സദ്യ വിശേഷം

കഴിഞ്ഞ ദിവസത്തെ ഒരോണസദ്യ വിശേഷം.

സദ്യ നല്ല സദ്യ. എല്ലാ വിഭവങ്ങളും നന്നായിരുന്നു പക്ഷേ, സദ്യ കഴിച്ചത് അത്രയേറെ വെറുത്തുകൊണ്ടാണ് എന്ന് മാത്രം. വെറുത്തു പോയത് എങ്ങനെയെന്ന് വെച്ചാൽ വിളമ്പുകാരുടെ നിസ്സഹകരണം ഒന്നുകൊണ്ടു മാത്രം. തൊടുകറികൾ അടക്കം എല്ലാം തോന്നിയപോലെ തോന്നിയ സ്ഥലത്ത് കൂടാതെ രണ്ടാമത് ചോദിക്കുന്ന വിഭവങ്ങൾ സമയത്ത് തരുന്നില്ല വരുന്നതോ വേറെ വിഭവങ്ങൾ. 😠

സദ്യയിൽ വിളമ്പാൻ ഞാനും പോയിട്ടുണ്ട്. ശ്രീ. രഘുച്ചേട്ടൻ തരുന്ന നിർദ്ദേശം ചിട്ടയോടെ പാലിച്ചുകൊണ്ടായിരുന്നു ഞങ്ങൾ അത് ചെയ്തിരുന്നത്. ഓരോരുത്തർ വിളമ്പേണ്ട വിഭവങ്ങൾ അത് ഉപ്പ് തൊട്ട് പായസം പിന്നെ മോര് വരെ വിളമ്പേണ്ടവരെ നിശ്ചയിക്കുകയും, ഇലയിൽ ഉപ്പ് തൊട്ട് തൊടുകറികൾ എല്ലാം വിളമ്പേണ്ട കൃത്യസ്ഥലം വരെ പറഞ്ഞു തരുകയും ചെയ്തിരുന്നു. ഏവരും സംതൃപ്തരായിരുന്നു എന്തെന്നാൽ ഒരു കാത്തിരിപ്പും കൂടാതെ എല്ലാ വിഭവങ്ങളും യഥാസമയം ഏവർക്കും കിട്ടിയിരുന്നു എന്നത് തന്നെ.

വിഭവങ്ങൾ എത്ര തന്നെ നന്നായാലും വിളമ്പുകാർ അലമ്പിയാൽ അലങ്കോലമാവും എല്ലാം. ചിലസ്ഥലങ്ങളിൽ നടന്ന സംഭവവികാസങ്ങൾ ഒക്കെ ഞാനടക്കം ഏവരും ചിരിച്ചു തള്ളിയെങ്കിലും, ഉടലെടുത്തത് ഇങ്ങനെയുള്ള സാഹചര്യങ്ങൾ മൂലമാവാനും സാധ്യത ഇല്ലാതില്ല.

വിളമ്പുന്ന രീതി ഒന്ന് പറയാം.👇🏼

ഇടത് വശത്ത് നിന്നും വലത്തോട്ട് വിഭവങ്ങള്‍ വിളമ്പണമെന്നാണ് പറയുക. ഇലയുടെ ഇടത്തേ മൂലയിൽ ഉപ്പ്, കായ വറുത്തത്, ശര്‍ക്കര വരട്ടി, പപ്പടം, പഴം പിന്നീട് തൊട്ട് മുകളിലായി ഇഞ്ചി പുളി, ഇഞ്ചിക്കറി, മാങ്ങാ നാരങ്ങാ അച്ചാറുകൾ തുടര്‍ന്ന് കിച്ചടി, പച്ചടി, അവിയല്‍, തോരന്‍, കൂട്ടുകറി, എരിശ്ശേരി, ഓലൻ, കാളൻ എന്നിവയും വിളമ്പുന്നു. കറിയെല്ലാം വിളമ്പിയാല്‍ ഇലയുടെ താഴത്തെ ഭാഗം മദ്ധ്യത്ത് ചോറ് വിളമ്പും. ചോറിന്റെ വലത്തെ പകുതിയില്‍ പരിപ്പും നെയ്യും അതിനു ശേഷം സാമ്പാര്‍ പിന്നെ പുളിശ്ശേരി ശേഷം രസം പിന്നീട് പായസം അത് കഴിഞ്ഞ് മോര് അല്ലെങ്കിൽ രസം കൂട്ടി അല്പം ചോറും കൂടി കഴിച്ചാൽ അടിപൊളിയാവും ഊണ്. ചിലയിടങ്ങളിൽ മേൽപ്പറഞ്ഞ വിഭവങ്ങളേക്കാൾ കൂടുതൽ വിഭവങ്ങൾ ഉണ്ടാവാറുണ്ട്.

‘ഓണം ഉണ്ടറിയണം’ അത് കേമമാകണമെങ്കിൽ മികച്ചരീതിയിൽ വിളമ്പിക്കൊടുക്കുക കൂടി വേണം.

ചിത്രത്തിന് കടപ്പാട് : ഗൂഗിൾ