💞 തൂ മഞ്ഞുപോലെ..💞💞 – 2

ആദ്യഭാഗം
============================

“എന്ത് സ്വപ്നമാണെന്റെ ഈശോയേ ഞാനിപ്പോൾ കണ്ടത് ”

നെഞ്ചോട് കൈ ചേര്‍ത്ത് തടവി കൊണ്ട്‌  ഉള്ളാലെ മൊഴിഞ്ഞു അവൾ.

അപ്പോഴും ശ്വാസഗതി നേരെയാവാതെ അവളുടെ ഹൃദയതാളം ഉയർന്നു താഴ്ന്നു കൊണ്ട്‌ അവളെ മുഴുവനായും വെട്ടി വിറയ്ക്കുന്നുണ്ടായിരുന്നു….

_________________@@@@@

കൈയെത്തിച്ച് ബെഡ് ലാമ്പ് ഓണാക്കി അവൾ.  മേശപ്പുറത്തിരുന്ന ബോട്ടിലിലെ വെള്ളമെടുത്ത് വായിലേക്ക് കമഴ്ത്തി,  പകുതി വായ്ക്കകത്തേക്കും  ബാക്കി പകുതി അവളുടെ മേനിയിലേക്കും വീണു.

എസി മുറിക്കകത്തായിരുന്നിട്ടു കൂടി അവളെയാകെ വെട്ടിവിയര്‍ത്തു… അപ്പോഴും കിതപ്പ് വിട്ട് മാറിയിട്ടുണ്ടായില്ല അവളില്‍ നിന്നും. ഹൃദയം ശക്തിയോടെ മിടിച്ചു കൊണ്ടിരുന്നു…. അതിൽ നിന്നും തന്നെ മനസ്സിലാക്കാം ആ സ്വപ്നം ആളെ എത്രമാത്രം ഭയപ്പെടുത്തിയിരിക്കുന്നുവെന്ന്.

ബോട്ടിൽ തിരികെ വെച്ച് മൊബൈൽ ഫോണെടുത്ത് സമയം നോക്കി 2.55 am.   പുലര്‍ച്ചെ കാണുന്ന സ്വപ്നം സത്യം ആകുമെന്നാണ്‌ പറയുന്നത്.  എന്റീശോയേ… അരുതാത്തത് ഒന്നും സംഭവിക്കല്ലേ….

മൊബൈലില്‍ വാട്ട്സാപ്പ് ഓണാക്കി ചാറ്റ് ലിസ്റ്റ് നോക്കി….

ഇല്ല…. അവന്റെ ഒരു മെസേജ് പോലുമില്ല…   ലാസ്റ്റ് സീന്‍ മിനിഞ്ഞാന്ന് 10.30 pm.

ഇനി…. ഇനി അവനെന്തെങ്കിലും ആപത്ത് സംഭവിച്ചു കാണുമോ….
അതായിരിക്കുമോ… ഇങ്ങനെയൊരു സ്വപ്നം കണ്ടത്…

ഏയ്… അങ്ങനെയൊന്നും സംഭവിച്ചിട്ടുണ്ടാവില്ല.  അവൾ ഒരു കൊച്ചു കുട്ടിയെ പോലെ ചുണ്ടു കൂര്‍പ്പിച്ച് തല അങ്ങോട്ടും ഇങ്ങോട്ടും ചലിപ്പിച്ചു കൊണ്ടിരുന്നു, .

ഇല്ലാ…. ഒന്നും ഉണ്ടാവില്ല… ഒന്നും….!!വെറുതേ എന്റെ തോന്നല്‍ ആവും.  അവൾ സ്വയം മൊഴിഞ്ഞു.

നെഞ്ചില്‍ കുരിശു വരച്ച് മനമുരുകി പ്രാര്‍ത്ഥിച്ചു അരുതാത്തതൊന്നും നടന്നിരിക്കല്ലേ കര്‍ത്താവേ….

ആ സ്വപ്നം കൊണ്ട്‌ ഉറക്കം നഷ്ടമായി.  ഇന്നിനി ഉറങ്ങാന്‍ പറ്റുമെന്നു തോന്നുന്നില്ല.

തൊട്ടപ്പുറത്തെ ബെഡിലേക്ക് നോക്കി… അവിടെ ജെസ്സിക ജോസ് എന്ന ജെസ്സി സുഖമായി മൂടി പുതച്ചു കിടക്കുന്നു.

പ്ലസ്ടു മുതലുള്ള അവളുടെ കൂട്ടാണ്… അവളുടെ ചങ്ക്… ബെസ്റ്റ് ഫ്രണ്ട്.   ഒരു ഹൃദയവും രണ്ടു ശരീരവുമായി കഴിയുന്ന ഉറ്റ സുഹൃത്തുക്കള്‍. എന്തിനും ഏതിനും തനിക്കൊപ്പം ജെസ്സി ഉണ്ടാകും.

രണ്ടു പേരും എറണാകുളത്ത് വാട്ടർ അതോറിറ്റിയില്‍ അസിസ്റ്റന്റ് എഞ്ചിനീയർ ആയിട്ടാണ്‌ ജോലി ചെയ്യുന്നത്.  ജോലിക്ക് പോകാന്‍ സൗകര്യത്തിനായി കാക്കനാട് ഒരു ഫ്ലാറ്റ് വാടകയ്ക്ക് എടുത്ത്  താമസിക്കുന്നു.

ജെസ്സിയുടെ വീട്ടില്‍ പൂത്ത കാശുണ്ട്, സര്‍ക്കാര്‍ ജോലിക്ക് പോകേണ്ട ആവശ്യമൊന്നുമില്ല.  അവളുടെ പപ്പക്ക് റിയൽ എസ്റ്റേറ്റ് ബിസിനസ് ആണ്‌, ജില്ലയില്‍ തന്നെ പലയിടത്തും അവര്‍ക്ക് ഓഫീസുണ്ട്.  അവയില്‍ ഏതെങ്കിലും ബ്രാഞ്ചിലെ ഹെഡ് ആയി ഇരിക്കാൻ പറയും പപ്പ.

പക്ഷേ അവൾ എനിക്ക് കൂട്ടായി എന്നോടൊപ്പം തന്നെ കൂടി. എന്റെ സ്വപ്നമായിരുന്നു ഒരു സര്‍ക്കാര്‍ ജോലി. എഞ്ചിനീയറിങ്ങിനും ഞങ്ങൾ  ഒരുമിച്ച് തന്നെയായിരുന്നു… പിന്നീട് ടെസ്റ്റ് എഴുതി രണ്ടാൾക്കും ഒരിടത്ത് തന്നെ നിയമനവും കിട്ടി.

ആള് പക്ഷേ… എന്നെ പോലെയൊന്നുമല്ല കേട്ടോ….
നല്ല ധൈര്യശാലിയാണ് ഒന്നുപറഞ്ഞാൽ രണ്ട് തിരികെ പറയുന്ന നല്ല അസ്സലു പാലാക്കാരി അച്ചായത്തി.  പക്ഷേ… ഉറങ്ങുന്ന കണ്ടാലോ… ഒരു പൂച്ചകുഞ്ഞ് കിടക്കുന്ന പോലുണ്ട്.
———————————————————-

രണ്ടു പേരുടെയും സ്വഭാവം തികച്ചും വ്യത്യസ്തമാണ്… പലർക്കും തോന്നും ഇവർ എങ്ങനെ കൂട്ടുകാർ ആയെന്ന്.  ഇത്ര വര്‍ഷം ഒരുമിച്ച് പ്രിയ സുഹൃത്തുക്കള്‍ ആയി കഴിഞ്ഞുവെന്ന്.

ജെസ്സിയെ പിടി കിട്ടിയില്ലേ….  ഇനി നമുക്ക് നമ്മുടെ നായികയെ പരിചയപ്പെടാം അല്ലേ….

ഇപ്പോൾ സ്വപ്നം കണ്ടു പേടിച്ച് വിറച്ച് കൊണ്ടിരിക്കുന്നില്ലേ…. അതാണ് നമ്മുടെ നായിക.

ആരെങ്കിലും ഒന്ന് തുറിച്ച് നോക്കിയാല്‍ പേടിച്ച് വിറയ്ക്കുന്ന… മറുത്തൊന്നും പറയാൻ അറിയാത്ത… എപ്പോഴും ചിരിക്കുന്ന… ഒത്തിരി സംസാരിക്കുന്ന…  എല്ലാവരെയും സ്നേഹിക്കാന്‍ മാത്രം അറിയാവുന്ന ഒരു മാലാഖ.

💞       “ആൻലിയ”     💞

പാലായിലെ പേരുകേട്ട ക്രിസ്ത്യൻ കുടുംബമായ പാലക്കല്‍ തറവാട്ടിലെ ഇളയ സന്തതി ജോയ് പാലക്കലിന്റെയും അന്നമ്മയുടെയും ഇളയ പുത്രി.  മൂത്തവന്‍ ആന്‍ഡ്രൂസ് ഗൾഫില്‍ ആണ്‌.

കുടുംബപ്പേരു മാത്രമേ മഹിമയുള്ളൂ…
വലിയപ്പച്ചന്‍ ആയ കാലത്തില്‍  എല്ലാം ദാനം ചെയ്തും ചൂതാട്ടം കളിച്ചും തീർത്തതു കൊണ്ട് സമ്പത്ത് മൊത്തം മറ്റുള്ളവർ കൊണ്ടുപോയി.  ജോയിക്ക് നാല് സഹോദരിമാര്‍ ആയിരുന്നു.

സമ്പത്തെല്ലാം പോയപ്പോള്‍ നാല് പെങ്ങന്മാരുടെയും ഉത്തരവാദിത്തം ആൻലിയയുടെ പപ്പയായ ജോയിയുടെ തലയില്‍ തന്നെ വന്ന് പതിച്ചു.

മൂന്നു പേരുടെയും കെട്ട് കേമമായി തന്നെ ജോയിയുടെ അധ്വാന ഫലത്തിനാല്‍ നടന്നു.  ഒടുക്കം ഇളയ സഹോദരി മേരിക്കുട്ടിയുടെ കെട്ട് നടത്താന്‍ ആയപ്പോഴേക്കും തറവാട് വില്‍ക്കേണ്ടി വന്നു.

പിന്നെ പറക്കമുറ്റാത്ത  കുഞ്ഞുങ്ങളെയും കൊണ്ട്‌ ജോയിയും അന്നാമ്മയും അന്നാമ്മക്ക് വീതം കിട്ടിയ മല മുകളിലെ ഏഴ് സെന്റ് സ്ഥലത്ത് ചെറിയൊരു കൂര കെട്ടി മാറുകയായിരുന്നു.

അന്ന് ആന്‍ഡ്രൂസിന് പതിനഞ്ചും ആൻലിയക്ക് പത്തും ആയിരുന്നു പ്രായം.  അന്ന് തൊട്ട് ആന്‍ഡ്രൂസിന്റെ സ്വഭാവത്തില്‍ ആകെ ഒരു മാറ്റം വന്ന് തുടങ്ങി.

അവന് എല്ലാരോടും ദേഷ്യവും പുച്ഛവും ഒക്കെയാണ്.  പപ്പയുടെ പിടിപ്പുകേടാണ്‌ എല്ലാം നശിക്കാനുള്ള കാരണം എന്നാണ് അവന്റെ വാദം.

അവനും ആനിക്കുട്ടിയും (ആൻലിയയെ വീട്ടിലും പ്രിയപ്പെട്ടവരും ഒക്കെ വിളിക്കുന്ന പേരാണ് ആനി) അനുഭവിക്കേണ്ടതെല്ലാം പെങ്ങള്‍മാരോടുള്ള അമിത സ്നേഹത്തിന്റെ പുറത്ത് നശിപ്പിച്ചു കളഞ്ഞു എന്നാണ് അവന്റെ പക്ഷം.

സ്നേഹം കൊണ്ട്‌ ജീവിക്കാൻ ആവില്ല, പണവും സമ്പത്തും ഒന്നുമില്ലെങ്കില്‍ ജീവിതം ഇങ്ങനെ നരക തുല്യം ആവും എന്നാണ്‌ അവന്‍ പറയുന്നത്.

അതുവരെ സമ്പത്തിന്റെ അടിത്തട്ടില്‍ സന്തോഷത്തോടെ ജീവിച്ചിട്ട് പെട്ടെന്നൊരു പറിച്ചു മാറ്റം അവനെ വല്ലാതെ മാറ്റി കളഞ്ഞു.

അതുകൊണ്ട്‌ പ്ലസ്ടു പഠനം കഴിഞ്ഞ് പ്ലംമ്പിങും വയറിങും ഒക്കെ പഠിച്ച് നാട്ടില്‍ കുറച്ച് കഷ്ടപ്പെട്ട് പിന്നീട് അവന്‍ വിദേശത്തേക്ക് പറന്നു.  അന്യ നാട്ടില്‍ കിടന്ന് കഷ്ടപ്പെടുന്നു…  പഴയ പോലെ വീടും മറ്റും ഉണ്ടാക്കുവാന്‍ വേണ്ടിയുള്ള തന്ത്രപ്പാടിലാണ്‌ അവന്‍… ആരോടൊ ക്കെയോ ഉള്ള വാശി പോലെ.

അതുകൊണ്ട്‌ ആനിയോടും അവന്‍ സ്നേഹത്തോടെ ഒന്നും പെരുമാറാറില്ല… അവളോട് എന്നല്ല, ആരോടും.  അതില്‍ അവള്‍ക്ക് അതിയായ വിഷമവുമുണ്ട്

കൂട്ടുകാരൊക്കെ അവരുടെ ഏട്ടൻമാരെ കുറിച്ച് ഓരോന്നൊക്കെ പറയുമ്പോൾ അവളുടെ സങ്കടം അവൾ പുറത്തു കാട്ടാറില്ല.  എന്തൊക്കെ ആയാലും പുറമെ പ്രകടിപ്പിച്ചില്ലെങ്കിലും അവളുടെ ഇച്ചായന് അവളോട് ഉള്ളില്‍ സ്നേഹം ഉണ്ടെന്ന് അവള്‍ക്ക് അറിയാം.

🌼—-‐———— ഇപ്പോൾ നമ്മുടെ നായികയെ പറ്റി ചെറിയൊരു വിവരണം കിട്ടിയില്ലേ… ഇനി നമുക്ക്  പ്രസന്റിലേക്ക് തിരികെ വരാം.———————-🌼

ആന്‍ലിയ ജെസ്സിയെ നോക്കി… സുഖമായി ഉറങ്ങുന്ന തന്റെ പ്രിയ കൂട്ടുകാരിയെ ശല്യ പെടുത്താതെ ശബ്ദം ഉണ്ടാക്കാതെ ബാൽക്കണിയുടെ വാതില്‍ തുറന്ന് പുറത്തേക്കിറങ്ങി.  ബാൽക്കണിയുടെ റെയിലിങില്‍ പിടിച്ച് നിന്നു.

അപ്പോൾ ഒരിളം കാറ്റ് അവളെ തഴുകി കടന്നു പോയി.  ആ കാറ്റില്‍ നെറ്റിയിലേക്ക് വീണു കിടന്ന മുടി പാറി പറന്നു… അവയെ ഇടം കൈയ്യിനാല്‍ ചെവിക്കരികിലേക്ക് ഒതുക്കി വെച്ചു.

ഒരു അഞ്ചടി രണ്ടോ മൂന്നോ ഇഞ്ച് പൊക്കം… വെളുത്ത നിറം… കൊലുന്നനെ വണ്ണം കുറഞ്ഞ ശരീര പ്രകൃതം.   ഇടുങ്ങിയ അരക്കെട്ടും നീണ്ട കൈയ്യും കാലും… കൈ വിരലുകള്‍ മനോഹരമായി നീട്ടി വളര്‍ത്തി ബേബി പിങ്ക് കളർ നൈല്‍ പോളിഷ് ഇട്ടിട്ടുണ്ട്.

ഒരു നേര്‍ത്ത പിങ്ക് കളർ പ്ലസോ പാന്റും ആകാശ നീല വീനെക്ക് ഹാഫ് സ്ലീവ് ടീഷർട്ടുമാണ്‌ വേഷം.

കഴുത്തിൽ നേരിയ നൂല് പോലെയുള്ള ഒരു സ്വര്‍ണ്ണ ചെയ്നില്‍ വെള്ള കല്ല് വെച്ച കുഞ്ഞ് ലോക്കറ്റും.  വലത്തേ കൈയ്യില്‍ ഒരു സിമ്പിള്‍ ബ്രേസലെറ്റ്. കാതില്‍ ഹര്‍ട്ട് ഷേപ്പിൽ കുഞ്ഞു ഡയമണ്ട് കമ്മലും.

മുടി പോണി ടെയിലില്‍ കെട്ടി വെച്ചിട്ടുണ്ട്.  അവളുടെ ഏറ്റവും വലിയ അട്ട്രാക്ഷന്‍ ചിരിക്കുമ്പോള്‍ തെളിഞ്ഞു വരുന്ന നുണക്കുഴികളും… ആ കാപ്പി കണ്ണുകളുമാണ്‌. 

പക്ഷേ… ഇപ്പോൾ ആ കാപ്പി കണ്ണുകൾ ചുവന്ന് കലങ്ങിയിരിക്കുന്നു.  അവള്‍ മൊബൈൽ കൈയിലെടുത്ത് ആ നമ്പറിലേക്ക് വിളിച്ചു നോക്കി.

“ആപ് കീ ധ്വാരാ ഡയല്‍ കിയാ ഗയാ നമ്പര്‍ അഭീ ബന്ദ് ഹേ.”

ഇങ്ങനെ ഒരിക്കലും സ്വിച്ച് ഓഫ് ചെയ്ത് വെക്കാറില്ല.  ഡ്യൂട്ടി സമയം ചാര്‍ജ് തീര്‍ന്നു പോയാലും രാത്രി റൂമിൽ എത്തുമ്പോൾ ചാര്‍ജ് ചെയ്യും.  എന്നും വിളിക്കാറൊന്നുമില്ല ആളുടെ ജോലി അങ്ങനെയാണല്ലോ പക്ഷേ എല്ലാ ദിവസവും രാത്രി ഒരു ഗുഡ് നൈറ്റ് മെസേജ് അയക്കും.  സുഖമായിട്ട് ഇരിക്കുന്നു എന്ന് അറിയിക്കാനായി.

ഇതിപ്പോള്‍ മിനിഞ്ഞാന്ന് രാത്രി പത്തരക്ക് ശേഷം ഓൺലൈനില്‍ വന്നിട്ടില്ല.

ഇന്നലെ ഉച്ചക്ക് ലഞ്ച് ബ്രേക്കില്‍ പതിവില്ലാതെ വിളിക്കുകയും ഇന്നത്തോടെ ഇവിടുത്തെ ക്യാമ്പ് തീരും ലാസ്റ്റ് ദിവസമാണ് കലാശക്കോട്ടയാണ് എന്നൊക്കെ പറഞ്ഞ് വെച്ചതാണ്.

രണ്ടു മൂന്ന്‌ ദിവസമായിട്ട് മര്യാദയ്ക്ക് ഒന്ന് റസ്റ്റ് എടുക്കാൻ പോലും പറ്റിയിട്ടില്ല 24 ഹവേർസ് ഡ്യൂട്ടി ആയിരുന്നു. ആകെ ടയേർഡ് ആണ്‌, ഇന്ന്‌ ഈ ഡ്യൂട്ടി തീര്‍ന്നാല്‍ നാളെയോ അല്ലെങ്കിൽ മറ്റന്നാളോ താഴേക്ക് ഇറങ്ങും… അപ്പോൾ പിന്നെ ഫ്രീ ആകും എന്നൊക്കെ പറഞ്ഞാണ് ഫോൺ വെച്ചത്.

“എന്താണ്‌ ഇങ്ങനെ ഡ്യൂട്ടി ഒരാൾക്കും ഇല്ലാത്ത പോലെ, എന്റെ വേറെ കൂട്ടുകാരും ജെസ്സിയുടെ കസിനും ഒക്കെ പട്ടാളത്തില്‍ ഉണ്ട് അവര്‍ക്ക് ഒന്നും ഇല്ലല്ലോ ഇങ്ങനെ ഡ്യൂട്ടി… സണ്‍ഡേ പോലും ഓഫില്ലാതെ.  ഇത് വെറും പുളു അടിക്കുന്നയല്ലേ… എന്നോട് സംസാരിക്കാന്‍ ഇഷ്ടം ഇല്ലാത്ത കൊണ്ട്‌ വെറുതേ പറയുന്ന അല്ലേ…”

എന്ന് ഒരിക്കൽ കെറുവെച്ച് ചോതിച്ചപ്പോൾ പറഞ്ഞത് ഇങ്ങനെയാണ്

“അങ്ങനെയാണോ…. ഊം… അങ്ങനെയാണോ എന്ന്…? എനിക്ക് സംസാരിക്കാൻ ഇഷ്ടമില്ലേ…? പറ…. ?

(ആ ഓര്‍മ്മയില്‍ അവളുടെ മുഖത്ത് നാണം വിരിഞ്ഞു)

ഇത് ഞാന്‍ നേരില്‍ കാണുമ്പോള്‍ പറയാം… അറിയാമല്ലോ ഞങ്ങളുടെ ഡ്യൂട്ടിയുടെ സ്വഭാവം… ഇപ്പോൾ ചെയ്യുന്ന വര്‍ക്കിനെ കുറിച്ച് പുറത്തു പറയാന്‍ പാടില്ല… അത് ഫോണിലൂടെ ഒട്ടും പറ്റില്ല… അറിയാമല്ലോ ഇപ്പോൾ എല്ലാം ഹൈജാക്ക് ചെയ്യുന്ന കാലമാണ്.”

ശരിയാണ്… അവരുടെ ഡ്യൂട്ടിയുടെ സ്വഭാവം ഇങ്ങനെയാണ്. പക്ഷേ മൊബൈൽ സ്വിച്ച് ഓഫാണ്. അതാണ് ഒരു ഭയം… ഈ സ്വപ്നവും…

ഇനിയിപ്പോ ശരിക്കും എന്തെങ്കിലും പറ്റിയായിരിക്കുമോ…?

അവളുടെ ഹൃദയം ക്രമാതീതമായി മിടിക്കാന്‍ തുടങ്ങി.  ഇപ്പോൾ പെയ്യുമെന്ന പോലെ ആ കാപ്പി കണ്ണുകളില്‍ നീർത്തളം കെട്ടി നിന്നു.

തുടരും……
@ അയന…..✍

NB : അപ്പോൾ നായികയെ പരിചയപ്പെടുത്തിയിട്ടുണ്ട്… 🥰🥰 അടുത്ത പാര്‍ട്ടില്‍ നായകന്റെ
അടുത്തേക്ക് തിരികെ പോകാം കേട്ടോ.
എല്ലാരോടും നിറയെ സ്നേഹം… 💞

💞 തൂ മഞ്ഞുപോലെ…💞 – 3