രണ്ടു ഭാഷകളുടെ മകൾ !

എനിക്ക് രണ്ട് മാതൃഭാഷകൾ – മലയാളവും തമിഴും.

രണ്ട് അമ്മമാർ എന്ന ഭാഗ്യം എത്ര പേർക്കുണ്ട്?!

പൂർവ്വികർ തിരുവിതാംകൂറിൻ്റെ മണ്ണിൽ വിരിഞ്ഞ പൂക്കൾ, 
സ്വാതന്ത്ര്യത്തിൻ്റെ കാറ്റിൽ കേരളത്തിലും തമിഴ്‌നാട്ടിലും വിതറിപ്പോയ വിത്തുകൾ.

പലർക്കും എൻ്റെ മലയാളം പ്രാവീണ്യത്തെക്കുറിച്ച് സംശയം, 
എൻ്റെ സംസ്കാരത്തിൻ്റെ വൈവിധ്യം അവർക്ക് മനസ്സിലാകാത്തതുകൊണ്ട്.
ഞാൻ രണ്ടു ഭാഷകളുടെയും മകൾ, അഭിമാനത്തോടെ ഞാൻ ആ സത്യം വിളിച്ചു പറയുന്നു.

കേരളത്തിന്റെ മണ്ണിൽ ജനിച്ച ഞാൻ, ഒന്നാം ക്ലാസ് മുതൽ പഠിച്ചതും, 
സ്കൂളിൽ ഒന്നാമതെത്തിയതും മലയാളഭാഷ ! 
കൂടുതൽ ഒഴുക്കോടെ സംസാരിക്കുന്നതും, എഴുതുന്നതും മലയാളത്തിൽ. 
വിഷു, തിരുവോണം, എല്ലാ ആഘോഷങ്ങളും ഈ ഭാഷയിൽ. 
മലയാളം എന്റെ അമ്മ, എന്റെ ജീവിതത്തിന്റെ പകുതി.

എന്റെ വേരുകൾ തമിഴ്‌നാട്ടിൽ, തമിഴ് ഭാഷ എന്റെ പൈതൃകം. 
വീട്ടിൽ തമിഴ് സംസാരിക്കുന്നു, തമിഴ് ഉത്സവങ്ങൾ ആഘോഷിക്കുന്നു.
എനിക്ക് തമിഴ് ഭാഷ എഴുതാനും വായിക്കാനും കഴിയും.
തമിഴ് എന്റെ അമ്മ, എന്റെ ഹൃദയത്തിന്റെ ഭാഷ.

ഞാൻ അനന്തപുരിയുടെ മകൾ, നാഞ്ചിൽനാടിൻ്റെ മരുമകൾ*. 
എൻ്റെ പൂർവ്വികർ പണ്ട് നെയ്തെടുത്ത നൂലിൻ്റെ തുടർച്ചയാണ് ഞാൻ, 
രണ്ടു സംസ്കാരങ്ങളുടെ സംഗമം, രണ്ടു ഭൂമികളുടെ സന്തതി, രണ്ടു ഭാഷകളുടെ ഗാനം.

രണ്ടു ഭാഷകളും എൻ്റെ ജീവിതത്തിൻ്റെ ഭാഗം, 
രണ്ടു സംസ്കാരങ്ങളും എൻ്റെ ധമനികളിൽ ഒഴുകുന്ന രക്തം.

ഞാൻ രണ്ട് ഭാഷകളിലും പുസ്‌തകങ്ങൾ എഴുതിയിട്ടുണ്ട്, 
രണ്ട് സംസ്ഥാനങ്ങളിൽ നിന്നുമുള്ള സിനിമകൾ ആസ്വദിക്കുന്നു, 
രണ്ട് രീതികളും പാചകം ചെയ്യാൻ കഴിയും !

ആഴത്തിൽ രണ്ടു ഭാഷകളും അറിയാത്തതിൽ എനിക്ക് ദുഃഖമുണ്ട്. 
രണ്ടിടത്തും എനിക്ക് പൂർണമായ അംഗീകാരം ലഭിക്കാത്തതും വേദനാജനകം. 
എങ്കിലും, രണ്ടും എൻ്റെ അഭിമാനം,രണ്ടും എൻ്റെ ഐഡന്റിറ്റി!