💕 തൂ മഞ്ഞുപോലെ…💞- 19

💕 ആദ്യഭാഗം💕  
=========================

“ഞാൻ പോയേച്ചും പെട്ടെന്ന് വരാവേ ആനീ.  നാളെ ഓഫീസിൽ നിന്നും നേരെ ഇങ്ങോട്ട് വരാം.  അതുവരെ അമ്മച്ചി പറയുന്നത് കേൾക്കണം കേട്ടോ. ഭക്ഷണവും മരുന്നും എല്ലാം കഴിക്കണം.”

ഒരു കൊച്ചു കുഞ്ഞിന്നോടെന്ന പോൽ ആനിക്ക് എല്ലാം പറഞ്ഞു കൊടുത്തു ജെസ്സി.  ആനി അതിനൊക്കെയും മൂളി കൊടുത്തു, മറുപടി ഒന്നും പറയാതെ.    അമ്മച്ചിയോടും അപ്പച്ചനോടും ആനിയോടും യാത്ര പറഞ്ഞു ജെസ്സിയും ഗബ്രിയും അവിടുന്ന് ഇറങ്ങി.

________________@@@@@@

ഒരാഴ്ച കൂടി കഴിഞ്ഞാണ് ആന്‍ലിയയെ ആശുപത്രിയില്‍ നിന്നും ഡിസ്ചാര്‍ജ് ചെയ്തത്.  തലയിലെ സ്റ്റിച്ച് വെട്ടുകയും തല മുഴുവനായി മറച്ചു വെച്ചിരുന്ന ആ വലിയ കെട്ട് അഴിച്ചു മാറ്റുകയും ചെയ്തു.  ഇപ്പോൾ തലയുടെ ഒരു വശത്തായി മുറിവിന്റെ ഭാഗത്തു മാത്രം ആയാണ് ഡ്രെസ്സ് ചെയ്തിരിക്കുന്നത്.  ഒന്നിടവിട്ട ദിവസങ്ങളിൽ ഇവിടെ വന്നോ അല്ലെങ്കിൽ അടുത്തുള്ള ഏതെങ്കിലും ഡിസ്പെൻസറിയിലോ പോയി ഡ്രസ്സ് ചെയ്താൽ മതിയെന്നാണ് ഡോക്ടർ പറഞ്ഞിരിക്കുന്നത്.

ആഴത്തിൽ ഉള്ള മുറിവ് ആയിരുന്നതു കൊണ്ടും സർജറി നടന്നതു കൊണ്ടും ഒരു മാസം പൂർണ്ണ ബെഡ് റസ്റ്റ്‌ വേണമെന്നാണ് ഡോക്ടർ പറഞ്ഞത്.  തല അമിതമായി ഇളക്കുകയോ സ്‌ട്രെയിൻ കൊടുക്കുകയോ ചെയ്യരുത്… യാത്രകൾ ഒഴിവാക്കണം എന്നും ഡോക്ടർ പ്രത്യേകം എടുത്തു പറഞ്ഞിട്ടുണ്ട്.  കൂടാതെ ജെസ്സിയെ മാറ്റി നിർത്തി… ആനിക്ക് സ്‌ട്രെസ്സ് ഉണ്ടാവുന്ന… അവളെ വിഷമിപ്പിക്കുന്ന… ഒരു കാര്യവും അവളോട് പറയരുത് എന്നും നിർദ്ദേശിച്ചിട്ടുണ്ട്.

മമ്മി ആനിയെ വീട്ടിലേക്കു കൂട്ടി കൊണ്ടുപോകുവാൻ കുറെയേറെ നിര്‍ബന്ധിച്ചുവെങ്കിലും ആനി അതിനു തയ്യാറായില്ല. പിന്നെ ഡോക്ടറും യാത്ര ഒഴിവാക്കുന്നത് തന്നെയാണ് നല്ലതെന്ന് പറഞ്ഞതു കൊണ്ട് ആശുപത്രിയിൽ നിന്നും ഡിസ്ചാർജ് ആയി ഫ്ലാറ്റിലേക്ക് തന്നെയാണ് പോയത്.

ഒരാഴ്ച കൂടി മമ്മി അവള്‍ക്കൊപ്പം ഫ്ലാറ്റിൽ നിന്നു.  അതിനു ശേഷം ചാച്ചൻ അവിടെ ഒറ്റക്കാണെന്നും പറഞ്ഞ്‌ ആനി തന്നെയാണ് മമ്മിയെ നിർബന്ധിച്ചു തിരികെ പറഞ്ഞ്‌ അയച്ചത്… കാരണം ചാച്ചനു പരസഹായം ഇല്ലാതെ എല്ലാ കാര്യങ്ങളും ഒറ്റക്കു ചെയ്യുവാനാവില്ല.   ഇപ്പോൾ തന്നെ ചാച്ചന്റെ ഇളയ പെങ്ങൾ സിസിലി ആന്റിയാണ് വീട്ടിൽ ചാച്ചനു കൂട്ട് നിൽക്കുന്നത്.  അവർക്കും കുടുംബം ഉള്ളതല്ലേ… എത്രയെന്ന് വെച്ചാണ് അവരെയും ബുദ്ധിമുട്ടിക്കുക.

കഴിഞ്ഞ ആഴ്ച ആശപത്രിയിൽ ആനിയെ കാണാൻ വന്ന സമയം ഇച്ചായനും ഒരു രോഗിയെ പോലെ തൊട്ടടുത്ത ബൈസ്റ്റാൻഡർ ബെഡ്ഡിൽ കിടക്കുന്നതു കണ്ടപ്പോൾ കുഞ്ഞാന്റി തന്നെയാണ് പറഞ്ഞത് ഇച്ചായനെ ഞങ്ങൾ കൊണ്ടു പൊയ്ക്കോള്ളാമെന്ന്.  കുറച്ചു ദിവസം ആന്റി വീട്ടിൽ വന്നു നിക്കാം എന്നും പറഞ്ഞപ്പോൾ,  സത്യത്തിൽ അമ്മച്ചിക്ക് അതൊരു വലിയ ആശ്വാസം തന്നെയായിരുന്നു.  കാരണം അമ്മച്ചിക്ക് രണ്ടാളെയും ഒരേസമയം പരിചരിക്കാൻ  ബുദ്ധിമുട്ട് തന്നെയായിരുന്നു. പകൽ ജെസ്സി ഓഫീസിൽ പോകുന്നത് കൊണ്ട് അവർക്ക് ഒറ്റക്ക് രണ്ടാളുടെയും കാര്യങ്ങൾ നോക്കാൻ നല്ല ബുദ്ധിമുട്ട്  ആയിരുന്നു… കൂടാതെ പരിചയം ഇല്ലാത്ത സ്ഥലവും.

അതിലെല്ലാം ഉപരി അമ്മച്ചി ഒറ്റക്ക് ആണെങ്കിൽ അപ്പച്ചനു ഒരു സഹായത്തിനു ഞാൻ വന്നു നിൽക്കാം എന്ന് തലേ ദിവസം വർക്കി വിളിച്ചപ്പോൾ പറഞ്ഞിരുന്നു.  കടയും മറ്റു കാര്യങ്ങളും ആരെയെങ്കിലും എൽപിച്ചിട്ട് ഉടനേ വരാം എന്നും…,  എന്റെ ആനി കൊച്ചിന്റെ കാര്യം ആവുമ്പോൾ എനിക്ക് വരാതിരിക്കാൻ ആവില്ലല്ലോ എന്നും ദ്വയാർത്ഥത്തിൽ പറയുകയും ചെയ്തു.  അതും കൂടി കേട്ടപ്പോൾ സിസിലി ഇങ്ങനെയൊരു കാര്യം പറഞ്ഞപ്പോൾ  തന്നെ, മറിച്ചൊന്നും ചിന്തിക്കാതെ അമ്മച്ചി സമ്മതിക്കുകയും ചെയ്തു.

ആനിയുടെ അമ്മച്ചിയുടെ അകന്നൊരു ബന്ധത്തിൽ ഉള്ളയാളാണ് വർക്കി.  ഒരു കർക്കടമുഷ്ടിക്കാരൻ… വട്ടപലിശക്കാരൻ.  ആരോടും ഒരല്പം ദയയോ സ്നേഹമോ ഒന്നും കാട്ടാത്ത പ്രകൃതം.  കഠിനാദ്ധ്വാനിയാണ്,  ഒരു രൂപ പോലും വെറുതെ നശിപ്പിച്ചു കളയാതെ ജീവിക്കുന്നവൻ.  എങ്കിലും ആളുടെ ഈ സ്വഭാവം കൊണ്ട് ആർക്കും ഇഷ്ടമല്ല അവനെ.

അന്ന് അപ്പച്ചൻ വീണു ആശുപത്രിയിൽ ആയപ്പോൾ സർജറിക്ക് ആവശ്യമായ പണം ഉടനേ കെട്ടണം എന്ന് പറഞ്ഞപ്പോൾ വേറെ നിവൃത്തിയില്ലാതെ പലിശ കൂടുതൽ ആണെങ്കിൽ കൂടി ഇയാളുടെ കൈയ്യിൽ നിന്നും വാങ്ങിയതാണ്. അല്ലായിരുന്നുവെങ്കിൽ അപ്പച്ചനെ ഈ നിലയിൽ എങ്കിലും തിരിച്ചു കിട്ടില്ലായിരുന്നു  ഞങ്ങൾക്ക്.  അതിന്റെ ഒരു നന്ദി ഉള്ളതു കൊണ്ടാണ് അമ്മച്ചി മറുത്തൊന്നും പറയാത്തതും.

പിന്നീട് ആൽബിച്ചായനു പുറത്തേക്ക് പോകുവാൻ നേരം വീടിന്റെ ആധാരം പണയം വെച്ച് കുറച്ചു കാശ് ബാങ്കിൽ നിന്നും കടം എടുത്തിരുന്നു.  അതിന്റെ തിരിച്ചടവ് കാലാവധി നീണ്ടുപോയപ്പോൾ ബാങ്കുകാർ വീട് ജപ്തി ചെയ്യും എന്ന് പറഞ്ഞപ്പോൾ നിവൃത്തിയില്ലാതെ വീണ്ടും വർക്കിയുടെ കൈയ്യിൽ നിന്നും തന്നെ കാശ് കടം വാങ്ങേണ്ടിവന്നു.

ഇതുവരെ ആനിയും ആൽബിയും പണി എടുക്കുന്നതിൽ മുക്കാൽ ഭാഗവും വർക്കിക്ക് എല്ലാമാസവും അയച്ചു കൊടുക്കുന്നുണ്ടെങ്കിലും ഇപ്പോഴും മുതലിലേക്ക് ആയിട്ടില്ല എന്നാണ് ആൾ പറയുന്നത്.  പകരം ആളിപ്പോൾ  പുതിയൊരു കണ്ടീഷൻ വെച്ചിരിക്കുകയാണ്.  ഇനി കഷ്ടപ്പെട്ട് പലിശയൊന്നും തിരിച്ചടക്കേണ്ടെന്നും പകരം ആനിയെ തനിക്കു വിവാഹം ചെയ്തു തന്നാൽ മതിയെന്നും ആണത്.  അതു കേട്ടപ്പോൾ മുതൽ എന്തെങ്കിലും കാരണം ഉണ്ടാക്കി വരുന്ന അവനോട് അമ്മച്ചിക്ക് വെറുപ്പ് ആണ്.  ആറ്റിൽ കളഞ്ഞാലും എന്റെ മോളെ അവനു കെട്ടിച്ചു കൊടുക്കില്ലെന്ന് അമ്മച്ചി കട്ടായം പറഞ്ഞിരിക്കുവാണ്.

അല്ലെങ്കിൽ തന്നെ അവനു മുന്നിൽ പെട്ടാൽ ചെകുത്താനെ കണ്ട പോൽ വെട്ടിവിറക്കാൻ തുടങ്ങും എന്റെ ആനിമോള്.  ഇപ്പോൾ എന്റെ കൊച്ച് ഒന്നു ഭേദമായി വരുന്നതേയുള്ളൂ… ഇനി അവനെ മുന്നിൽ കണ്ടാൽ അതിന്റെ ഉള്ള ജീവൻ കൂടി അങ്ങു പോകും. അതാണ് സിസിലി ചാച്ചനെ കൊണ്ടുപോകാം എന്നു പറഞ്ഞപ്പോൾ അമ്മച്ചി ഉടനേതന്നെ സമ്മതിച്ചതും.  അല്ലെങ്കിൽ ആ മാരണം ഇങ്ങോട്ട് കെട്ടിക്കയറി വരും എന്ന് അവർക്ക് നന്നായി അറിയാം.

കുഞ്ഞാന്റിക്ക് രണ്ട് ആണും ഒരു പെണ്ണും ആണ്… എൽദോ, എൽബി, എലീസ.  എൽദോച്ചായന്റെയും എലീസ ചേച്ചിയുടെയും വിവാഹം കഴിഞ്ഞു രണ്ടുപേരും ഫാമിലിയോടൊപ്പം വിദേശത്ത് ആണ്.  ഒരാൾ യുകെയിലും ഒരാൾ കാനഡയിലും.  ഇളയ ആൾ എബിച്ചായൻ (എൽബി) ഇവിടെ എറണാകുളത്ത് ഇൻഫോപാർക്കിൽ ഒരു അമേരിക്കൻ ഫേമിൽ സോഫ്റ്റ്‌വെയർ എഞ്ചിനീയർ ആണ്.

എബിച്ചായന്റെ കൂടെയാണ് ആന്റി വന്നത്…  അങ്കിളിനു നാട്ടിൽ റബർ എസ്റ്റേറ്റും പ്ലാന്റേഷനും ഉണ്ട് അതെല്ലാം നോക്കി നടത്തുന്നു.  അവരുടെ വീട്ടിൽ അപ്പച്ചനും അമ്മച്ചിയും എല്ലാവരും ഒരുമിച്ചാണ് താമസം, അതുകൊണ്ട് തന്നെ ആന്റി ഇത്രയും ദിവസം മാറി  നിൽക്കുന്നതിൽ അങ്കിളിനു പ്രശ്നം ഒന്നും ഉണ്ടായിരുന്നില്ല. പക്ഷേ…,  ഇനിയും ആന്റിയെ ബുദ്ധിമുട്ടിക്കുന്നത് ശരിയല്ലല്ലോ.

കുഞ്ഞാന്റി നല്ല സുന്ദരിയാണ്. ആനിക്ക് കുഞ്ഞാന്റിയുടെ അതേ ഛായയാണ് എന്നാണ് എല്ലാവരും പറയുന്നത്.  സിസിലിയുടെ നിറവും സൗന്ദര്യവും ചിരിയും തന്നെയാണ് ആനിക്കും,  ആ സ്വഭാവവും അങ്ങനെ തന്നെ പകർന്നു കിട്ടിയിട്ടുണ്ട്.  സിസിലിയും എല്ലാവരോടും സംസാരിച്ചും…  കളിച്ചും, ചിരിച്ചും, കരുണ കാട്ടിയും നടന്നിരുന്നയാളായിരുന്നു.  അങ്ങനെ പള്ളിയിലും വഴിയിലും ഒക്കെ പലവട്ടം കണ്ടു മോഹിച്ചാണ് പ്ലാന്റർ കുഞ്ഞച്ചന്റെ ഏക മകൻ എബ്രഹാം ആന്റിയോട് ഇഷ്ട്ടം വന്ന് പറയുന്നതും.  കന്യാസ്ത്രീ ആകണമെന്ന് ആഗ്രഹിച്ചു നടന്നിരുന്ന സിസിലിക്ക് പക്ഷേ.., അയാളോട് ഇഷ്ടം തോന്നിയില്ലെന്ന് മാത്രമല്ല… സമ്മതമല്ലെന്ന് തുറന്നടിച്ചു പറയുകയും ചെയ്തു.

പക്ഷേ… അതയാളിൽ വാശി നിറച്ചു.  ഈ പ്ലാന്റർ കുഞ്ഞച്ചന്റെ മകൻ എബ്രഹാം ഒരു പെണ്ണിന്റെ കഴുത്തിൽ മിന്നു ചാർത്തുന്നുണ്ടെങ്കിൽ അതീ സിസിലിയുടെ കഴുത്തിൽ ആയിരിക്കും എന്ന്… അന്നവിടെ ആ പള്ളിയുടെ മുന്നിൽ വെച്ച് ശപദം ചെയ്യുകയും ചെയ്തു ആൾ.  അങ്ങനെ ഗത്യന്തരം ഇല്ലാതെ… ആകെയുള്ള സപുത്രൻ വിവാഹം കഴിക്കാതെ നിന്നാൽ ഈ കണ്ട സ്വത്തുക്കളും കുടുംബവും തന്നെ അന്യാദീനം നിന്നു പോകുമല്ലോ എന്നോർത്തു ആരുടേയും മുന്നിൽ മുട്ടു മടക്കാത്ത പ്ലാന്റർ കുഞ്ഞച്ചൻ അപ്പച്ചന്റെ കാലുപിടിച്ചു കേണപേക്ഷിച്ചിട്ടാണ് അന്ന് കുഞ്ഞാന്റിയുടെയും അങ്കിളിന്റെയും മിന്നുകെട്ട് നടത്തിയത്. സ്ത്രീധനം ഒന്നും വേണ്ട പെണ്ണിനെ മാത്രം മതിയെന്നും പറഞ്ഞിരുന്നു കുഞ്ഞച്ചൻ.

എങ്കിലും അത്രയും വലിയ വീട്ടിലേക്ക് ചെന്നു കയറുന്ന തന്റെ കുഞ്ഞിപ്പെങ്ങൾ ആരുടെ മുന്നിലും തലകുനിച്ചു നിൽക്കരുത് എന്ന് കരുതി, അന്ന് ആകെയുണ്ടായിരുന്ന തറവാടും കുറച്ചു സ്ഥലവും വിറ്റിട്ട് ആണ് കുഞ്ഞാന്റിക്ക് പൊന്നും പണ്ടവും മറ്റും വാങ്ങി നന്നായി തന്നെ ആ വിവാഹം നടത്തിയത് ചാച്ചൻ.  അതിനു ശേഷമാണ് ആനിയുടെ കുടുംബം  മലമുകളിൽ അമ്മച്ചിയുടെ പേരിലുള്ള ഈ സ്ഥലത്തേക്ക് താമസം മാറിയത്.  സിസിലിക്ക് അതിൽ വലിയ ദുഃഖം ഉണ്ടായിരുന്നു….  ഞാൻ കാരണം ആണല്ലോ ഇച്ചായനും കുടുംബവും അങ്ങോട്ട് മാറേണ്ടി വന്നതല്ലോ എന്നോർത്തിട്ട്.

ഇടയ്ക്കിടെ ഞാനും എബിച്ചായനും ഇതൊക്കെ പറഞ്ഞു കുഞ്ഞാന്റിയെ കളിയാക്കാറുണ്ട്.   കർത്താവിന്റെ മണവാട്ടിയാകാൻ നടന്നിരുന്ന കൊച്ചാ… ദേ നോക്കിയേ… ഇപ്പോൾ എബ്രഹാമിന്റെ മണവാട്ടിയും ആയി അങ്ങേരുടെ മൂന്ന് പിള്ളേരുടെ അമ്മയുമായി… എന്നും പറഞ്ഞ്.  അപ്പോൾ കുഞ്ഞാന്റി എന്റെ ചെവിക്കു പിടിക്കും നോവാതെ… പെണ്ണേ നിന്റെ കുറുമ്പ് കൂടുന്നുണ്ട് കേട്ടോ എന്നും പറയും. ആനി ആ പഴയ കാര്യങ്ങൾ ഒക്കെ ഓർത്തു…

കുഞ്ഞാന്റിക്ക് ആനിയോട് ഒരു പ്രത്യേക ഇഷ്ടമാണ്. അങ്കിളിനും അതേ വാത്സല്യം തന്നെയാണ് അവളോട്. അങ്കിൾ എപ്പോഴും പറയും “ഞാൻ ആദ്യമായി എന്റെ സിസിലി കൊച്ചിനെ കാണുമ്പോൾ അവൾ നിന്നെപ്പോലെ തന്നെയായിരുന്നു ഇരുന്നതെന്ന്.   അവരുടെ സ്നേഹവും  കരുതലും കാണുമ്പോൾ എലീസ ചേച്ചി ഇടയ്ക്കിടെ കുശുമ്പ് കുത്തും ആയിരുന്നു.   പക്ഷെ അവൾക്കും ആനിയെ വലിയ പ്രിയമാണ്.  ആനിക്കും അവരെ അത്രക്ക് ഇഷ്ടം ആയിരുന്നു എറണാകുളത്തിനു വരുന്നതിനു മുന്നേ ആനി ആകെ മാറി നിന്നിട്ടുള്ളതും കുഞ്ഞാന്റിയുടെ വീട്ടിൽ മാത്രമാണ്. സ്വന്തം സഹോദരനെക്കാളും ആനിക്ക് കൂട്ടും അടുപ്പവും പണ്ടു മുതലേ എബിച്ചായനോട് ആയിരുന്നു.

ഇപ്പോൾ അവനും എറണാകുളത്തു തന്നെയായത് കൊണ്ട്  ഇടയ്ക്കിടെ ഫ്ലാറ്റിൽ വരികയും ആനിയെയും ജെസ്സിയെയും സിനിമക്കും പുറത്തു കറങ്ങാനും എല്ലാം കൊണ്ടുപോവുകയും ചെയ്യാറുണ്ട്.   ആനിയുടെ ജിത്തേട്ടനെ കുറിച്ചും എബിക്ക് അറിയാം,  കാരണം കുഞ്ഞുന്നാൾ മുതലേ അവൾ എല്ലാ കാര്യങ്ങളും എബിയുമായി പങ്കുവെക്കുമായിരുന്നു.  ഈ കഴിഞ്ഞ ദിവസങ്ങളിൽ എബിയും അവനെ കൊണ്ടാവും വിധം ശ്രീജിത്തിനെ കുറിച്ച് പലവഴിക്ക് അന്വേഷിച്ചിരുന്നു.  പക്ഷേ…, നിരാശയായിരുന്നു ഫലം.

എത്രയൊക്കെ ഓർക്കേണ്ട എന്നു വെച്ചാലും മറക്കാൻ ശ്രമിച്ചാലും ഒടുവിൽ ആ ഓർമ്മകൾ ചെന്നു നിൽക്കുന്നത് അവനിൽ തന്നെയായിരിക്കും.  പക്ഷേ… ഇപ്പോൾ ഒരു വ്യത്യാസം ഉണ്ട്,  എന്തെന്നാൽ ഇപ്പോൾ ഒരിക്കൽ പോലും അവളുടെ കണ്ണിൽ നിന്നും കണ്ണുനീർതുള്ളികൾ അവനെയോർത്തു പൊഴിയാറില്ലെന്നു മാത്രം.  അങ്ങനെ മറവിയുടെ ആഴക്കഴത്തിലേക്ക് തള്ളിയിടാൻ ആവില്ലല്ലോ അവൾക്കവനെ.

ജെസ്സിയും അതേക്കുറിച്ചു പലപ്പോഴും ചിന്തിച്ചിരുന്നു… സർജറിക്കു ശേഷം ജെസ്സിയേറെ ഭയപ്പെട്ടിരുന്ന ആ ചോദ്യം ആനിയിൽ നിന്നും ഇതുവരെ ഉണ്ടായിട്ടില്ല.  ശ്രീജിത്തിനെ കുറിച്ച് ആനി ചോദിച്ചാൽ എന്തു മറുപടി പറയും എന്നോർത്തിരുന്നു ജെസ്സി.  പക്ഷേ… ഒരിക്കൽ പോലും അവൾ അവനെ അന്വേഷിച്ചില്ല.  ഇതെക്കുറിച്ച് ഡോക്ടറോട് ചോദിച്ചപ്പോൾ ഡോക്ടർ പറഞ്ഞത്…  അവളായി ചോദിക്കാത്തിടത്തോളം കാലം നമ്മളായിട്ട് ഒന്നും അങ്ങോട്ട് പറയേണ്ടതില്ലെന്നാണ്.  ആനിയുടെ മനസ്സിൽ എന്താണെന്ന് അവൾക്കു മാത്രമേ അറിയൂ… ആനി അവൾക്കു ചുറ്റും ഒരു വലയം ഉണ്ടാക്കി അതിൽ തന്നെ കഴിയുകയാണ് ഇപ്പോൾ… അതിൽ നിന്നും പുറത്തു കടക്കാൻ അവൾ ആഗ്രഹിക്കുന്നില്ല.  ആനിയുടെ ഈ അവസ്ഥയെ ആണ് ഏറ്റവും കൂടുതൽ ഭയക്കേണ്ടത് എന്നും ഡോക്ടർ പറഞ്ഞു.  അതുകൊണ്ട് തന്നെ കുറച്ചു നാൾ കൂടി അവൾക്കൊപ്പം എപ്പോഴും ഒരാൾ കൂടെയുണ്ടാവണം എന്നും ഡോക്ടർ പ്രത്യേകം എടുത്തു പറഞ്ഞിട്ടുണ്ട്.

ഒരാഴ്ച കൂടി ആനിയുടെ ഒപ്പം നിന്നിട്ട് ആണ് മമ്മി തിരികെ പോയത്.  ശേഷം ഒരാഴ്ച ജെസ്സി ലീവെടുത്ത് ആനിക്കൊപ്പം നിന്നു…., മമ്മി ഉണ്ടായിരുന്ന സമയങ്ങളിൽ ജെസ്സി ഓഫീസിൽ പോയിരുന്നു.  പിന്നീട് മദറും ഷീലയാന്റിയും മാറി മാറി നിന്നു.  ഇടക്ക് ഷാഹിനാത്തയും മജീദിക്കയും… പിന്നെ ചില ദിവസങ്ങളിൽ എബിയും ഉണ്ടായിരുന്നു ആനിക്ക് ഒപ്പം.  അങ്ങനെ അവരെല്ലാവരും ആനിയെ തനിച്ചാക്കാതെ മാറി മാറി പരിപാലിച്ചു കൊണ്ടിരുന്നു.

തലയിലെ മുറിവ് ഉണങ്ങി തുടങ്ങിയെങ്കിലും ആനിയിൽ വലിയ മാറ്റങ്ങൾ ഒന്നും കണ്ടില്ല.  ഇതുവരെ ജിത്തിനെ കുറിച്ച് അവൾ ആരോടും അന്വേഷിച്ചില്ല.  പത്രവാർത്തയോ ടീവിന്യൂസോ ഒന്നും തന്നെ അവൾ നോക്കുന്നുമില്ല…. പക്ഷേ….,

രാത്രിയിൽ എല്ലാവരും ഉറക്കമായ ശേഷം ആനി എഴുന്നേറ്റു ജനാലക്കരികിൽ പോയി പുറത്തേക്ക് നോക്കി നിൽക്കും…
വിശാലമായി കിടക്കുന്ന ആ നീല പരവതാനിയിലേക്ക് കണ്ണും നട്ട്.    ആ നിശബ്ദതയിൽ… അവൾക്കു കൂട്ടായി ഇരുളും… ഇടയ്ക്കു മിന്നുന്ന താരകങ്ങളും മാത്രം.   അപ്പോൾ അവളുടെ മനസ്സിൽ… ഒരുവന്റെ മുഖം മാത്രമായിരിക്കും… അവനെ കുറിച്ചു മാത്രമോർത്ത്…  അവന്റെ ഓർമ്മകളിൽ… അങ്ങനേയിരിക്കും അവൾ നേരം പുലരുന്നത് വരെ…

“നിന്നെ ഞാൻ പ്രണയിച്ചിരുന്നത്
ഈ ഏകാന്തതയിലാണ്…

നിന്നോട് മൊഴിയുവാനുള്ളതെല്ലാം
രാത്രിയുടെ നിശബ്ദമാം ഏകാന്തതയിൽ…
മൗനത്തെ കൂട്ടുപിടിച്ചു ഞാൻ
മൊഴിഞ്ഞു തീർത്തു…..

വർണ്ണാഭമേകി ചിത്രശലഭങ്ങളേറെ
എനിക്കു ചുറ്റും പാറി നടന്നിരുന്നുവെങ്കിലും…
എൻ നയനങ്ങൾ തിരഞ്ഞിരുന്നത്…
മറ്റെന്തിനെയോ ആയിരുന്നു….

അയന….. ✍️

തുടരും…. @