നട്ടുച്ചക്ക് ഉറക്കമുണർന്നു കുളിച്ചൊരുങ്ങുന്ന അയാളെ അവജ്ഞയോടെ നോക്കി അവൾ ചോദിച്ചു.
“ഇന്ന് ആരെ ചൂണ്ടയിട്ട് പിടിക്കാനാ ഈ ഒരുക്കം ?”
തലേന്നു കുടിച്ചുതീർത്ത മദ്യത്തിന്റെ രൂക്ഷഗന്ധം അവിടമാകെ തളംകെട്ടി നിന്നിരുന്നു. അവളുടെ ചോദ്യം കേട്ടപ്പോൾ ചുവന്നു കലങ്ങിയ അയാളുടെ ക്രൂരമായ കണ്ണുകൾ അവളെ തറപ്പിച്ചുനോക്കിക്കൊണ്ട് അവൾക്കുനേരേ ചീറി.
“അതേടീ, എന്റെ ചൂണ്ടയിൽ കൊരുത്തതൊന്നും അത്ര പെട്ടെന്ന് രക്ഷപ്പെട്ടിട്ടില്ലെടീ. നീയും എന്റെ ചൂണ്ടയിൽ കൊരുത്ത പരൽമീനാണെടീ… നിന്നോടുള്ള ഒടുക്കത്തെ സ്നേഹംകൊണ്ട് കെട്ടിയെഴുന്നെള്ളിച്ചതല്ലെന്നു നിനക്കിപ്പോ മനസ്സിലായതല്ലേ. ലാഭമില്ലാത്ത ഒരു കച്ചവടത്തിനും ഞാൻ നിക്കത്തില്ലെടീ..
നീമാത്രമല്ല, വളർന്നുവരുന്ന നിന്റെ മകളും എന്റെ ചൂണ്ടയുടെ ഇരകൾ തന്നെയാടീ. “
അവളുടെ അടിവയറ്റിൽ ആഞ്ഞുചവിട്ടി വേച്ചു വേച്ചു നടക്കുന്ന അയാളെ അറപ്പോടെ നോക്കിനിന്നവൾ. അപ്പുറത്ത് ഇതെല്ലാം കണ്ടുകൊണ്ട് ശരീരവും നാവും തളർന്നുകിടക്കുന്ന അവളുടെയച്ഛന്റെ കണ്ണിലൂടെ പെരുമഴ കുത്തിയൊലിച്ചു.
അകാലത്തിൽ വിധവയായ മകൾക്കും കുഞ്ഞിനും ഒരു ജീവിതമുണ്ടായിക്കാണാനുള്ള അടങ്ങാത്ത ആഗ്രഹംമൂലം മകളെ നിർബന്ധിപ്പിച്ച് രണ്ടാം വിവാഹം കഴിപ്പിച്ചതായിരുന്നു. പക്ഷേ, തന്റെ അളവറ്റ സ്വത്തിൽ കണ്ണുവെച്ചു വന്ന അയാളെ തിരിച്ചറിയാൻ വൈകിയ നിമിഷങ്ങളെയോർത്തന്നേരം ആ മിഴികളിൽ വെറുപ്പ് ആളിക്കത്തി.
അയാൾ ചൂണ്ടയിൽ കൊരുത്ത ഇരയാണുതാനെന്ന് അവളും അറിഞ്ഞില്ല. ഒരുപാട് പെൺകുട്ടികളുടെ ശാപം പുരണ്ട ജീവിതം. ജോലി വാഗ്ദാനംചെയ്ത് പെൺകുട്ടികളെ ചതിച്ചുവിറ്റ് കാശുണ്ടാക്കുന്ന തനി രാക്ഷസൻ. അച്ഛനില്ലാത്ത തന്റെ മകളെയും കൊത്തിയെടുത്തു പറക്കാൻ വട്ടമിട്ടു നടക്കുന്നയാ കഴുകനെ മനസ്സുകൊണ്ടു ശപിച്ചവൾ.
അന്നു രാത്രിയും ബോധമില്ലാതെ വീട്ടിലെത്തിയ അയാൾക്കു വിളമ്പിയ അത്താഴത്തിലായിരുന്നു അവളുടെ മുഴുവൻ പ്രതീക്ഷകളും. ഒരു പെണ്ണും ഇനി അയാളുടെ ചതിയിലകപ്പെടാൻ പാടില്ലയെന്ന ഉറച്ച തീരുമാനത്തിലേക്കെത്തിയിരുന്നു അവൾ. ആ അത്താഴം കഴിക്കുന്നതിനിടയിൽ രക്തം ഛർദിച്ചു ചത്തുമലച്ചു കിടക്കുന്ന അയാളുടെ ശവത്തിൽ നോക്കി അവൾ സംതൃപ്തിയോടെ അട്ടഹസിച്ചു. കൂടെ അവളോടൊപ്പം അയാളുടെ ചൂണ്ടയിൽ കുരുങ്ങിപ്പിടഞ്ഞു മരിച്ചവരുടെ ആത്മാക്കളും.
റംസീന നാസർ
