടി എന്റെ ജീവിതം നശിപ്പിക്കണോ മമ്മീ. 

അങ്കിളും ആന്റിയും ചിലപ്പോ പിണങ്ങുമായിരിയ്ക്കും പക്ഷേ അവരുടെ സന്തോഷത്തിന് വേണ്ടി ജീവത കാലം മുഴുവൻ ഞാനും നമ്മുടെ കുടുംബവും സങ്കടപ്പെടേണ്ടിവരും. “

 

ഭക്ഷണം കഴിയക്കാനിരുന്നപ്പോൾ ആരും ഒന്നും സംസാരിച്ചില്ല. അനീറ്റ വേഗം ഭക്ഷണം കഴിച്ച് അവളുടെ മുറിയിലെത്തി.. ജാലക വാതിലുകൾ തുറന്ന് മഹിയുടെ വീട്ടിലേക്ക് നോക്കി നിന്നു. 

 

ഒരാഴ്ച കഴിഞ്ഞപ്പോൾ മഹിയും കുടുംബവും തിരിച്ച് യാത്രയായി. കൂടെ അവന്റെ പാട്ടിയും. കാറിലിരുന്ന് പാട്ടി ഉച്ചത്തിൽ  പഴയ സിനിമാ ഗാനങ്ങൾ പാടി കൊണ്ടിരുന്നു. പാട്ടി എപ്പോഴും സന്തോഷവതിയാണല്ലോ മഹി ഓർത്തു., അവനും കൂടെ പാടി താളത്തിനൊത്ത് കൈമുട്ടി. രാത്രിയോടെ വീട്ടിലെത്തി. 

 

പെട്ടെന്ന് തന്നെ റൂമിലെത്തിയ മഹി അനീറ്റയുടെ വീടിനുമുൻവശത്തേക്കുള്ള ജാലകം തുറന്നിട്ടു. തന്റെ വീട്ടിലെ വെളിച്ചം കണ്ട് ജനാലയ്ക്കൽ നിന്നും ഇങ്ങോട്ട് നോക്കി നിൽക്കുന്ന അനീറ്റയെ കണ്ടു. അവൾ തന്നെ കണ്ടതായി മഹിക്കു മനസ്സിലായി. മഹി ഫോൺ ഓണാക്കി കൈ പുറത്തേയ്ക്ക് ഇട്ട് വീശി. അവളും അങ്ങനെ തന്നെ ചെയ്തു. കട്ടപിടിച്ച ഇരുട്ടിൽ മൊബൈലിന്റെ പ്രകാശം തെളിഞ്ഞു നിന്നു. 

 

ഉറങ്ങുന്നതിന് മുമ്പായി പാട്ടിയുടെ മടിയിൽ തലവെച്ച് കിടന്നുകൊണ്ട് മഹി എല്ലാ കാര്യങ്ങളും തുറന്നു പറഞ്ഞു. 

തനിക്ക് അപകടം പറ്റിയ അന്ന്, അനീറ്റ ആശുപത്രിയിൽ കൊണ്ട് പോയത് മുതലുള്ള കാര്യങ്ങളും, അവളുടെ കല്യാണം ഉറപ്പിച്ചതും തങ്ങൾക്ക് രണ്ടു പേർക്കും പരസ്പരം ഇഷ്ടമാണെന്നും രണ്ട് കുടുംബത്തിന്റെ സന്തോഷത്തിന് വേണ്ടി പരസപരം ഒഴിഞ്ഞ് മാറിയതാണെന്നുമെല്ലാം പറഞ്ഞു. 

 

പറഞ്ഞു  നിർത്തിയപ്പോൾ മഹി കണ്ണുതുടയ്ക്കുന്നത് കണ്ടപ്പോൾ പാട്ടി ചോദിച്ചു. 

 

“നിനക്കത്രയ്ക്കും ഇഷ്ടമാണോ അവളെ?”

 

“അതേ… പാട്ടീ”

 

“ഒന്നിച്ച് ജീവിയ്ക്കാൻ ആഗ്രഹമുണ്ടോ?”

 

“ഉണ്ട്. “

 

“പിന്നെന്തിനാടാ പൊട്ടാ, അത്രയും നല്ലൊരു പെൺകുട്ടിയെ വിട്ടുകളയുന്നത്?”

 

“അവളുടെ പപ്പാ, മമ്മി.  പിന്നെ ഇവിടെ അപ്പാ അമ്മാ എല്ലാരും വിഷമിയ്ക്കില്ലേ പാട്ടീ. “

 

“അവരോടൊക്കെ പോകാൻ പറ മഹീ. 

ഞങ്ങളൊക്കെ ജീവിതത്തിന്റെ മുക്കാൽ ഭാഗവും ജീവിച്ച്തീർത്തവരാണ്, 

ഇനിയൊരു കാൽ ഭാഗം കൂടെയെ ജീവിക്കാനുള്ളൂ, . അത് ഇത്രയും ജീവിച്ച് തീർത്ത അവര് ബാക്കി കൂടെ ജീവിച്ചോളും. പിന്നെ അവരുടെ സന്തോഷം, അത് നിങ്ങൾക്ക്  കുഞ്ഞുങ്ങളൊക്കെ ആവുമ്പോ അവരും സന്തോഷിയ്ക്കും. ആദ്യം മനപ്പൊരുത്തമുള്ള നിങ്ങള് സന്തോഷത്തോടെ ജീവിയ്ക്ക്, ജാതിയും മതവുമൊക്കെ പിന്നെ ചിന്തിച്ചാ മതി. അല്ലെങ്കിലും ഇപ്പോഴത്തെ കാലത്ത് ഇതൊക്കെ അത്ര വല്യ പ്രശ്നമാണോ. അതൊക്കെ എന്റെയൊക്കെ കൗമാരകാലത്തല്ലേ. ആൺകുട്ടികളോട് മിണ്ടുന്നത് പോലും പ്രശ്നമായിരുന്നു. നാളെ അവളോട് ജോലിക്ക് പോവണ്ട എന്നു പറ.  രാവിലെ നമ്മൾക്ക് അവിടെ വരെ ഒന്നു പോവാം. ഞാൻ സംസാരിയ്ക്കാം അവരോട്. “

 

“അത് വേണോ പാട്ടീ?”

 

‘നിനക്കവളെ വേണോ, 

 

“വേണം. പാട്ടിയുടെ ധൈര്യം കണ്ടപ്പോൾ മഹേഷിനും ധൈര്യം വന്നു. 

 

മഹേഷ് അപ്പോൾ തന്നെ അനീറ്റയെ വിളിച്ച് നാളെ ലീവ് എടുക്കാൻ പറഞ്ഞു പിന്നെ ഫോൺ പാട്ടിയുടെ കയ്യിൽ കൊടുത്തു. പാട്ടി പലകാര്യങ്ങളും അവളോട് ചോദിച്ചറിഞ്ഞു ക്രിസ്റ്റിയുടെ സ്വഭാവവുമെല്ലാം അവൾ പാട്ടിയോട് പറഞ്ഞു. പാട്ടി അവൾക്ക് ധൈര്യം കൊടുത്തു. 

 

ചുമരിൽ കണ്ട നിഴലിനെ  നോക്കി അവൾ പുഞ്ചിരിച്ചു., അതു കണ്ട നിഴൽ അവളെയും നോക്കി ചിരിച്ചു. 

 

പിറ്റേന്ന് രാവിലെ പാട്ടി മഹേഷിനെയും കൂട്ടി അനീറ്റയുടെ വീട്ടിലെത്തി. 

അനീറ്റ പടിവാതിൽക്കൽതന്നെ അവരെയും കാത്തു നിൽപ്പുണ്ടായി

രുന്നു. 

 

പാട്ടി അവളെ സ്നേഹത്തോടെ ചേർത്തുപിടിച്ചു. അനീറ്റ പാട്ടിയെ ഹാളിലെ സോഫയിലിരുത്തി. എന്നിട്ട് അഥിതികൾ ആരാണെന്നറിയാതെ പകച്ച് നിന്ന പപ്പയേയും മമ്മിയോടുമായി പറഞ്ഞു.. 

 

“ഇത് മഹേഷ് നമ്മുടെ വീടിനു മുമ്പിലുള്ള താ. ഇത് മഹേഷിന്റെ പാട്ടി. ഈ മഹേഷിനെയായിരുന്നു. അപകടം പറ്റിയപ്പോൾ ഞാൻ ആശുപത്രിയിൽ എത്തിച്ചു എന്ന് അന്ന് പറഞ്ഞിരുന്നത്. 

ബാക്കി ഇനി പാട്ടി പറയും. 

 

“അനീറ്റയുടെ പപ്പയും മമ്മിയും ഞാൻ പറയുന്നത് ക്ഷമയോടെ കേൾക്കണം. അപകടം പറ്റി ഇവനെ ആശുപത്രിയിലാക്കിയ അന്നാണ് ഇവര് പരസ്പരം മിണ്ടുന്നത്. പക്ഷേ പിന്നീടെപ്പോഴോ ഇവര് തമ്മിൽ ഇഷ്ടത്തിലായി. എന്നു കരുതി ഇവര് തെറ്റൊന്നും ചെയ്തിട്ടില്ല.. ഇന്നലെ ഞാൻ ഇവന്റെ വീട്ടിൽ വന്നപ്പോഴാണ് എല്ലാക്കാര്യവും ഇവരുരണ്ടു പേരും എന്നോട് പറയുന്നത്.. പക്ഷേ നമ്മുടെ കുടുംബങ്ങൾക്ക് വേണ്ടി രണ്ടു പേരും പരസ്പരം ഒന്നു കാണാൻ പോലും ശ്രമിക്കാതെ വഴിമാറി നടന്നു. അവരുടെ സ്നേഹം അവർ തന്നെ വേണ്ടാന്നു വെച്ചു.. അവന് അവന്റെ അപ്പായെ വിഷമിപ്പിക്കാൻ വയ്യ. ഇവന്റെ അമ്മായ്ക്ക് അനീറ്റയെ ജീവനാണ് ഇഷ്ടവുമാണ്. ഇവൾക്ക് ഇവളുടെ പപ്പയെയും, മമ്മിയെയും വേദനിപ്പി

ക്കാനും വയ്യ. അതുകൊണ്ടാണ് ഇഷ്ടമല്ലാതിരുന്നിട്ടു കൂടി അവൾ മറ്റൊരു വിവാഹത്തിനു സമ്മതിച്ച്, അത് ഉറപ്പിക്കൽ ഘട്ടംവരെ എത്തിയതും. അല്ലാതെ അവൾടെ പൂർണ്ണ സമ്മതത്തോടെ ആയിരുന്നില്ല. നമ്മൾ രണ്ടു വീട്ടുകാരും ഒന്ന് ക്ഷമിക്കാനും സഹിക്കാനും തയ്യാറായാൽ ഇവർക്ക് നല്ലൊരു ജീവിതം കിട്ടും. 

 

ഇവളെ ഇപ്പോൾ കെട്ടാൻ പോകുന്നവന്റെ വാക്കുകളും സംസാരവുമെല്ലാം  നിങ്ങളും കേട്ടു കാണുമല്ലോ. ഇഷ്ടമില്ലാതിരുന്നിട്ടു

കൂടി നമ്മുടെ സന്തോഷത്തിന് വേണ്ടി മറ്റൊരാളെ കെട്ടേണ്ടി വരുന്ന ഇവളുടെ അവസ്ഥ നിങ്ങൾ ഒന്നാലോചിച്ച് നോക്കു. നമ്മുടെ മക്കളുടെ സന്തോഷമല്ലേ നമ്മൾക്ക് വലുത്. അവർ ഒന്നിച്ച് ജീവിക്കട്ടെ. ജാതി മതവും പറഞ്ഞ് അവരെ അകറ്റി നിർത്താതെ. 

ഈ അവസ്ഥയിൽ അനീറ്റയിൽ ഞാൻ കാണുന്നത് എന്നെ തന്നെയാണ്. എനിക്കുണ്ടായ അനുഭവങ്ങളും, വേദനകളും ഇവർക്കുണ്ടാവരുത്. അതനുഭവിച്ചാലേ അതിൻ്റെ വിഷമം നമ്മൾക്ക് അറിയാൻ പറ്റൂ, ഞാൻ അനുഭവിച്ചത്ര ഈ ഭൂമിയിൽ മറ്റാരും അനുഭവിച്ചിട്ടുണ്ടാവില്ല. 

 

തുടരും

 

✍️ഷിജിത് പേരാമ്പ്ര

🌹പ്രണയനിഴലുകൾ🌹  (അവസാന ഭാഗം )