ഭർത്താവിൻ്റെ അമ്മാവൻ്റെ മകൻ്റെ കല്യാണമാണ് നാളെ. ഭർത്താവും മാതാപിതാക്കളും രാവിലെ അങ്ങോട്ട് യാത്രയ്ക്ക് ഒരുങ്ങി. കൂടെ പോകാനൊരുങ്ങിയതാണ് ഈയുള്ളവൾ. അപ്പോഴാണ് അവിവാഹിതയായ നാത്തൂനാരുടെ ഡിമാൻഡ്. അവൾക്ക് ഓൺലൈൻ സ്പെഷ്യൽ ക്ലാസ്സുണ്ടെന്ന്…
“എനിക്ക് ഓൺലൈൻ ക്ലാസ്സ് ഉണ്ട്. ചേട്ടത്തിയും കുഞ്ഞും ഇവിടെ നിൽക്കട്ടെ. കുഞ്ഞിനേയും കൊണ്ട് അവിടെ തിരക്കിൽ ബുദ്ധിമുട്ടാകും. നിങ്ങളെല്ലാം പോയിട്ട് വാ. എല്ലാവർക്കും കൂടി നാളെ ഒന്നിച്ച് കല്യാണം കൂടാൻ പോകാം. “
പഠിക്കാനുള്ള അവളുടെ ഒരു ത്വര കണ്ടില്ലേ. അതും ഈയുള്ളവൾക്ക് പാര വച്ചോണ്ട്. നാളെ കല്യാണത്തിനുള്ള ആക്സസറീസ് വാങ്ങാൻ പുറത്ത് പോകണമെന്ന് ചേട്ടനെ ചട്ടം കെട്ടിയതാണ്.
എല്ലാം അവൾ കുളമാക്കി. അടുക്കളയിലേയ്ക്ക് തിരിഞ്ഞു നോക്കാതെ മുറിയടച്ച് ഇരിക്കുകയാണ്. ഉണ്ണാൻ സമയത്തിങ്ങോട്ട് വരട്ടെ, കാട്ടി കൊടുക്കാം ഞാനാരാണെന്ന്. അവളുടെ ഒരു ക്ലാസ്. ഓണത്തിനിടയിലാണ് അവളുടെ പുട്ട് കച്ചവടം. എന്തോരം സ്വപ്നം കണ്ടതാ ഇന്നത്തെ ദിവസത്തെ കുറിച്ച്… എല്ലാവരേയും കാണാം. ഡാൻസും പാട്ടും റീൽസും… പുതിയ ചുരിദാർ വാങ്ങിയത് വെറുതെയായല്ലോ. ദുഷ്ടത്തി.
ഇടയ്ക്കിടയ്ക്ക് അവൾ വന്ന് ഫ്രിഡ്ജ് തുറക്കുന്നു. തക്കാളി കൊണ്ട് മുഖത്ത് തടവുന്നു. അടുക്കളയിൽ വിളക്ക് തേയ്ക്കാൻ ഹോർലിക്സ് ബോട്ടിലിൽ വച്ചിരുന്ന സബീന കടത്തി കൊണ്ട് പോകുന്നു.
ഞാൻ കണ്ടിട്ട് മൈൻഡ് ചെയ്തില്ല.
രണ്ട് മിനിറ്റിനകം മുറിയിൽ നിന്ന് അവൾ പുറത്ത് ചാടുന്നു. മുഖം കഴുകുന്നു, ഐസ് വയ്ക്കുന്നു, വെളിച്ചെണ്ണ പുരട്ടുന്നു. പുകച്ചിലോട് പുകച്ചിൽ. അമ്മ ചന്ദനത്തിന്റെ ഫേസ്പാക്ക് ഇട്ടുവച്ചിരുന്ന ബോട്ടിൽ മാറിയതാണ്.
“നന്നായി പോയി. “
വെളുത്ത് തുടുത്ത അവളുടെ മുഖം ചുവന്ന് ചാമ്പയ്ക്ക പോലെ ആയിട്ടുണ്ട്. ഇനിയിപ്പോൾ മേക്കപ്പൊന്നും വേണ്ട. ഉള്ളിൽ ചിരി പൊട്ടി. ഈ പേരും പറഞ്ഞ് നാളെയിവളെൻ്റെ കല്യാണ പോക്ക് മുടക്കുമോ?
ആരെയൊക്കെയോ ഫോണിൽ വിളിയ്ക്കുന്നു. എന്നോടൊന്നും പറയുന്നതുമില്ല. ഐസ് വെള്ളത്തിൽ മുഖം മുക്കി വയ്ക്കുന്നു. ചിരിച്ച് ചിരിച്ച് ഒരു വഴിയ്ക്കായി.
കല്യാണത്തലേന്ന് പോയില്ലേലും വേണ്ടിയില്ല. അവളുടെ അഹങ്കാരം ലേശം കുറയുമല്ലോ.
“ചേടത്തീ ഞാനൊന്ന് കിടക്കട്ടെ. ചോറുണ്ണാൻ വിളിയ്ക്കണ്ട. “
പോയവരൊക്കെ തിരികെ വന്നപ്പോൾ അവളുടെ മുഖം കണ്ടിട്ട് ഭയന്നു പോയി.
“നീ നാളെ കല്യാണത്തിന് വരണ്ട. “
അലർജി ആണെന്നും പറഞ്ഞ് അവളെ ആശുപത്രിയിലും കൊണ്ട് പോയി. കൊടുത്താൽ സബീന വഴിയും പണി കിട്ടുമെന്ന് മനസ്സിലായി.
NB : സബീന ഒരു ഡിഷ് വാഷ് പൗഡറാണ്.
✍️✍️✍️നിഷ പിള്ള
10 Comments
😄🤭
😃😃
🤓🤓
😃😃
പാവം നാത്തൂൻ…. ന്നാലും
ആശ്വസിപ്പിക്കാമായിരുന്നു!!😀
😃😃
എന്നാലും എൻ്റെ നാത്തൂനേ😃😃
കൊള്ളാം ട്ടോ❤️
പാവം നാത്തൂൻ…. ന്നാലും
ആശ്വസിപ്പിക്കാമായിരുന്നു!!😀
😃😃
😃😃😃