എല്ലാം നല്ലതായിരിക്കും

ഓരോ പുലരിയും പുതു ജന്മം തന്നെ, എന്ന് വിശ്വസിക്കുന്ന എനിക്ക് ജനുവരി 1 യാതൊരു പ്രത്യേകതയും ഇല്ലാത്ത ദിവസമാണ്.
ഈ വർഷവും പതിവുപോലെ പുതിയ തീരുമാനങ്ങൾ ഒന്നും എടുത്തിട്ടില്ല. പുതു വർഷത്തിൽ പുതിയ കാര്യങ്ങളോ തീരുമാനങ്ങളോ എടുക്കാറില്ല. കാരണം പുതിയൊരു കാര്യം ചെയ്തു തുടങ്ങുന്നതിന് ജനുവരി ഒന്നു വരെ കാത്തിരിക്കാനുള്ള ക്ഷമ എനിക്കില്ല. വർഷം കഴിഞ്ഞു പോകുന്നതിന് വിഷമവും തോന്നാറില്ല. സമയം പെട്ടെന്ന് കടന്നു പോകുന്നത് തന്നെയാണ് എനിക്കിഷ്ടം.

പുതുവർഷത്തെ പറ്റി പ്രത്യേകിച്ച് ഒരു എക്സൈറ്റ്മെന്റും തോന്നാറില്ല. ജനുവരിയിലെ തണുപ്പ് ഇഷ്ടമാണെന്ന് അല്ലാതെ. ന്യൂ ഇയർ സെലിബ്രേഷന് എല്ലാവരും പോകുന്നു അതുകൊണ്ട് ഞാനും പോകുന്നു. ഇങ്ങോട്ട് വിഷ് ചെയ്യുന്നവരെ തിരിച്ചുവിഷ് ചെയ്യുന്നു. കാലങ്ങളായിട്ട് ഇങ്ങനെ തന്നെയാണ് കാര്യങ്ങൾ പോകുന്നത്.

എങ്കിലും ഇത്തവണ ചില പ്രത്യേകതകളുണ്ട്. ഡിസംബറിൽ ചെയ്യാൻ വെച്ച പല കാര്യങ്ങളും ജനുവരിയിലേക്ക് പോയി. അതൊന്നും എന്റെ പുതുവർഷ പരിപാടികൾ അല്ല. എന്നിട്ടും ഫലത്തിൽ ഇപ്പോൾ അങ്ങനെയൊക്കെയായി. പിന്നെ ആവശ്യമില്ലാത്ത പല നൂലാമാലകളും എടുത്തു തലയിൽ വച്ചിട്ടുണ്ട്. എല്ലാം കൂടി 2025 ൽ ആവശ്യത്തിൽ കൂടുതൽ ജോലിയും ടെൻഷനും കാത്തിരിപ്പുണ്ട്. അതിന്റെയൊരു ത്രില്ലിനെപ്പറ്റി ഓർത്താൽ 2025 എനിക്കൊരു സസ്പെൻസ് ത്രില്ലെർ ആകാൻ സാധ്യത ഉണ്ട്. ഇതൊക്കെ ചെയ്യാൻ എനിക്കെ ന്തിന്റെ കേടായിരുന്നു എന്ന് ഞാൻ എന്നോട് തന്നെ ചോദിക്കാറുള്ളത് കൊണ്ട് വേറെയാരും ഇനി ചോദിക്കേ ണ്ട.

പിന്നെ ആകെയുള്ളൊരാ ശ്വാസം കഥ, കവിത എന്നൊക്കെ പറഞ്ഞു ഓരോന്ന് എഴുതി പോസ്റ്റ്‌ ചെയ്തിട്ട് അത് വായിക്കാൻ പറഞ്ഞു മറ്റുള്ളവരെ വെറുപ്പിക്കുന്ന പരിപാടിയാണ്. അത് നിർത്താൻ ഉദ്ദേശം ഇല്ല. പിന്നെ ഈ വരുന്ന ജനുവരിയ്ക്ക് മുൻപ് ചെയ്യണമെന്ന് വിചാരിച്ച കാര്യങ്ങൾ അടുത്ത വർഷം ജനുവരിയ്ക്ക് മുൻപെങ്കിലും ചെയ്യണം.

2025 ൽ ഞാൻ ഇങ്ങനെ തന്നെ ആയിരിക്കും എന്നേ പറയാൻ പറ്റു. കാരണം ഓരോ വർഷം കടന്നു പോകുമ്പോഴും നാം അറിയാതെ തന്നെ നമുക്ക് പല മാറ്റങ്ങളും സംഭവിക്കുന്നുണ്ട്. അത് തിരിച്ചറിയുന്നത് പിന്നീട് എപ്പോഴെങ്കിലും ആയിരിക്കും.

കഴിഞ്ഞ 3 വർഷത്തിനിടയിലായിരി ക്കണം എന്റെ അമിതമായ അടുക്കും ചിട്ടയും അത് തെറ്റിയാലുള്ള ദേഷ്യവും ടെൻഷനും ഒക്കെ കുറഞ്ഞത്. ചെറിയ കാര്യങ്ങളിൽ സന്തോഷിക്കാൻ പഠിച്ചത്. വിട്ടു വീഴ്ചകളിൽ, വിട്ടു കൊടുക്കലു കളിൽ സമാധാനം കണ്ടെത്തിയത്. ജീവിതം ചെറുതാണ്, ഈ നിമിഷത്തിൽ ജീവിക്കുക എന്ന ഓർമപ്പെടുത്തൽ ഓരോ നിമിഷവും ഉള്ളിലുണ്ടാകുന്നുണ്ട്.

ഇതേ പോലെ 2025 ൽ ഉണ്ടായ മാറ്റങ്ങൾ വർഷം അവസാനം നോക്കാം. എന്തു വേണം എന്നൊരു തീരുമാനം, കണക്കുകൂട്ടൽ ഒന്നും ആദ്യമേ ഇല്ല. എല്ലാം നല്ലതായിരിക്കും എന്ന ശുഭ പ്രതീക്ഷ മാത്രമേ എന്നെ മുന്നോട്ട് നയിക്കുന്നുള്ളൂ.