ഈശ്വരന്മാരേ, അമ്മേ, അച്ഛാ, ഏട്ടാ, പലരെയും പേര് വിളിച്ചു അവൾ നിലവിളിക്കുന്നത് ലേബർ റൂമിന്റെ പുറത്ത് എനിക്ക് കേൾക്കാമായിരുന്നു..
പ്രസവ സമയത്ത് മരിച്ചു പോയ അപ്പുറത്തെ വീട്ടിലെ താഹിറയെ പോലെ എന്റെ ആതിരക്കും എന്തെങ്കിലും പറ്റുമോ എന്ന് ഞാൻ വല്ലാതെ ഭയപ്പെട്ടു..
ഏറെ നേരത്തെ ആതിരയുടെ നിലവിളികൾക്ക് ഒടുവിൽ കുഞ്ഞിന്റെ കരച്ചിൽ കേട്ടു.. ലേബർ റൂമിന്റെ വാതിൽ തുറന്നു സിസ്റ്റർ അറിയിച്ചു.. ആതിര പ്രസവിച്ചു.. പെൺകുട്ടി..
അപ്പോൾ തന്നെ അമ്മ പലരെയും ഫോൺ വിളിച്ചു പറയുന്നുണ്ടായിരുന്നു.. ആതിര പ്രസവിച്ചു “സുഖ പ്രസവം”
അല്പ സമയത്തിനകം അവളെയും കുഞ്ഞിനേയും റൂമിലേക്ക് കൊണ്ട് വന്നു. ആതിര വീണ്ടും പൊട്ടി കരയാൻ തുടങ്ങി..
ഏട്ടാ എനിക്ക് എന്റെ അമ്മയെ കാണണം. അവൾ കരച്ചിലിനിടെ വിതുമ്പി കൊണ്ട് പറഞ്ഞു. അവളുടെ അമ്മയുടെയും അച്ഛന്റെയും അനുഗ്രഹം ഇല്ലാതെയാണ് ഞാൻ അവളെ വിവാഹം ചെയ്തത്. അത് കൊണ്ട് തന്നെ അവർ പിണക്കത്തിൽ ആണ്.
ഏട്ടാ എനിക്ക് അമ്മയെ കാണണം. സുഖ പ്രസവത്തിന്റെ സുഖം ഞാൻ അറിഞ്ഞു. ഈ സുഖം തന്നെയല്ലേ എന്റെ അമ്മയും അനുഭവിച്ചത്. എനിക്ക് എന്റെ അമ്മയെ കാണണം. അവൾ കൊച്ചു കുട്ടിയെ പോലെ കരയുമ്പോൾ അവളുടെ അമ്മ നാരായണി അമ്മ അകത്തേക്ക് വന്നു.
നിന്റെ അച്ഛൻ കാണാതെ വന്നതാ ഞാൻ.. കണ്ടാൽ നിനക്കറിയാലോ നിന്റെ അച്ഛന്റെ സ്വഭാവം. നാരായണി അമ്മ കുഞ്ഞിനെ കയ്യിൽ എടുത്തു. ആതിര അപ്പോൾ അവളുടെ അമ്മയെ ആരാധനയോടെ നോക്കുകയായിരുന്നു.. അവളെ നൊന്ത് പ്രസവിച്ച അമ്മയെ..
അപ്പോഴും തന്റെ അമ്മ ആരെയൊക്കെയോ ഫോൺ വിളിക്കുകയാണ് .
ആതിര പ്രസവിച്ചു.. പെൺകുട്ടി..”സുഖ പ്രസവം”..
✍️
ജിനാസ്. വി.
#കുഞ്ഞുകാര്യങ്ങൾ
#കൂട്ടക്ഷരങ്ങൾ