ചോദ്യോത്തരം

ഞാനോ നീയോ
ആരാണാദ്യമരികി-
ലണഞ്ഞത്?
ആരാകിലുമത് നിയതിത-
ന്നഭ്യേദ്യമാം തീരുമാനം.
പുഞ്ചിരിതിളക്കമോ
മിഴിനീർതിളക്കമോ
ഭംഗിയിന്നെന്തിനേറെ?
ഏതിനാകിലുമതിൻഹേതുവ-
തിന്നു നിൻ സ്മരണ മാത്രം.
പകലിൻ വാചാലതയോ
ഇരവിൻ മൗനമോയി-
ന്നേറെ പ്രിയം?
രണ്ടാകിലുമിന്നിവ
നമ്മെ നയിക്കുമനിവാര്യമാം
ജീവിത സമരേഖകൾ.
ആർത്തലയ്ക്കുമീ മഴയോ
ഇരമ്പിയാർക്കുമീ സാഗരമോ
ഇഷ്ടമിന്നേറെയേതിനോട്?
ഏതിനോടാകിലുമൊന്നില്ലാതെമറ്റൊ-
ന്നില്ലെന്നത്രെ പ്രപഞ്ച സത്യം.
പൂത്തു തളിർക്കും വസന്തമോ
പൊള്ളിയടരും ഗ്രീഷ്മമോ
പെയ്തിറങ്ങും വർഷമോ
നിറം മങ്ങും ശരതോ
കൊഴിഞ്ഞടരും ഹേമന്തമോ
കുളിരും ശിശിരമോയേറെപ്രിയ-
മായി ചേരുമിന്നീ യാത്രയിൽ?
ഏതാകിലുമിതിലേതെങ്കിലു-
മൊന്നില്ലെങ്കിലപൂർണ്ണ-
മത്രെയീകാലചക്രം.

– ധനുഗായത്രി