🌐ഇന്റർനെറ്റ് പോയ നാട്🌐

ലോകം മുഴുവനും ഡിജിറ്റൽ ആയിരിക്കുന്നു. പുസ്തകങ്ങളില്ല കത്തുകൾ ഇല്ല ഒപ്പുകളില്ല. ജനിക്കുന്ന കുഞ്ഞിനു പോലും ഡിജിറ്റൽ ഐഡി മാത്രമാണ് ഉള്ളത്. മനുഷ്യരുടെ ഓർമ്മകൾ പോലും ക്ലൗഡിൽ സൂക്ഷിക്കുന്ന കാലം.

പഴയകാലത്തെ ആളുകളുടെ സന്തോഷവും സങ്കടവും പ്രണയവും കാത്തിരിപ്പും എല്ലാം വഹിച്ചിരുന്നത് കത്തുകളിൽ കൂടെ ആയിരുന്നു. ആ കത്ത് എന്താണെന്ന് പോലും പുതുതലമുറയ്ക്ക് അറിയില്ല. അതൊക്കെ അറിയുമ്പോൾ തന്നെ അവർക്ക് അത്ഭുതമാണ്. ഡിജിറ്റൽ ലോകത്തിനിടയിൽ നഷ്ടപ്പെട്ടുപോയ മനുഷ്യസ്പർശം തിരികെ കൊണ്ടുവരാൻ ഈ പുതുതലമുറയ്ക്ക് കഴിയുമോ എന്ന് അറിയില്ല. കത്ത് വായിക്കുമ്പോൾ കിട്ടുന്ന സന്തോഷവും സുഖവും ഹൃദയങ്ങൾ തമ്മിലുള്ള അടുപ്പവുമൊന്നും ഡിജിറ്റൽലോകത്ത് കിട്ടില്ല. അങ്ങനെയിരിക്കെ ഒരു നാൾ ഡിജിറ്റൽ ഇല്ലാതായി.
രാവിലെ 5 മണിക്ക് ഉണർന്ന ഉടനെതന്നെ ശാന്തേച്ചി ഫോണിൽ വാട്സ്ആപ്പ് തുറക്കാൻ നോക്കി.

“അയ്യോ…. ഇതെന്തുപറ്റി?” ശാന്തേച്ചി ഉച്ചത്തിൽ വിളിച്ചു. “രാമേട്ടാ രാമേട്ടാ”

ഭർത്താവ് ചാടി എഴുന്നേറ്റു, “എന്തുപറ്റി കള്ളനോ മറ്റോ…”

“അല്ല അതിനേക്കാൾ വലുത്. വാട്സ്ആപ്പ് കിട്ടുന്നില്ല. ”

ഉടുമുണ്ട് കിട്ടാതെ കയ്യിൽ കിട്ടിയ പുതപ്പ് ഉടുമ്മുണ്ടാക്കി. രാമേട്ടൻ ഫോൺ കയ്യിൽ എടുത്തു. ശരിയാണ് ഫോണിൽ ഒന്നും കിട്ടുന്നില്ല. ഫേസ്ബുക്കില്ല ഇൻസ്റ്റാഗ്രാമില്ലാ യൂട്യൂബിൽ ഇല്ല. പെട്ടെന്ന് ഒരു ദിനം ഇനി ഡിജിറ്റൽ ലോകമില്ല എന്നറിഞ്ഞു. എല്ലാവരും പഴയ രീതിയിലേക്ക് മടങ്ങുക. ആദ്യദിവസം എല്ലാവരും വിഷമിച്ചു. പിന്നീട് അത് വെപ്രാളമായി മാറി. ഭാര്യ ഭർത്താവിനെയും ഭർത്താവും ഭാര്യയും പണ്ടെങ്ങോ കണ്ടതുപോലെ നോക്കി.

ഭാര്യ ഭർത്താവിനോട് ചോദിച്ചു “രാമേട്ടാ നിങ്ങളുടെ മീശ നരച്ചു പോയല്ലോ ”

അയാൾ പറഞ്ഞു “നാലൂകൊല്ലമായി നരച്ചിട്ട് അതിരിക്കട്ടെ. നീ എന്താ ഈ ചുരിദാർ ഇട്ടിരിക്കുന്നത്? നീ മുണ്ടും നേര്യതും ആയിരുന്നില്ലേ ഉടുത്തുകൊണ്ടിരുന്നത്?”

“രാമേട്ടാ ഞാൻ നാല് നാലഞ്ച് കൊല്ലമായി ചുരിദാർ ഇടാൻ തുടങ്ങിയിട്ട് നിങ്ങൾ ഇതുവരെ കണ്ടില്ലേ”

രണ്ടുപേരും പരസ്പരം കുറ്റപ്പെടുത്തി. സത്യത്തിൽ വീടിന്റെ പരിസരമോ അയൽക്കാരയോ പോലും ഫേസ്ബുക്കിൽ മാത്രമേ കാണുന്നുണ്ടായിരുന്നൊള്ളു.

ഉച്ചയ്ക്ക് ഊണ് കഴിക്കാൻ വന്ന മകൻ ആദ്യമായി ഫോൺ കയ്യിൽ ഇല്ലാതെ ഊണ് കഴിക്കാൻ ഇരുന്നു. പക്ഷേ അവന് മീൻ കറി കണ്ടിട്ട് മനസ്സിലായില്ല.

നെറ്റ് പോയി മൂന്നാം ദിവസം തൊട്ട് എല്ലാവരും പരസ്പരം സംസാരിച്ചു തുടങ്ങി.

മീനുക്കുട്ടി കരയാൻ തുടങ്ങി. “അമ്മേ, എന്റെ 347 ദിവസത്തെ ഇൻസ്റ്റാഗ്രാം സ്ട്രീക്ക് പോയി.”

അമ്മ ചോദിച്ചു “മോളെ നീ 34 ദിവസം തുടർച്ചയായിട്ട് കുളിച്ചിട്ടുണ്ടോ?”

അവൾ മുഖം കനപ്പിച്ച് അടുത്ത മുറിയിലേക്ക് പോയി.

പത്താം ക്ലാസിൽ പഠിക്കുന്ന സച്ചു പറഞ്ഞു “അച്ഛാ ഇനി ഞാൻ പഠിക്കാൻ എന്ത് ചെയ്യും?”

അച്ഛൻ വളരെയധികം സന്തോഷത്തോടെ പറഞ്ഞു “പുസ്തകം വായിച്ചുപഠിക്കു.”

അതെങ്ങനെ അവൻ അസ്വസ്ഥനായി.

രാമേട്ടൻ യൂട്യൂബ് പാചകം വിദഗ്ധനായിരുന്നു. എല്ലാ ദിവസവും വീഡിയോ ഇടുകപതിവായിരുന്നു. വീഡിയോ ഇടാൻ പറ്റാത്ത വീട്ടിലിരുന്ന് ആകെ മുഷിഞ്ഞു. വൈകുന്നേരം എല്ലാ വീട്ടിലെയും കുട്ടികൾ മുറ്റത്തിറങ്ങി. അവർ റോഡിൽ കളിക്കാൻ തുടങ്ങി കുട്ടികൾ വരാൻ വൈകിയപ്പോൾ മാതാപിതാക്കൾ അന്വേഷിച്ചിറങ്ങി വളരെ കാലങ്ങൾക്ക് ശേഷം മണ്ണിലും ചളിയിലും കളിക്കുന്ന കുട്ടികൾ നാട്ടുകാരിൽ കൗതമുണർത്തി.
ഏറ്റവും പ്രയാസം ഉണ്ടായത് 60 വയസ്സ് കഴിഞ്ഞവർക്കായിരുന്നു. എന്നും ആറ് ഏഴും ഗ്രൂപ്പുകളിൽ പൂക്കളും സൂര്യോദയം ഇട്ട് ശുഭദിനം ഇടാൻ സാധിക്കാത്തതിൽ.

ശാന്തേച്ചി വളരെ ദുഃഖിതയായി ഗുഡ്മോർണിംഗ് അയക്കാൻ സാധിക്കാത്തതിൽ അതിനാൽ അവർ എല്ലാ വീട്ടിലും കയറിയിറങ്ങി ശുഭദിന ആശംസകൾപറഞ്ഞു. ആളുകൾ അത് കണ്ട് അത്ഭുതപ്പെട്ടു ഇത്രയും നല്ലൊരു ഗുഡ്മോർണിംഗ് മെസ്സേജ് ഇതുവരെ കിട്ടിയിട്ടില്ല. രാമേട്ടൻ പറഞ്ഞു ന്യൂസ് പേപ്പർ കൂടി എല്ലാ വീട്ടിലും കൊടുത്തിരുന്നെങ്കിൽ നിനക്ക് ഒരു വരുമാനമാകുമായിരുന്നു. അടുത്ത വീട്ടിലെ ദേവയാനി വർഷങ്ങളായി ഫേസ്ബുക്കിൽ മാത്രം കണ്ടിരുന്ന മകളെ നേരിൽ കണ്ടു അവർ അതിശയിച്ചു. ഇത്രയും മോശമായിരുന്നോ എന്റെ മകൾ. ഫേസ്ബുക്കിൽ കാണുമ്പോൾ എത്ര സുന്ദരിയായിരുന്നു. അവർ മൂക്കത്ത് വിരൽ വെച്ചു. ഫേസ്ബുക്കിലൂടെ മാത്രം പരിചയമുള്ള തന്റെ കാമുകിയെ നേരിൽ കണ്ട് ഗൾഫുകാരൻ പയ്യൻ ഞെട്ടി. ഈ കോലത്തിനെയാണോ ഏ ഐ ഐശ്വര്യ റായിയെപ്പോലെ മിനുക്കു പണി ചെയ്തെടുത്തത്.

ദിവസങ്ങൾ കഴിഞ്ഞു രാമേട്ടനും ശാന്തേച്ചിയും സ്വന്തം പറമ്പിലേക്ക് ഇറങ്ങി വാഴക്ക് തടമെടുക്കുവാനും ചീര കൃഷി ചെയ്യുവാനും ഒക്കെ അവർ സമയം കണ്ടെത്തി. ഒരിക്കൽ വാഴയ്ക്ക് തടമെടുത്ത് നിൽക്കുമ്പോൾ രാമേട്ടൻ ശാന്തേച്ചിയോട് പറഞ്ഞു. ഞാൻ നിന്നോട് പറയാത്ത ഒരു കാര്യമുണ്ട് ഇനി അത് പറഞ്ഞില്ലെങ്കിൽ ശരിയാകത്തില്ല എന്താ ശാന്തേച്ചി ജിജ്ഞാസ പുറത്തു കാണിക്കാതെ ചോദിച്ചു.

“ഞാൻ നിന്റെ മുറിയിൽ നിന്നും വേറെ മുറിയിലേക്ക് കിടപ്പ് മാറിയത് എന്തിനാണെന്ന് നീ എന്നോട് പലപ്രാവശ്യം ചോദിച്ചു ഞാൻ അത് പറഞ്ഞില്ല ഇനി അത് പറഞ്ഞില്ലെങ്കിൽ എനിക്കൊരു മനസ്സമാധാനം കിട്ടത്തില്ല. എനിക്ക് പുതിയ ഒരു ബന്ധം വാട്സ്ആപ്പ് ചാറ്റ് വഴി കിട്ടിയിരുന്നു.”

ശാന്തേച്ചി ഞെട്ടി. “അതാര്”

മാധുരി അവളും ഞാനും കൂടി എന്നും രാത്രിയിൽ ചാറ്റ് ചെയ്യുമായിരുന്നു ഇപ്പോൾ അത് ഒക്കെ തെറ്റായിരുന്നു എന്ന് തോന്നുന്നു ഇത്രയും നല്ല ഭാര്യയെ ഞാൻ  കബളിപ്പിച്ചു വല്ലോ എന്നോർത്തപ്പോൾ വലിയ പ്രയാസം”

ശാന്തേച്ചി കണ്ണുതുറിച്ച് രാമേട്ടനെ നോക്കി. രാമേട്ടൻ കരുതി ഇതോടെ തന്റെ ജീവിതാവസാനിച്ചു.

ശാന്തേച്ചി പതുക്കെ ചോദിച്ചു “നിങ്ങളുടെ പേര് ദിലീപ് എന്നായിരുന്നോ?”

“അതെ അത് നിനക്ക് എങ്ങനെ മനസ്സിലായി.”

“ആ മാധുരി ഞാനായിരുന്നു. ”

രണ്ടുപേർക്കും ചിരി അടക്കാൻ കഴിയാതെ വാഴത്തടത്തിലിരുന്ന് അവർ പൊട്ടി പൊട്ടി ചിരിച്ചു. വയസ്സ് കാലത്തെ ഓരോ പൂതിയേ മക്കൾ അറിയേണ്ട ശാന്തേച്ചി പറഞ്ഞു. ഓൺലൈൻ വഴി ചെയ്തിരുന്ന എല്ലാ കാര്യങ്ങളും ബാങ്കിലെ കാര്യങ്ങൾക്കും ഇലക്ട്രിസിറ്റിബില്ല് വാട്ടർ ബില്ല് എന്നിവഅടയ്ക്കാനായി പഴയപോലെ ആളുകൾ ക്യൂവിൽ നിൽക്കുവാൻ തുടങ്ങി. കാലം കുറെ കഴിഞ്ഞു സർക്കാരിന്റെ പ്രത്യേക അറിയിപ്പ് ഇന്റർനെറ്റ് തിരികെ വന്നിരിക്കുന്നു. കുട്ടികൾ സന്തോഷിച്ചു. പക്ഷേ ചിലർക്ക് ചെറിയൊരു സങ്കടം കാരണം ആ കഴിഞ്ഞ ദിവസങ്ങളിൽ അവർ മനസ്സിലാക്കിയ ഒരു സത്യം ഉണ്ടായിരുന്നു ഫേസ്ബുക്കിൽ 5000 സുഹൃത്തുക്കൾ ഉണ്ടായിട്ടും അടുത്ത വീട്ടിലെ ആളുകളുടെ പേര് പോലും അറിയാൻ കഴിഞ്ഞില്ല അതിന് ശ്രമിച്ചിട്ടും ഇല്ല. ഇൻസ്റ്റഗ്രാമിൽ പത്ത് ഇരുപതും ഫോട്ടോ പോസ്റ്റ് ചെയ്യുന്നുമ്പോൾ മുറ്റത്ത് നിൽക്കുന്ന മാവിൽ മാങ്ങ ഉണ്ടോ എന്ന് അറിയുമായിരുന്നില്ല യൂട്യൂബിൽ മറ്റുള്ളവരുടെ കഥകൾ വായിക്കുമ്പോൾ വീട്ടിലെ സ്വന്തം അച്ഛന്റെ ആവശ്യങ്ങൾ അറിഞ്ഞിരുന്നില്ല.

രാമേട്ടൻ അമ്പലമുറ്റത്തെ ആൽത്തറയിൽ സോറ പറഞ്ഞിരിക്കുമ്പോൾ ആരോ വന്നു പറഞ്ഞു. “നാളെ മുതൽ നെറ്റ് തിരികെ വരുന്നു”

രാമേട്ടൻ പറഞ്ഞു. “നെറ്റ് പോയപ്പോൾ എനിക്ക് തോന്നിയത് ലോകം അവസാനിച്ചു എന്നായിരുന്നു. പിന്നെ മനസ്സിലായി ലോകം തുടങ്ങിയതേയുള്ളൂ എന്ന്. ഇപ്പോഴാണ് എന്റെ ഭാര്യയെ ഞാൻ സ്നേഹിച്ചു തുടങ്ങിയത്. അടുത്ത ഒരു ഹണിമൂൺ ട്രിപ്പ് ഞങ്ങൾ പ്ലാൻ ചെയ്തിരിക്കുകയാണ്.”

അതുകേട്ട് ചുറ്റും ഉണ്ടായിരുന്നവർ മുഴുവൻ ചിരിച്ചു കാരണം രാമേട്ടനെ പോലെ അവർ ഓരോരുത്തരും മനസ്സിൽ പ്ലാൻ ചെയ്യുകയായിരുന്നു…..

വിഷയം : ഡിജിറ്റൽ അല്ലാത്ത ലോകം