അയാളുടെ ബൈക്കിന്റെ ഹോൺ ഹൗസിങ് കോളനിയുടെ വളവിൽ കേട്ടപ്പോഴേ അവൾ, ഗേറ്റ് തുറന്നു കാത്തു നിന്നു.
ബൈക്ക് സ്റ്റാൻഡിലിട്ടു ബാഗ് എടുത്ത്, അയാൾ മുന്നോട്ട് നീങ്ങുമ്പോൾ ഗേറ്റ് അടച്ച് ഒപ്പമെത്തി അവൾ ഉത്സാഹത്തോടെ പറഞ്ഞു, “അതെ ചേട്ടാ, ഇന്നെന്താ സംഭവിച്ചത് എന്നറിയുമോ?”
“ശ്ശോ.. എനിക്ക് നല്ല തലവേദന.. ചെലച്ചോണ്ട് നിൽക്കാതെ ഒരു ചായ എടുത്തേ…” അയാൾ ഈർഷ്യയോടെ പറഞ്ഞു.
മുഖം തെല്ലു മങ്ങിയെങ്കിലും അവൾ വേഗത്തിൽ ചായയും പലഹാരവും അയാൾക്ക് മുന്നിൽ നിരത്തി.
![](https://koottaksharangal.com/wp-content/uploads/2023/08/ad_Banner_1-copy.webp)
അയാൾ അത് കഴിക്കുന്നതിനിടെ, അവൾ വീണ്ടും തുടക്കമിട്ടു… “പിന്നെ ഞാൻ നേരത്തെ പറയാൻ വന്നത് എന്താന്നറിയോ?”
അയാളുടെ ശ്രദ്ധ ടെലിവിഷനിൽ മിന്നി മായുന്ന ചാനൽ ചർച്ചകളിലേക്ക് തിരിയുമ്പോൾ മങ്ങിയ മുഖത്തോടെ അവൾ തിരിഞ്ഞു നടന്നത് അയാൾ കണ്ടില്ല.
വെച്ചു വിളമ്പിയും വിഴുപ്പലക്കിയും തൂത്തു തുടച്ചും കഴിയുന്നവളെ ശ്രദ്ധയോടെ കേൾക്കാൻ ഒരല്പം സമയം നീക്കി വെക്കുന്നതാണ് അവളോട് കാണിക്കാവുന്ന ഏറ്റവും വലിയ പരിഗണന എന്ന് അയാൾ അറിയാതെ പോയി!