നീയോ ഞാനോ

രണ്ടുപേർ പരസ്പരം ചുംബിക്കുമ്പോൾ ലോകം തീരെ ചെറുതാവുന്നു എന്നു പറയും പ്രണയത്തിൻ്റെ തിസീസ്. രണ്ടു പെണ്ണുങ്ങൾ ചുംബിക്കുമ്പോഴോ ലോകത്തിൻ്റെ മുഖം വക്രിക്കുന്നു. രണ്ടു പുരുഷന്മാർ ചുംബിക്കുമ്പോൾ ലോകം പുച്ഛിക്കുന്നു. ട്രാൻസ് ജൻ്ററുകൾ ചുംബിക്കുമ്പോൾ ലോകം കണ്ണു പൊത്തുന്നു. അപ്പോൾ ഉമ്മകൾക്കല്ല കുഴപ്പം, ഉൺമകൾക്കും ഉലകവീക്ഷണത്തിനും ഉദാസീന കാഴ്ചകൾക്കുമാണ്. ലോകം ഉല്ലസിക്കട്ടെ എന്നുകൂടി പറയുന്നുണ്ട് വാലൻ്റൈൻസ് ഡേ.

പഴയൊരോട്ടോഗ്രാഫിൻ്റെ താളിലെ കാണായ്കയിലുണ്ടാവും ഞങ്ങളുടെയൊക്കെ പ്രണയദിനങ്ങൾ.
കാണാതായകത്തിരിപ്പുണ്ട്
കണ്ണുകുത്തിപ്പൊട്ടിച്ച കവിതകൾ.
കാലത്തിൻ്റെ വലിയ തേപ്പുകൊണ്ടൊട്ടിച്ച
പ്രണയത്തിൻ്റെ പറക്കമുറ്റാത്ത പഴകിയ അക്ഷരങ്ങൾ.
വാക്കു വിരിയാതെ കൊഴിഞ്ഞൊരു മയിൽപ്പീലിത്തുണ്ട്.
പ്രസവം നിർത്തിപ്പോയൊരു മഞ്ചാടിക്കുടുക്ക.
ആർത്തവച്ചോര പടർന്ന വളപ്പൊട്ടുകൾ.
കൗമാരമെന്ന കാണായ്മ
കണ്ണടച്ചുകളഞ്ഞ കള്ളക്കാലം.

Disclaimer: The viewpoints and opinions expressed in this post are those of the author. They do not necessarily reflect the views of Koottaksharangal.com. Any omissions or errors are the author’s and Koottaksharangal does not assume any liability or responsibility for them.