🌹 ദിക്കറിയാത്ത പ്രവാസി🌹

പ്രവാസിയായ മകൻ വിദേശത്തു നിന്ന് അയച്ചുകൊടുത്ത പണം കൊണ്ട് അവൻ്റെയമ്മ നാട്ടിൽ പുതിയ വീട് വെച്ചു. വീടിൻ്റെ കുടിയിരിപ്പു ദിവസം തന്നെ അവൻ്റെയമ്മ വീടിൻ്റെ ഉമ്മറത്തേയ്ക്ക് കയറുമ്പോൾ സ്റ്റെപ്പിൽ കാൽ തട്ടിയൊന്നു വീണു. അതുകണ്ടപ്പോൾത്തന്നെ വല്യമ്മാവൻ വിളിച്ചു പറഞ്ഞു. 

“ഹൗ, ലക്ഷണക്കേട്, ഞാനപ്പഴേ പറഞ്ഞതാ നാല് സ്റ്റെപ്പ് വെയ്ക്കരുത് വീടിനത് ദോഷമാന്ന്…

അത് കേൾക്കേണ്ട താമസം, വയ്യാത്ത കാലും വലിച്ചു കൊണ്ട് അവൻ്റെയമ്മ ജോത്സ്യരുടെയടുത്തേയ്ക്കോടി. 

കുടിയിരിപ്പിന് വീട്ടിൽ വന്ന് സദ്യയും കഴിച്ച് പോയ, നാട്ടിലെ പ്രധാന ജോത്സ്യൻ വേഗം ഗണിച്ചു നോക്കിപ്പറഞ്ഞു സ്റ്റെപ്പ് മാറ്റിപ്പണിയണം.

ടൈലിട്ട് മനോഹരമാക്കിയിരുന്ന സ്റ്റെപ്പ് പിറ്റേന്നു തന്നെ പൊളിച്ചു മാറ്റി, ഗ്രാനൈറ്റ് പാകിയ പുതിയ സ്റ്റെപ്പുണ്ടാക്കി, 

സ്റ്റെപ്പിന് സൈഡിലപ്പോഴും അമ്മ, വീഴാനിടയായ വള്ളി പൊട്ടിയ ചെരുപ്പു കിടപ്പുണ്ടായിരുന്നു. അവൻ്റെ ആ മാസത്തെ ശമ്പളത്തിൻ്റെ നല്ലൊരു ഭാഗം റിയാലുകളും സ്റ്റെപ്പിൽ ഗ്രാനൈറ്റായി പതിഞ്ഞു കിടന്നു. 

മുറ്റത്ത് കളിച്ചോണ്ടിരുന്ന നാലുവയസ്സുകാരൻ ചെക്കൻ്റെ തലയിൽ മച്ചിങ്ങാ വീണ് ചെക്കൻ തലയും തടവി ആർത്തലച്ച് കരയുമ്പോഴും അമ്മ ജോത്സ്യരുടെ അടുത്തേയ്ക്കോടി. 

ഉമ്മറ വാതിലിൻ്റെ മുൻവശത്തായി പുളിമരം നിൽക്കുന്നതോണ്ട് ദോഷമാണത്രെ, അതു കൊണ്ടാണ് വീട്ടിൽ അനർത്ഥങ്ങളുണ്ടാവുന്നത്. 

അല്ലാതെ നടുമുറ്റത്തെ തെങ്ങിൻ്റെ കുഴപ്പമല്ലാത്രേ…

പുളിമരം വെട്ടിക്കളയാൻ പണിക്കാരെ ഏർപ്പെടുത്തിയ വകയിലും പോയി ആ മാസത്തെ കുറച്ചു, റിയാലുകൾ. 

രാത്രി കിടക്കാൻ നേരം മുത്തശ്ശിയാണ് അവൻ്റെ ഭാര്യയോട് പറഞ്ഞത്, 

” ഛായ് അശ്രീകരം, ഉറങ്ങാൻ കിടക്കുമ്പോൾ തെക്കുവടക്കായിട്ടാണോ കിടക്കുന്നത്? വെടക്ക് തലയും വടക്കോട്ട് വെയ്ക്കരുതെന്ന് പറഞ്ഞ് കേട്ടിട്ടില്ലേ, അതോണ്ട് തല ഭാഗം കിഴക്കോട്ട് വെയ്ക്കുന്നതാണുത്തമം.”

അതു കേട്ട് അവൾ വലിയ കട്ടിൽ ഒറ്റയ്ക്ക് പിടിച്ച് കിഴക്കു പടിഞ്ഞാറ് ഭാഗത്തേയ്ക്കിടാൻ നോക്കിയപ്പോഴാണവളുടെ നടുവ് വെട്ടിപ്പോയത്. അതിൻ്റെ ചികിൽസയ്ക്കായും അവൻ്റെ റിയാലുകൾ പലവഴിയ്ക്കൊഴുകിപ്പോയി.

വിവരമറിഞ്ഞ ജോത്സ്യൻ വീട്ടിൽ വന്നു നോക്കിപ്പറഞ്ഞു. 

” പൂജാമുറി, തെക്കുപടിഞ്ഞാറ് ഭാഗത്തേയ്ക്കായി മാറ്റിപ്പണിയണം”

അതു മാറ്റിപ്പണിയാനായുള്ള റിയാലുകൾക്ക് വേണ്ടിയവൻ, അങ്ങ് അറബി നാട്ടിൽ അവൻ്റെ അർബാബിൻ്റെ, കിഴക്കേതാ പടിഞ്ഞാറേതാന്നറിയാത്ത വലിയ വീട്ടിൽ ജോലിക്കാർക്ക് കിടക്കാനുള്ള കുടുസ്സു മുറിയിലെ തട്ടുതട്ടായുള്ള കട്ടിലിലെ ഏറ്റവും മുകളിലെ ബെഡ്ഡിൽ തെക്കുവടക്കായി ചുരുണ്ടു കിടപ്പുണ്ടായായുന്നു. 

കിടക്കുമ്പോഴും സൂര്യനുദിക്കുന്നതിനു മുന്നെ എഴുന്നേറ്റ് മുറ്റത്തെ നാലു കാറുകൾ കഴുകിയിടണമെന്ന അർബാബിൻ്റെ സ്വരം അവൻ്റെ ചെവിയിൽ ഉയർന്നു കേട്ടു. പകൽ വെട്ടം വീഴുന്നതിനു മുന്നെ ഉണർന്ന് ചെയ്തില്ലെങ്കിൽ കത്തുന്ന സൂര്യൻ്റെ ചൂടിനാൽ ചിലപ്പോൾ കരിഞ്ഞു പോവുമെന്നവന് നല്ല ബോധ്യമുണ്ട്. 

“പൂജാമുറിയുടെ പണി തീർന്നിട്ടു വേണമത്രേ അഗ്നി കോണിലെ അമ്മിക്കല്ല് മാറ്റിയിടാൻ”

✍️ ഷിജിത് പേരാമ്പ്ര