നിത്യാ ലക്ഷ്മി എൽ എൽ എഴുതിയ ലഘു നോവലാണ് കാരയ്ക്കമരം. ബാലസാഹിത്യ രചനകളിൽ ഉൾപ്പെടുത്താവുന്ന നോവൽ. ഡി സി ബുക്സിൻ്റെ ഗ്രൂപ്പിൽ ഉൾപ്പെട്ട കറൻ്റ് ബുക്ക്സാണ് നോവൽ പബ്ലിഷ് ചെയ്തിരിക്കുന്നത്.
കുട്ടികളുടെ നിഷ്കളങ്കതയും അവരുടെ സന്തോഷങ്ങളും വേദനകളും ഹൃദ്യമായ ശൈലിയിൽ വരച്ചിട്ടിരിക്കുന്ന നോവൽ, ശംഭു എന്ന കുട്ടിയുടെയും അവൻ്റെ കൂട്ടുകാരി കുഞ്ഞിപ്പാറുവിന്റേയും കാരയ്ക്കപോലെ ചവർപ്പും മധുരവും നിറഞ്ഞ ജീവിതത്തിലൂടെയുള്ള മനോഹരമായ ഒരു യാത്രയാണ്.
കുട്ടിക്കളികൾ മാത്രമുള്ള കഥയല്ല കാരയ്ക്കമരം. കുട്ടികളുടെ മനസ്സ് കാണാൻ ശ്രമിക്കാത്തവരെക്കുറിച്ചും, ഈ സമൂഹത്തിൽ കുട്ടികൾ നേരിടുന്ന ചൂഷണങ്ങളെക്കുറിച്ചും, അതിനെതിരെ പ്രതികരിക്കേണ്ട ആവശ്യകതയെക്കുറിച്ചും കൃത്യമായി പറയുന്ന നോവൽ കൂടിയാണ്.
മുതിർന്നവർ അറിയാതെ പോകുന്ന കുഞ്ഞു മനസ്സിൻ്റെ വേദനകൾ കുട്ടികളുടെ സംഭാഷണങ്ങളിലൂടെ വായനക്കാരുടെ ഹൃദയങ്ങളിൽ ഒരു വിങ്ങലായി മാറ്റുന്നുണ്ട് എഴുത്തുകാരി. സാരോപദേശങ്ങൾ നിറഞ്ഞ എഴുത്തല്ല, പറയേണ്ട കാര്യങ്ങൾ വായനക്കാരുടെ ഉള്ളിൽ തട്ടുന്നവിധം കഥയുടെ ഒഴുക്കിനനുസരിച്ച് പറഞ്ഞുപോവുകയാണിവിടെ.
നിരവധി ചെറുകഥകളിലൂടെ കൈവരിച്ച നിത്യാലക്ഷ്മിയുടെ ഒതുക്കവും ശക്തവുമായ രചനാശൈലി തന്നെയാണ് ഈ നോവലിലും കാണാൻ കഴിയുക. കുട്ടികളുടെ നോവലാണെങ്കിലും വലിയവർക്കും ഒട്ടും മടുപ്പില്ലാതെ വായിക്കാൻ കഴിയുന്ന രചന തന്നെയാണ് കാരയ്ക്കമരം.
