# സൗഹൃദം
അന്നും ഇന്നും:
“ഹലോ
” സുനീ…
ഫോണിന്റെ അങ്ങേത്തലയ്ക്കലിൽ നിന്നും കേട്ടു വിളി സുനിയ്ക്ക് ഒരു ഊർജ്ജം തരുന്നത് തന്നെയാണ് എന്നും..!
“എവിടെയായിരുന്നു ഇതുവരെ …
വല്യ തിരക്കുള്ള ആളായി ഇപ്പോൾ ” എന്ന് മന: പൂർവ്വം അവൾ പരിഭവിച്ചു.
ദിവസം തെറ്റാതെ ഒരു വിരലിനപ്പുറം സന്ദേശങ്ങൾ വരും..
എങ്കിലും..!
സുനിതയും സുമേഷും ചെറുപ്പം മുതലേ കളിക്കൂട്ടുകാരായിരുന്നു.
. രണ്ടു പേരും ഒരേ പോലെ കാഴ്ചപ്പാടുളളവർ …
വായന ഒരു ഹരമായിരുന്നു..
രണ്ട് പേർക്കും..
പൂമ്പാറ്റ, ബാലരമ, അമ്പിളിയമ്മാവൻ എന്നു വേണ്ട!
ഒരിക്കൽ അഞ്ചാം ക്ലാസ്സിൽ വെച്ച് ബാലകഥാ പുസ്തകം പരസ്പരം കൈമാറിയ വേളയിൽ കുട്ടികൾ കളിയാക്കി ചിരിച്ചു.. !
ഒന്നുമറിയാതെ ചങ്ങാതിമാർ വായനയിലേക്ക് തിരിഞ്ഞു…😀
ക്ലാസ്സുകൾ കയറുന്തോറും സുനി പുസ്തകപ്പുഴുവിന്റെ പ്രതിഛായ പേറി ക്ലാസ്സിൽ ഒന്നാം സ്ഥാനക്കാരി പട്ടം അലങ്കരിച്ചു… !
നേർ വഴിയിലൂടെയുള്ള യാത്രയിൽ വഴിയോര കാഴ്ചകൾ കാണാതെ പോയി !
അന്നൊരു ഇൻസർവ്വീസ് ട്രെയിനിങ്ങായിരുന്നു..
ടീ ബ്രെയ്ക്കിനിടെ സേവ് ചെയ്യാത്ത നമ്പറിൽ ഒരു കോൾ വന്നു.. !
“ഹലോ..
സുനിയല്ലെ…” .
“അതേ ..
ഇതാരാ ..?…..”
“ഞാനാ …
സുമേഷ് …
സ്കൂളിൽ പഠിച്ചിരുന്ന …..!
“ഓ…!
സുമേഷ് …!!
സുഖല്ലെ …
എങ്ങിനെ എന്റെ നമ്പർ കിട്ടി..?
സുനിയും ആകെ ഒരു ത്രില്ലിൽ …!
വർഷങ്ങളായി എല്ലാവരും ഓരോ വഴിക്ക് പിരിഞ്ഞിട്ട് …!
ഇടയ്ക്കൊക്കെ എല്ലാവരേയും ഓർക്കും ..
.ശീതൾ, സൂസൻ, പ്രീതി. ശോഭ , സുമേഷ്, മനോജ്, അങ്ങിനെയങ്ങിനെ പല മുഖങ്ങൾ .
” അതൊക്കെ ഒരു വല്യ കഥയാ… നേരിൽ കാണുമ്പോൾ പറയാം….
” ഒ.കെ. ഞാൻ പിന്നെ വിളിക്കാം..
അടുത്ത സെഷൻ തുടങ്ങാറായി…” ഇതും പറഞ്ഞ്
സുനി ഫോൺ വെച്ചു…
പിന്നെ
ക്ലാസ്സിൽ ഇരുന്ന നേരമത്രയും പഴയ സ്കൂൾ മുറ്റത്തെ മാവിൻ ചുവട്ടിലായിരുന്നു അവൾ .
പിന്നെ എത്രയെത്ര സംഗമങ്ങൾ … വിസ്മൃതിയിലായ പഴയ കൂട്ടുകാർ പലപ്പോഴായി ഒത്തുകൂടി
പലപ്പോഴും പല സൗഹൃദങ്ങളും ദുർവ്യാഖ്യാനങ്ങൾക്ക് വിഷയമായെങ്കിലും സുനിയും സുമേഷും
അത്തരം അപവാദങ്ങൾക്ക് വലിഞ്ഞ് കേറാൻ ഇടം കൊടുക്കാതെ നല്ല സുഹൃത്തുക്കളായി മാറി…
ചിന്തകളിലും സ്വഭാവങ്ങളിലും സമാനതകളുള്ള രണ്ടുപേരുടേയും കുടുംബങ്ങളും പലവട്ടം ഒരുമിച്ചു കൂടി സൗഹൃദം ഊട്ടിയുറപ്പിച്ചു ….
“സുനീ…
ആരാ ..
ഫോണിൽ ….”?
അഖിലിന്റെ ശബ്ദം കേട്ടപ്പോഴാണ് സുനി ചിന്തയിൽ നിന്ന് ഞെട്ടിയുണർന്നത്.
” അത് , സുമേഷാണ് … ”
“ആണോ …
ഫോണിങ്ങു തന്നേ…
നമുക്ക് അടുത്ത ടൂർ പ്ലാൻ ചെയ്യാൻ ഉണ്ട് ”
ഫോൺ അഖിലിന് കൈമാറി സുനി കിച്ചനിലേക്ക് നടന്നു…🥰