വിധി

ശരികൾക്കും ന്യായങ്ങൾക്കും അപ്പുറമൊരു ലോകമുണ്ട്.

 

ആർക്കും നിർവചിക്കാൻ കഴിയാത്ത,

കുറ്റപ്പെടുത്താനാവാത്ത.

 

അവിടെ,

ഒരാൾ ഇന്നും

“നമ്മൾ തെറ്റിയതാണോ?”

എന്ന് സ്വയം ചോദിച്ചുകൊണ്ടിരിക്കും.

 

മറ്റൊരാൾ,

“അല്ല…

സമയം മാത്രമാണ് നമ്മളെ തോൽപ്പിച്ചത്.”

എന്ന് പറയാതെ വിഴുങ്ങും.

 

അവിടെ ചില ബന്ധങ്ങൾക്ക്

വിധിയില്ല,

വിധിയെന്നു തോന്നുന്ന സാഹചര്യങ്ങൾ മാത്രമേയുള്ളൂ.

 

സ്നേഹമില്ലാത്തതുകൊണ്ടല്ല,

സ്നേഹിച്ചിട്ടും

കൈവിടേണ്ടി വന്നതുകൊണ്ടാണ്

ചില ഹൃദയങ്ങൾ ഇന്നും

പരസ്പരം നിശ്ശബ്ദമായി മിടിക്കുന്നത്.

 

ഒരാളെ

ഓർമ്മകൾ ഉറങ്ങാൻ സമ്മതിക്കില്ല.

 

മറ്റൊരാൾക്ക്

ഓർമ്മകളാൽ ഉണരാൻ പോലും ധൈര്യമുണ്ടാകില്ല.

 

ഒരാൾ

എല്ലാം മറന്നെന്ന് പറയും.

 

മറ്റൊരാൾ

ഒന്നും മറക്കാതെ

അത് പറയാതിരിക്കാൻ പഠിക്കും.

 

എന്നിട്ടും,

പരസ്പരം കുറ്റപ്പെടുത്താൻ

ഇരുവർക്കും കഴിയില്ല.

 

കാരണം,

ചില വേർപിരിയലുകൾ

ശരിയോ തെറ്റോ എന്ന ചോദ്യത്തിനുള്ള ഉത്തരമല്ല.

 

അവർ രണ്ടുപേരും

ഒരേ ദിശയിലേക്ക് നോക്കിയിട്ടും

രണ്ടു വഴികളിലൂടെ നടക്കാൻ

ജീവിതം എഴുതിയ തീരുമാനങ്ങളാണ്.

 

ആ ലോകത്ത്

വിജയിച്ചവർ

ഒരുമിച്ച് അവസാനിച്ചവരല്ല.

 

ഒരിക്കൽ ആത്മാർത്ഥമായി സ്നേഹിച്ച ഒരാളെ,

സ്വന്തമാകാതെ പോയാലും,

വെറുപ്പില്ലാതെ ഓർക്കാൻ കഴിഞ്ഞവരാണ്.

 

Murshida Parveen

 

#relationshipgoals