ഹൂറിയും ജിന്നും – എന്റെ ആസ്വാദനക്കുറിപ്പ്

ജീസ് കൈതാരം എഴുതിയ രണ്ടാമത്തെ ബുക്കാണ് കൈരളി പബ്ളിക്കേഷൻസ് പ്രസിദ്ധീകരിച്ച ഹൂറിയും ജിന്നും എന്ന ചെറുകഥാ സമാഹാരം. ഇരുപത് കഥകളടങ്ങിയ ഈ പുസ്തകത്തിലെ എല്ലാ കഥകളും മികച്ച വായനാനുഭവം തരുന്നവയാണ്. നല്ല ഒഴുക്കുള്ള ഭാഷാശൈലിയാണ് ജീസിന്റേത്. വായന തുടങ്ങിയാൽ നിർത്താൻ തോന്നാത്തത്ര ഭംഗിയുള്ള എഴുത്ത്. ഹൂറിയും ജിന്നും ഏതാണ്ട് ഒരു നോവലിന്റെ കെട്ടിലും മട്ടിലുമുള്ള രചനയാണ്. ചെറുകഥകളാണെങ്കിലും അവയ്ക്ക് പലതിനും പരസ്പരബന്ധമുണ്ട്.

എൺപതുകളിലാണ് എല്ലാ കഥകളും പ്ളേസ് ചെയ്തിരിക്കുന്നത്. പഴയകാലത്ത് സ്വാതന്ത്ര്യമില്ലാതെ കഴിഞ്ഞിരുന്ന സ്ത്രീ ജീവിതങ്ങളുടെ കഥകളാണ് ഭൂരിഭാഗവും. സ്വന്തം കാര്യങ്ങളിൽ പോലും അഭിപ്രായസ്വാതന്ത്ര്യമില്ലാത്ത കൗമാരക്കാരായ രണ്ടു പെൺകുട്ടികൾ അനുഭവിക്കുന്ന കഷ്ടതകൾ പറയുന്ന സൈനബ എന്ന കഥയിലൂടെയാണ് ഹൂറിയും ജിന്നും ആരംഭിക്കുന്നത്. ജീവിതത്തിലെ കഷ്ടതകളിൽ കൂടെ നിൽക്കാതെ ഉപേക്ഷിച്ചു പോയ ഭർത്താവ് തിരിച്ചു വന്നപ്പോൾ ആട്ടി ഇറക്കിയ മോളിയും, പാർശ്വവൽക്കരിക്കപ്പെട്ട സമൂഹത്തിൽ ശാരീരിക ചൂഷണങ്ങൾക്ക് വിധേയരായി ജീവിക്കേണ്ടി വരുന്ന ചീരുവും ചീരങ്കിയുമെല്ലാം പലരീതിയിൽ പീഡനങ്ങളനുഭവിക്കുന്ന സ്ത്രീ ജീവിതങ്ങളുടെ പ്രതിനിധികളായി ഓരോരോ കഥകളിലായി നമുക്ക് മുന്നിലേക്ക് വരുന്നു. എന്നാൽ ഈ സ്ത്രീകഥാപാത്രങ്ങളിൽ നിന്നും വ്യത്യസ്തയാണ് ബുക്കിന്റെ പേരായ ഹൂറിയും ജിന്നും കഥയിലെ ഹൂറി. തന്നെ ആത്മാർത്ഥമായി സ്നേഹിച്ച പുരുഷനെ മതത്തിന്റെ പേര് പറഞ്ഞ് ഉപേക്ഷിച്ചു സമ്പന്നനായ ഒരാളെ വിവാഹം കഴിച്ചു പോകുന്നവൾ സ്വാർത്ഥതയുടെ പ്രതീകമായി മാറുന്നു.

ഒരുവിധം എല്ലാ കഥകളിലും നിറഞ്ഞു നിൽക്കുന്ന, കഥകളെ ബന്ധിപ്പിക്കുന്ന മോളിയുടെ മകൻ വർക്കിയിലൂടെ ബാല്യത്തിന്റെ നിഷ്കളങ്കത എഴുത്തുകാരൻ നമുക്ക് കാണിച്ചുതരുന്നു. ഉപേക്ഷിച്ചു പോയ അച്ഛനെ കാത്തിരിക്കുന്ന വർക്കി നമുക്ക് വേദനയാകുമ്പോൾ അവന്റെ സ്കൂൾ ജീവിത്തിലെ വികൃതികൾ ആസ്വാദ്യകരമായി മാറുന്നു. ഒരു കൊലപാതകത്തിന്റെ ചുരുളഴിക്കുന്ന റസ്ക് എന്ന കഥയും, മനുഷ്യരും വന്യമൃഗങ്ങളും തമ്മിലുള്ള സംഘർഷത്തിന്റെ കഥപറയുന്ന തേറ്റയും, മുസ്ല്യാരുടെ പോത്തിനെ തേടിപ്പോകുന്ന പളനിയുടെ കഥ പറയുന്ന ബലിക്കല്ലും ഒന്നിനൊന്ന് വ്യത്യസ്തമാണ്. ഭർത്തൃവീട്ടിലെ പീഡനങ്ങളെ അതിജീവിച്ച് പഠിച്ചു ഉയരങ്ങളിലെത്തുന്ന മുസ്ലിം യുവതിയുടെ കഥയായ ജീവിതം ജീവിച്ചു കാണിക്കുന്നവർ ആണ് പുസ്തകത്തിലെ അവസാന കഥ.

വയനാടൻ ഗ്രാമീണ പശ്ചാത്തലത്തിൽ സാധാരണക്കാരായ ഗ്രാമീണരുടെ ജീവിതം വരച്ചു കാണിക്കുന്ന മനോഹരമായ കഥകളാണ് ഈ ബുക്കിലുള്ളത്.

ജീസ് കൈതാരത്തിന്റെ ഹൂറിയും ജിന്നും തന്ന മികച്ച വായനാനുഭവം, അദ്ദേഹത്തിൽ നിന്നും കൂടുതൽ രചനകൾ പ്രതീക്ഷിക്കുന്നതിന് കാരണമാകുന്നു.