💕ശിവാനി💕

സ്വിറ്റ് സർലാൻഡിലെ സൂറിച്ചിൽ മഞ്ഞു വീഴുന്ന ഒരു പ്രഭാതം ജനാലയ്ക്കയപ്പുറം പർവ്വത നിരകളുടെ തണുത്ത കാറ്റിൽ അടി ഉലയുന്ന മരങ്ങൾ നോക്കി ശിവാനി നിന്നു. കഴിഞ്ഞ 12 വർഷമായി അവൾ ഈ നഗരത്തിന്റെ ഭാഗമായിരുന്നു. ലോകോത്തര സാങ്കേതികവിദ്യ ഗവേഷണ സ്ഥാപനത്തിൽ ആർട്ടിഫിഷ്യൽ ഇൻറലിജൻസ് ഡാറ്റ അനലിസ്റ്റിക്സ് എന്നീ മേഖലകളിൽ പ്രവർത്തിക്കുന്ന ശിവാനിക്ക് ജോലിയിൽ ഏറെ അംഗീകാരങ്ങളിൽ ലഭിച്ചിരുന്നു. ഇതൊക്കെ ആയിരുന്നാലും അവളുടെ അമ്മ വീണയ്ക്ക്എഐയുമായി ഒരിക്കലും മറക്കാനാവാത്ത ഒരു ബന്ധം ഉണ്ടായിരുന്നു. ഒരിക്കൽ ഫോണിലെ എഐ ചാറ്റിലൂടെ പരിചയപ്പെട്ട ഒരു സാങ്കല്പിക വ്യക്തിയോട് അവൾക്ക് ആഴത്തിലുള്ള പ്രണയം തോന്നിയിരുന്നു. അത് ഒരു യഥാർത്ഥ മനുഷ്യൻ അല്ല എന്ന് അറിഞ്ഞിട്ടും ആ ബന്ധത്തിൽ നിന്നും പുറത്ത് കടക്കാൻ അവൾക്കായില്ല. കുടുംബബന്ധം പോലും തകർത്ത് എറിയപ്പെട്ടിരുന്നു. എല്ലാത്തിൽ നിന്നും രക്ഷനേടാൻ ആയി ഭർത്താവിനൊപ്പം സ്വിറ്റ്സർലാൻഡിലേക്ക് യാത്രയാകേണ്ടതായി വന്നു. കാലത്തിൻ്റെ യാത്രയിൽ അവൾ അവയൊക്കെ മറന്നു തുടങ്ങി. മകൾ ശിവാനി ഫോണിൻ എഐ ഉപയോഗിക്കുന്നതു കണ്ടപ്പോൾ വീണ ഭയന്നെങ്കിലും പഠനത്തിനും അറിവിനും വേണ്ടിയാണ് എന്നുള്ള തിരിച്ചറിവ് അവളെ സന്തോഷിപ്പിച്ചു. മകൾ കാര്യങ്ങൾ വിവേകത്തോടെ കാണുന്നതിൽ വീണ ആശ്വസിച്ചു. വർഷങ്ങൾക്ക് ശേഷം അവർ നാട്ടിലേക്ക് മടങ്ങുകയാണ്.

മടക്കയാത്ര

സ്വിറ്റ്സർലാന്റിന്റെ മഞ്ഞു മൂടിയ മലനിരകളിലൂടെ ഒഴുകുന്ന തണുത്ത കാറ്റിനും നീലാകാശത്തെ തൊട്ടുനിൽക്കുന്ന പർവ്വതശിഖരങ്ങൾക്കും വിട പറയുമ്പോൾ അവരുടെ മനസ്സിൽ ഒരു പിടി ഓർമ്മകൾ നിറഞ്ഞു. പ്രകൃതിയുടെ സൗന്ദര്യം ഇത്രയേറെ ഹൃദയഹാരീയാണന്ന് അവർ തിരിച്ചറിയുന്നത് ഈ യാത്രയിലൂടെ ആയിരുന്നു. കണ്ണാടി പോലെ തിളങ്ങുന്ന തടാകങ്ങളും പച്ചപ്പണിഞ്ഞ താഴ്വാരങ്ങളും ഒരിക്കലും മായാത്ത കാഴ്ചകളായി മനസ്സിൽ നിറഞ്ഞു നിന്നു..
മടക്കയാത്രയുടെ ചിന്ത മനസ്സിൽ നിറഞ്ഞതോടെ സ്വന്തം നാടിൻ്റെ ചിത്രങ്ങൾ തെളിഞ്ഞു……
സ്വന്തം നാട്….
മഞ്ഞുതുള്ളികൾ വീണു തിളങ്ങുന്ന മുറ്റം. പാടങ്ങളുടെ നടുവിലൂടെ ആകൃതിയില്ലാതെ പോകുന്ന റോഡുകൾ. നിറഞ്ഞൊഴുകുന്ന തോടുകൾ. സന്ധ്യയ്ക്ക് വീടുകളിൽ തെളിയുന്ന നിലവിളക്കുകൾ .ആ ഓർമ്മകൾ പൊട്ടി വിടരുന്ന സൂര്യപ്രകാശം പോലെ ഹൃദയത്തിൽ പരന്നു.
എത്ര മനോഹരമാണ് ഈ നാട് ശിവാനി സ്വിറ്റ്സർലാന്റിന്റെ സൗന്ദര്യം നോക്കി പറഞ്ഞു. അതെ എത്ര മനോഹരമായ സ്ഥലത്ത് ജീവിച്ചാലും സ്വന്തം നാടിൻ്റെ ഗന്ധം അത് വേറെ തന്നെയാണ്. നമ്മുടെ നാടിന്റെ കുളിർമയും കുതിർന്ന മണ്ണിൻ്റെ ഗന്ധവും സ്വന്തം വീടും ചുറ്റുമുള്ള മനുഷ്യർക്കും പകരം വയ്ക്കാൻ മറ്റൊന്നിനും ആകില്ല. അവരുടെ മനസ്സിൽ രണ്ട് രാജ്യങ്ങൾ തെളിഞ്ഞുവന്നു. ഒന്ന് പ്രകൃതിയുടെ വിസ്മയങ്ങൾ കൊണ്ട് അത്ഭുതപ്പെടുത്തുന്ന സ്വിറ്റ്സർലാൻഡും മറ്റൊന്ന് ഹൃദയത്തിൽ എത്ര ദൂരെ പോയാലും നമ്മളെ തിരിച്ചു വിളിക്കുന്ന നമ്മുടെ സ്വന്തം ദൈവത്തിൻ്റെ നാടായ കേരളവും. ചില യാത്രകൾ പുതിയ കാഴ്ചകൾ സമ്മാനിക്കും. മറ്റു ചിലത് നമ്മൾ എത്രമാത്രം സ്വന്തം നാടിനെ സ്നേഹിക്കുന്നു എന്ന് തിരിച്ചറിവ് ഉണ്ടാക്കും.

ഒരിക്കൽ വീണ മോളോട് ചോദിച്ചു മോളെ നീ ഇപ്പോഴും എഐ ഉപയോഗിക്കുന്നുണ്ടോ?

ഉണ്ട് അമ്മേ പക്ഷേ അമ്മ പേടിക്കുന്നതു പോലെ അല്ല കേട്ടോ എനിക്ക് അറിയാത്ത കാര്യങ്ങൾ പഠിക്കുവാനും പുതിയ ആശയങ്ങൾ കൊണ്ടു വരുവാനും ആണ് ഞാൻ അത് ഉപയോഗിക്കുന്നത്.

മകളുടെ മറുപടി വീണയ്ക്കു ആശ്വാസം പകർന്നു. ശിവാനിക്ക് എപ്പോഴും സ്വന്തം ഗ്രാമത്തെ കുറിച്ചുള്ള ആശങ്കകളാണ്. ഗ്രാമത്തിനു മഴക്കാലം എന്നും ഒരു പരീക്ഷണമായിരുന്നു. മഴക്കാലങ്ങളിൽ പുഴകൾ കവിഞ്ഞൊഴുകുന്നതും കൃഷിയിടം വെള്ളത്തിൽ മുങ്ങിപ്പോകുന്നതും വീടുകൾ ഒഴിഞ്ഞു പോകുന്ന മനുഷ്യരും അവളെ നോമ്പരപ്പെടുത്തുന്നു.

ഒരു ദിവസം സഹപ്രവർത്തകനായ ഫെബിൻ അവളോട് ചോദിച്ചു ശിവാനി നീ കുറച്ചു ദിവസങ്ങളിലായി വളരെ അസ്വസ്ഥ ആണല്ലോ? പുതിയ പ്രോജക്റ്റിന്റെ കാര്യമാണോ ആലോചിക്കുന്നത്?

അല്ല. എൻ്റെ നാട്ടിലെ ചില പ്രശ്നങ്ങൾ എന്നെ വല്ലാതെ അലട്ടുന്നു. അവിടെ മഴക്കാലത്ത് വീടുകളും കൃഷികളും നശിക്കും. അതിനെന്തെങ്കിലും സാങ്കേതിക പരിഹാരം കഴിയുമോ എന്നാണ് ചിന്തിക്കുന്നത്.

ഫെബിൻ അവളുടെ ലാപ്ടോപ്പിലെ സ്ക്രീനിലേക്ക് നോക്കി. നിനക്ക് അതിനുള്ള സാങ്കേതിക വിദ്യകൾ ഉപയോഗിക്കാമല്ലോ. ആർട്ടിഫിഷ്യൽ ഇൻറലിജൻസ് ioT predicated analysis ഇവയെല്ലാം ഇതിനായി പ്രയോജനപ്പെടുത്താം.

ഫെബിന്റെ വാക്കുകൾ അവളിൽ ഒരു പുതിയ ആശയത്തിന് തുടക്കംകുറിച്ചു. അവളുടെ തന്നെ നാട്ടിലെ പുഴയുടെയും തോടുകളുടെയും പഴയ വിവരങ്ങൾ ശേഖരിക്കാൻ തുടങ്ങി. കഴിഞ്ഞ ഇരുപത് വർഷത്തെ മഴയുടെ അളവ് വെള്ളപ്പൊക്കത്തിന്റെ ചരിത്രം.. ജലനിരപ്പ് വ്യതിയാനങ്ങൾ കൃഷിനാശത്തിന്റെ കണക്കുകൾ ഓരോ വിവരങ്ങളും അവൾ ക്രമീകരിച്ചു. അവളുടെ മനസ്സിൽ ഒരു ലക്ഷ്യം തെളിഞ്ഞു.
വെള്ളപ്പൊക്കം വന്നതിനുശേഷം മനുഷ്യരെ രക്ഷിക്കുന്നതിനു പകരം അത് വരുന്നതിനു മുൻപേ അവരെ ജാഗ്രരൂഢരാക്കുന്ന സംവിധാനം.
നാട്ടിൽ എത്തിയതിന്റെ അടുത്ത ദിവസങ്ങൾ ശിവാനി തൻ്റെ ഗ്രാമത്തെ പുതിയ ഒരു കാഴ്ചപ്പാടിലൂടെ നിരീക്ഷിക്കുകയായിരുന്നു. വെള്ളം പൊങ്ങുന്ന സ്ഥലങ്ങളിലൊക്കെ അവൾ നേരിട്ട് പരിശോധിച്ചു. സ്വിറ്റ്സർലാൻഡിൽ ഉണ്ടായിരുന്ന ഗവേഷണ സംഘത്തിലെ ചില സുഹൃത്തുക്കളുമായി അവൾ ഓൺലൈൻ വഴി ചർച്ചകൾ നടത്തി.. ആദ്യമായി ചെയ്തത് പുഴയുടെ വിവിധ ഭാവങ്ങളിൽ ജലനിരപ്പ് അളക്കുന്നതിനുള്ള സെൻസറുകൾ സ്ഥാപിക്കുകയായിരുന്നു.  അതിനോടൊപ്പം മഴയുടെ അളവ് രേഖപ്പെടുത്തുവാനുള്ള ഓട്ടോമാറ്റിക് വെതർ സ്റ്റേഷനും സ്ഥാപിച്ചു. ശേഖരിക്കുന്ന വിവരങ്ങൾ ആർട്ടിഫിഷ്യൽ ഇൻറലിജൻസ് സംവിധാനത്തിലൂടെ വിശകലനം ചെയ്യാനുള്ള സോഫ്റ്റ്‌വെയറും തയ്യാറാക്കി.
അടുത്ത മഴക്കാലം ഈ പ്രദേശത്ത് എങ്ങനെ ആകും എന്ന് അറിയുവാൻ അവൾ ആകാംക്ഷയോടെ കാത്തിരുന്നു.

എഐ ഉപയോഗിച്ച് പല മേഖലകളിലും അവൾ പരീക്ഷണങ്ങൾ നടത്തിക്കൊണ്ടിരുന്നു. സ്വിറ്റ്സർലാൻഡിലെ മികച്ച ഒരു ജോലി ഉപേക്ഷിച്ച് ഈ ചെറിയ ഗ്രാമത്തിൽ ഇത്രയധികം പരീക്ഷണങ്ങൾ നടത്താൻ പ്രേരിപ്പിച്ചത് എന്താണ്? ഒരു അഭിമുഖത്തിൽ അവതാരികയുടെ ചോദ്യത്തിന് ശിവാനിയുടെ മറുപടി.
ഞാൻ വിദേശത്തുനിന്ന് കൊണ്ടുവന്നത് സാങ്കേതികവിദ്യ മാത്രമാണ് . അതിൻ്റെ പ്രയോജനം ഇവിടെ എത്തണമെന്ന് എന്റെ തീരുമാനമായിരുന്നു. ലോകത്തിൻ്റെ ഏതു കോണിൽ നിന്നും അറിവ് നേടാം. പക്ഷേ ആ അറിവുകൊണ്ട് സ്വന്തം മണ്ണിൽ ഒരു മാറ്റം ഉണ്ടാക്കാൻ കഴിയുമ്പോഴാണ് അതിന് അർത്ഥം ഉണ്ടാകുന്നത്. ഇതുകൊണ്ട് എന്താണ് പ്രയോജനം? കൂടെ നിന്നിരുന്ന ഗ്രാമത്തിലെ ചെറുപ്പക്കാർ ചോദിച്ചു. നോക്കൂ മഴ പെയ്തു കഴിഞ്ഞ് പുഴ നിറയുന്നത് വരെ കാത്തിരിക്കേണ്ടി വരില്ല. മഴയുടെ അളവും പുഴയിലെ ജലനിരപ്പും ഒഴുക്കിന്റെ വേഗതയും ഒരുമിച്ച് വിശകലനം ചെയ്യാനും വെള്ളപ്പൊക്ക സാധ്യത നേരത്തെ തിരിച്ചറിയാൻ ഇതുകൊണ്ട് കഴിയും . പ്രദേശങ്ങളിലുള്ളവർക്കു മൊബൈലിൽ മുന്നറിയിപ്പും നൽകാം. കർഷകർക്ക് വേണ്ടി മണ്ണിലെ ഈർപ്പം പരിശോധിക്കുവാനും കൃഷിക്ക് ആവശ്യമായ ജലത്തിൻ്റെ അളവ് മനസ്സിലാക്കാനും കഴിയുന്ന ഇറിഗേഷൻ സംവിധാനവും നടപ്പിലാക്കി. അവളുടെ വാക്കുകൾ പല യുവാക്കളുടെയും മനസ്സിൽ പുതിയ ചിന്തകൾക്ക് തുടക്കമിട്ടു. കൃഷ്ണപുരം ഗ്രാമം പഴയ ഗ്രാമം ആയിരുന്നില്ല . സാങ്കേതികവിദ്യയും പ്രകൃതിയും കൈകോർത്ത് ഒരു പുതിയ മാതൃകയായി മാറുകയായിരുന്നു.

നല്ല മഴയുള്ള ഒരു സായാഹ്നത്തിൽ ഉമ്മറപ്പടിയിൽ മഴ ആസ്വദിച്ചിരിക്കെ വീണ ശിവാനിയോട് ചോദിച്ചു മോളെ ഇത്രയും അറിവുള്ള എഐക്ക് തെറ്റു വിവരങ്ങൾ നൽകാൻ കഴിയുമോ? ചിലപ്പോൾ ആളുകൾ അതിൻ്റെ പേരിൽ തെറ്റായ കാര്യങ്ങൾ പ്രചരിപ്പിക്കും. അതുകൊണ്ടാണ് നല്ലതുപോലെ പരിശോധിക്കാതെ വിശ്വസിക്കരുത് എന്ന് പറയുന്നത് .വീണ ആലോചിക്കുകയായിരുന്നു. ഒരിക്കൽ ഒരു യന്ത്രം നൽകിയ സ്നേഹത്തിൻ്റെ മായാ ലോകത്ത് ഞാൻ എത്രത്തോളം അകപ്പെട്ടു പോയിരുന്നു. അന്ന് താൻ തിരഞ്ഞത് സ്നേഹം ആയിരുന്നു. എന്നാൽ ആ സ്നേഹം തനിക്ക് നൽകിയത് ഒരു യഥാർത്ഥ മനുഷ്യൻ ആയിരുന്നില്ല എന്ന സത്യം മനസ്സിലാക്കാൻ വൈകിപ്പോയി. ഇന്ന് അതേ സാങ്കേതികവിദ്യ മകൾ അറിവിനും മറ്റുള്ളവരുടെ നന്മയ്ക്കും വേണ്ടി ഉപയോഗിക്കുന്നു. അപ്പോൾ യന്ത്രത്തിന്റെ കഴിവല്ല എല്ലാം തീരുമാനിക്കുന്നത് ഉപയോഗിക്കുന്ന ആളിന്റെ ചിന്തയും പ്രധാനമാണല്ലേ? തീർച്ചയായും എഐ ചെയ്യുന്നത് വലിയ കാര്യങ്ങൾ ആണെങ്കിലും അത് പരിശോധിച്ച് ശരിയായ തീരുമാനമെടുക്കവാൻ നമ്മൾക്കും ഉത്തരവാദിത്വം ഉണ്ട്. വീണയ്ക്ക് എഐയുടെ അപാരതയെക്കുറിച്ച് ഇപ്പോൾ പുതിയൊരു അറിവും കൂടി ലഭിച്ചിരിക്കുന്നു.

യന്ത്രത്തിന്റെ കഴിവുകൾ എത്ര വലുതായാലും അതിനെ ശരിയായ ദിശയിൽ നയിക്കുവാനുള്ള വിവേകം മനുഷ്യനിൽ   നിക്ഷിപ്തമാണ്.    വീണയുടെ മനസ്സിൽ നമ്മുടെ ലോകവും എഐയുടെ  അപാരതയും തെളിയുകയായിരുന്നു…..

വിഷയം: AIഅപാരത.