നാലരവെളുപ്പിനെണീറ്റു മുറ്റമടിക്കിടയിൽ പൂവങ്കോഴിയെ കതകിൽ തട്ടിയെണീപ്പിച്ചു തുടങ്ങുന്ന അവളുടെ ദിവസങ്ങൾ..
എല്ലാവർക്കുമുള്ള പ്രാതൽ തരം തിരിച്ചു വേണ്ടതെല്ലാം ഉണ്ടാക്കി, മക്കളെ ഉണർത്തിയോരുക്കി പള്ളികൂടത്തിലയച്ചു കെട്ടിയോനെയും യാത്രയാക്കി വന്നു ബാക്കി പണിക്കിടയിൽ കൈയിൽ കിട്ടിയതെടുത്തു വായിലിട്ടെന്ന് വരുത്തി അടുത്ത പണിയിലേക്കു കയറിയ അന്തോണിച്ചന്റെ പെമ്പുള…
ഉച്ചക്കലത്തെ ഊണ്, നാലുമണി പലഹാരം വിത്ത് ചായ, കാപ്പി, പാലൊഴിച്ചത്, ഒഴിക്കാത്തത്, മീഡിയം, സ്ട്രോങ്ങ് അങ്ങനെ പലതും കഴിഞ്ഞു ഒരു കാലിച്ചായയുമായി മിസ്സിസ്. അന്തോണിച്ചൻ
തൊടിയിലേക്കിറങ്ങിക്കയറി.. അപ്പോഴേക്കും നേരം സന്ധ്യയായെന്നു മാത്രം.
രാത്രിക്കലെ ചപ്പാത്തി, കറി, അമ്മക്ക് ഓട്സ് പാലൊഴിച്ചത്… പിന്നെയും എന്തൊക്കെയോ ചെയ്തു. എല്ലാം കഴിഞ്ഞവർ നേരമില്ലാത്തനേരത്തൊരു കാക്കക്കുളി പാസ്സാക്കി വന്നപ്പോഴേക്കും പാതിരാകോഴി കൂവി…
ഒന്നുറക്കം പിടിച്ചു വന്നപ്പോഴേക്കും അവർക്കു പൂവങ്കോഴിയെ ഉണർത്താനുള്ള സമയമായി. രണ്ടു കോഴികൾക്കിടയിൽ അവളുടെ ദിനരാത്രങ്ങൾ വേർതിരിക്കപ്പെട്ടുകൊണ്ടേ ഇരുന്നു… സ്വന്തം പേരുപോലും ഓർത്തെടുക്കാൻ സമയമില്ലാതെ.
പൂവങ്കോഴിയുടെ ഉണർത്തു ‘ കൊട്ടിൽ ‘ തുടങ്ങി പാതിരാകോഴിയുടെ ‘ ‘താരാട്ടു’ പാട്ടിൽ ദിവസം അവസാനിക്കുന്ന അന്തോണിച്ചന്റെ പെമ്പുള…