നിലാത്തിരി – പുസ്തകാവലോകനം

നിലാത്തിരി – ലേഖ ജസ്റ്റിൻ
No: pages – 131
പ്രസാധകർ- ഫേബിയൻ ബുക്സ്
വില – 230 രൂപ

നമ്മുടെ സമൂഹത്തിൽ ഒരു ചോദ്യചിഹ്നമായി നിലനിൽക്കുന്ന പലവിധ സമസ്യകൾക്കുനേരെ പലവിധ ചിന്താഭാരങ്ങൾക്കുനേരെ പലവിധ ക്രൂരതകൾക്കും, വിവേചനങ്ങൾക്കും, മാറ്റിനിർത്തലുകൾക്കും, മനുഷ്യത്വമില്ലായ്മകൾക്കും നേരെ നീട്ടി വച്ചിരിക്കുന്ന ഒരു നിറവിളക്കായി നിലാത്തിരിയെ അടയാളപ്പെടുത്തട്ടെ.

“സമൂഹത്തിൽ മനുഷ്യർക്കിടയിലെ വേർതിരിവുകളും സ്നേഹരാഹിത്യവും ഉള്ളുനോവിച്ചപ്പോൾ തൂലികയേറ്റുപിടിച്ച ഒരുപിടി എഴുത്തുകൾ” എന്ന് പറഞ്ഞുകൊണ്ട് എഴുത്തുകാരി തുടങ്ങിവച്ച ആമുഖം മുതൽ അവസാന തലക്കെട്ടായ “എന്റെ ജീവിതം എന്റെ പ്രവാസം”വരെയുള്ള എന്റെ വായനയിൽ അടിവരയിട്ടു വച്ച ഒരുപാടൊരുപാട് വരികളെയും കൂടെ കൂട്ടി അല്ലെങ്കിൽ ഒന്നൂടെ മനസ്സിൽ ഊട്ടിയുറപ്പിച്ച് ഞാനെന്റെ വായന അവസാനിപ്പിക്കുന്നു.

“എനിക്ക് ചുറ്റുമുള്ള ഒരു മനുഷ്യന്റെയെങ്കിലും ഇരുളടഞ്ഞ ചിന്തകൾക്കുമേൽ ഇറ്റുവെട്ടം പകരുവാൻ ഈ എഴുത്തുകൾക്കായെങ്കിൽ എന്ന ആശ മാത്രം, ഒരു മനുഷ്യൻ എങ്കിലും പ്രചോദിതനായെങ്കിൽ, ഉയിർപ്പുണ്ടായെങ്കിൽ എന്ന പ്രതീക്ഷ മാത്രം” എന്ന് എഴുതിയത് വായിച്ച് തുടങ്ങിയ താളുകൾ ആനയിച്ചത് ജി. എസ്. പ്രദീപ്, പി.കെ അനിൽകുമാർ, എച്ച്മുക്കുട്ടി തുടങ്ങിയ പ്രമുഖ സാമൂഹ്യപ്രവർത്തകരും എഴുത്തുകാരുമായവരുടെ ആശംസകളിലേക്കാണ്. തീർച്ചയായും അവരുടെ ആശംസാവരികളേക്കാൾ ഏറെയേറെ മുകളിലാണ് നിലാത്തിരി ചെന്ന് നിന്നത്.

തൂലിക പടവാളാക്കുക എന്ന ആശയത്തിൽ ഊന്നിയ രചനകളിലേക്ക് ഇന്നിന്റെ സംഭാവന.
Colour discrimination, വാർദ്ധക്യം, വിവാഹവും പുതുതലമുറയും, LGBTQIA +, ആത്മഹത്യ, വിവാഹമോചനം, മെനോപോസ്, സൈബർ ബുള്ളിയിങ്, വൈധവ്യം, തുടങ്ങി എന്തിനേറെ പറയുന്നു മേക്കപ്പും വ്യക്തിസ്വാതന്ത്ര്യവും മുതൽ ചൊല്ലുകളിലും താരതമ്യങ്ങളിലും വ്യക്തമായ അതിരുകൽപ്പിക്കലുകളിലും മാറ്റിനിർത്തലുകളിലും അടിച്ചമർത്തലുകളും “അടക്കിയൊതുക്കി നിർത്തി പോന്ന” സ്ത്രീകളുടെ ഉയിർത്തെഴുന്നേൽപ്പിന്റെ, സ്വയം പ്രഖ്യാപനങ്ങളുടെ രക്തംപൊടിയുന്ന അതിജീവനത്തിന്റെ വരികൾ എപ്പോഴുമെപ്പോഴും ഏതാണ്ട് എല്ലാതാളുകളിലും കയറിയിറങ്ങിപോകുന്നത് കണ്ടു. സ്ത്രീകൾ തന്നെ സ്ത്രീകൾക്ക് നേരെ ചങ്ങലകൾ നീട്ടുന്ന കാലഘട്ടത്തിൽ ഇതാ ഒരു സ്ത്രീ ഇരുകൈകളും നീട്ടി അവർക്കുവേണ്ടി അവരിലൊരാളായി അവർക്കൊപ്പം നില്കുന്നു.

സാമൂഹികമായ എല്ലാ വിഷയങ്ങളിലും ഇത്രയേറെ ശ്രദ്ധയോടെ സമൂഹത്തിലേക്ക് കണ്ണും കാതും തറപ്പിച്ച് ഓരോവിഷങ്ങളെയും ഗ്രാഹ്യമായി അപ്രഗ്രഥിച്ചിരിക്കുന്നതിൽ പരിഹാരങ്ങളുണ്ട് അഭിപ്രായങ്ങളുണ്ട്.. എന്തുകൊണ്ട് ? എന്നുണ്ട്, എന്തുചെയ്യാം എന്നുണ്ട്, എന്തുചെയ്യരുത് എന്നുണ്ട്. അറിയാതിരുന്ന ഒരുപാട് കാര്യങ്ങൾ അറിഞ്ഞു. കാണാതിരുന്ന ഒരുപാട് വശങ്ങൾ കണ്ടു. ഇനിയുമേറെ സൂക്ഷമതയോടെ കാര്യങ്ങൾ വിശകലനം ചെയ്യേണ്ടതുണ്ടെന്ന ചിന്ത വളർന്നു.

ഓരോ വിഷയവിശകലനങ്ങൾക്കുമിടയിൽ കടന്നുവന്ന illustrations മനോഹരം എന്ന വാക്കിനാലല്ല brilliant എന്ന വാക്കിനാൽ വർണ്ണിക്കാൻ ആഗ്രഹിക്കുന്നു. അതിലെല്ലാം കുറിച്ചിരിക്കുന്ന കുഞ്ഞു ചിന്താശകലങ്ങൾ വിഷയത്തോളം മനസ്സിൽ പതിഞ്ഞു. ഇത്രയും മനോഹരമായി നിലത്തിരിയെ ഒരുക്കിയതിനൊരുപാട് അഭിനന്ദനങ്ങൾ. ഇനിയുമേറെ പറയാനുണ്ടാകും നിലാത്തിരിയുടെ എഴുത്തുകാരിക്ക് ഇനിയുമേറെ വിഷയങ്ങളെക്കുറിച്ച് കേൾക്കാൻ കാത്തിരിക്കുന്നു. കവർപേജിൽ അടഞ്ഞിരിക്കുന്ന ബാഹ്യാക്ഷികൾക്കു നേരെ തുറന്നിരിക്കുന്ന ഒരുപാട് കണ്ണുകൾ പടർന്നുകിടക്കുന്നത് കണ്ടു. മനുഷ്യന്റെ അകക്കണ്ണുകൾ തുറന്നുതന്നെയിരിക്കട്ടെ.പുരുഷപക്ഷത്തെ ചേർത്തുപിടിച്ചുകൊണ്ടുതന്നെ ഈ പുസ്തകത്തെ സ്ത്രീപക്ഷം എന്ന് പറയട്ടെ. അതേ അത്രമേൽ ആഴത്തിൽ സ്ത്രീകളിലേക്ക് – നിലാത്തിരി..

..Wishing Nilathiri the whole world to travel… nd it will bcz the journey was worth every page..

അനുജ സനൂബ്