മരിച്ചു നോക്കണം

‘നാളെ അച്ഛന്റെ ബലിയാണ്… ഞാൻ അതിന് വന്നതാണ്. 

ഇന്ന് ഒരിക്കൽ. രാത്രി ചപ്പാത്തിയാ. 

കറി.. എന്താന്ന് അറിയില്ല. 

ഞാൻ പിന്നെ വിളിക്കാം. 

എടാ നീ ഫോൺ വയ്ക്ക്. 

 

 

ദാ. വരുന്നു… അമ്മ വിളിച്ചോണ്ടിരിക്കല്ലേ. 

ഞാൻ വന്നു കഴിച്ചോളാം. 

അമ്മയ്ക്ക് കിടക്കണമെങ്കിൽ മേശപ്പുറത്തു അടച്ചു വച്ചേക്കു. 

ഞാൻ എടുത്തു കഴിച്ചോളാം. 

 

അതല്ലടാ. നാളെ ബലിയല്ലേ?

അടുക്കളയിൽ പഴയ ആഹാരം ഒന്നും പാടില്ല. അടുപ്പ്, പാത്രങ്ങൾ എല്ലാം കഴുകി തുടച്ചു, നാളത്തെ ബലി കൂട്ടെല്ലാം മുറത്തിൽ നിരത്തി വയ്ക്കണം. അങ്ങനെ കുറെ പണി കഴിഞ്ഞാൽ പിന്നെ അടുക്കളയിൽ ആരും കയറരുത്. 

 പോ… അമ്മ

ഈ കാലത്ത് അങ്ങനെ ഒന്നും നോക്കാൻ പറ്റില്ല…

 

ഞാൻ തർക്കിക്കാൻ ഇല്ല. അമ്മയുടെ ഇഷ്ടം  പോലെ ചെയ്തോ. 

ഞാൻ ദാ വരുന്നു. 

 അച്ഛന്റെ ബലിക്ക് വേണ്ടി ലീവ് എടുത്തു വന്നതല്ലേ. നിനക്ക് ഇഷ്ടമുള്ളത് ഒന്നും ഒരിക്കൽ ദിവസമായത് കൊണ്ടു ഉണ്ടാക്കി തരാൻ പറ്റുന്നില്ലല്ലോടാ. 

എന്നാൽ ചൂട് ചപ്പാത്തിയെങ്കിലും കഴിക്കട്ടെ ന്ന് വിചാരിച്ചാണ് ഞാൻ വിളിച്ചോണ്ടിരിക്കുന്നത്. 

 

രാവിലെ നേരത്തെ എണീക്കണം കേട്ടോ. 

മ്മ്… അലാറം വച്ചോളാം. അമ്മ എന്റെ കതകിൽ തട്ടി. നാട്ടുകാരെ ഉണർത്താതെ ഇരുന്നാൽ മതി. 

 ഞാൻ ഒന്നും മിണ്ടുന്നില്ല. 

അവൻ മുടങ്ങാതെ അച്ഛനു ബലി ഇടുന്നലോ. അതു തന്നെ ഭാഗ്യം. 

വിമലഏട്ടത്തിയുടെ മകൻ, ബാബു ചേട്ടന് ബലി ഇടുന്നില്ലന്ന് എന്തോരം കരച്ചിലായിരുന്നു. നാരായണൻ കൊച്ചാപ്പന്റെ മരണത്തിനു പോയപ്പോൾ പറഞ്ഞു പറഞ്ഞു കരഞ്ഞത് കണ്ണിന്റെ മുന്നിൽ നിൽക്കുന്നു. 

 

ഓട്ടു മൊന്തയും കിണ്ടിയും ആമ പലകയുമെല്ലാം കഴുകി ഇറയത്ത് കമഴ്ത്തി. നാളെ ശാന്തിക്കാർ വന്നു തളിച്ചെടുക്കും. 

ചാണകം ഉരുള കൂട്ടി വച്ചിട്ടുണ്ട്. 

എല്ലാം ആയോ. ഇനി ഞാൻ എന്തെങ്കിലും  എടുത്തു വയ്ക്കാൻ മറന്നോ?

ഇല്ല. എല്ലാമെടുത്ത് വച്ചു. 

 

‘ഒരിക്കൽ’ ദിവസം രാത്രി, പിതൃക്കൾ വന്നു നോക്കും. 

എല്ലാം ശരിയായി ഒരുക്കിയിട്ടുണ്ടോന്ന്. 

ബലിക്കൂട്ടങ്ങൾ ഒരുക്കി വയ്ക്കൽ. ആണ് ഒരിക്കൽ ആയതെന്ന് തോന്നുന്നു. 

 

നാളെ കുരുക്കളോട് പറയണം. ഞാതിയും അല്ലാത്തവർക്കും ഒരു കൈ എള്ളും വെള്ളവും നീട്ടണന്ന്. 

നീയതു   പ്രത്യേകം പറയണം. 

ഞാൻ അടുക്കളയിൽ ആയിരിക്കും. 

പറയാൻ വിട്ടു പോകണ്ട. 

 

എന്താ ഈ ഞാതിയും അല്ലാത്തവരും?

 

ഞാതി, നമ്മുടെ കുടുംബത്തിലെ അച്ഛനു മുന്നേ തീപ്പെട്ടു പോയവർ. ‘അല്ലാത്തവർ’ ഏതെങ്കിലും കുട്ടികൾ ബലി ഇടാത്തത് കൊണ്ടു വിശന്നു നടക്കുന്ന മാതാപിതാക്കൾ. 

 

അയ്യോടാ… കൊള്ളാമല്ലോ…

എന്റെ അച്ഛന് ബലി യിടാൻ ലീവ് എടുക്കാൻ ഞാൻ പെട്ട പാട് എനിക്കറിയാം. 

അതിനിടയിൽ “ഞാതിയും അല്ലാത്തവർക്കും. ”

അമ്മ പോയി കിടക്കാൻ നോക്ക്. 

നാളെ ബലിയൂട്ട് കഴിഞ്ഞ ഉടനെ എനിക്കിറങ്ങണം. 

 

നാളെ തന്നെ നീ പോവാണോ? എന്റെ മറുചോദ്യത്തിന് കാത്ത് നില്കാതെ മുറിയിൽ കയറി കതകു വലിച്ചടച്ചവൻ. 

 

എന്റെ മുഖത്ത് എന്തോ ബലമായി വന്നടിച്ചപോലെ…

 

നീ ഉറങ്ങിയോ??

 

ഇല്ല. കിടന്നുന്നേ ഉള്ളു. 

 

ഏയ്‌. അവനൊരു തമാശ പറഞ്ഞതല്ലേ??

ഇത്രയും ദൂരം യാത്ര ചെയ്തു വന്നിട്ട്. നല്ലൊരു ഭക്ഷണം പോലും കഴിക്കാതെ, അവന്റെ കുട്ടികളെയും അവളെയും കാണാതെ. ഒക്കെയുള്ള ഒരു ആവലാതി. അത്രേ ഉള്ളു. അതു നീ കാര്യമാക്കണ്ട. 

ഒന്നും ആലോചിക്കേണ്ട. 

നാളെ നേരത്തെ എണീക്കണ്ടേ??

പണ്ടത്തെ പോലെ അമ്പത്തിരണ്ടു കൂട്ടം ഒന്നും നീ ഉണ്ടാക്കാൻ നിൽക്കണ്ട കേട്ടോ??

നിന്നാലാവുന്ന എന്തെങ്കിലും ഒന്നോ രണ്ടോ കൂട്ടം മതി. 

എനിക്കും പ്രായമേറി വരുന്നു. വലിയ വിശപ്പുന്നുമില്ല. 

നീ ഇങ്ങനെ എനിക്ക് വിശക്കും വിശക്കുമെന്ന് നാളത്തേക്കു വേണ്ടി എത്ര ദിവസമായി ഒരുക്കങ്ങൾ നടത്തുന്നു…

അതുകൊണ്ട് പറഞ്ഞതാ. 

എന്തെങ്കിലും മതി. രണ്ടൂന്നു കൂട്ടം. 

കേൾക്കുന്നുണ്ടോ നീയ്?

കിടന്നോ. 

കാലിൽ നല്ല നീരുണ്ടല്ലോ??

ഇന്ന് ‘ഒരിക്കൽ’ ആയത് കൊണ്ട് എല്ലാം നീ തനിയെ തന്നെ ചെയ്തു. 

ആ പുറപണിക്കാരിയോട് വരണ്ടാന്നു പറഞ്ഞെതെന്തിനാ?

ഇത്രയും നേരം നിന്നിട്ടല്ലേ. കാലിൽ നീര്?

കിടന്നോ?

നീ എന്തിനാ “ഞാതിയും അല്ലാത്തവർക്കും. ” എന്നൊക്കെ അവനോടു പറയാൻ പോയത്?

ഇപ്പോഴത്തെ കുട്ടികൾക്ക് അതൊന്നും ഇഷ്ടമാവില്ല. 

ഇക്കഴിഞ്ഞ അഞ്ചു വർഷമായാണ് അവൻ എന്നെ കുറിച്ച് നല്ലത് പറയുന്നത്. 

അതു കേട്ട് അല്പ്പം സന്തോഷത്തോടെയാ ഞാൻ ഇരിക്കുന്നത്. 

 

നീ എന്താ ആലോച്ചിക്കുന്നതെന്നു ഞാൻ പറയട്ടെ?

അല്ലെങ്കിൽ വേണ്ട. 

നീ ഒന്നും ആലോചിക്കണ്ട. 

കിടന്നോ. 

ഉറങ്ങിക്കോ. 

നീ എത്ര നാൾ ഇവിടെ ഇങ്ങനെ ഒറ്റയ്ക്ക്. 

വേണ്ട അതും ഞാൻ പറയുന്നില്ല. 

നിനക്കത് ഇഷ്ടമാവില്ല. 

കിടന്നോ. 

ഞാൻ ഇങ്ങനെ ചലപില പറഞ്ഞോണ്ടിരുന്നാൽ നീ എങ്ങനെ ഉറങ്ങാനാ?

നാളെ നേരത്തെ ഉണരണ്ടേ?

ഈ ഒരു ദിവസത്തിനായാണ് നീ ജീവിക്കുന്നത്. എന്നെനിക്ക് അറിയാഞ്ഞിട്ടല്ല. 

മതി. എനിക്ക് വലിയ വിശപ്പൊന്നുമില്ല. സത്യം. 

നിന്നെപ്പോലെ തന്നെ ‘ഞാതിയും അല്ലാത്തവർക്കും ഊട്ടു നടത്തുന്നകുറേ പേരുണ്ട്. 

നീ എന്താ ചിരിച്ചത്??

ഇപ്പോഴത്തെ മക്കളെല്ലാം പല അനാഥ മന്ദിരങ്ങളിലും മാതാപിതാക്കളുടെ ചരമ ദിനത്തിനു കാശ് അയച്ച കൊടുക്കുന്നവരാണ്

അല്ലാതെ. ഇങ്ങനെ അമ്പത്തി രണ്ടു കറിയും കൂട്ടി, ഒരിക്കൽ ഇരുന്ന് എള്ളും വെള്ളവും നീട്ടാറില്ല. 

അങ്ങനെ ആരൊക്കയോ ‘ഞാതി അല്ലാത്തവർക്കും. ’ ഊട്ടുന്നത് കൊണ്ട്. എനിക്കിപ്പോൾ വലിയ വിശപ്പൊന്നുമില്ല. 

ഒന്നും ഓർക്കണ്ട. നീയ്

കിടന്നോ. 

 

കാക്കയ്ക്ക് ഉരുള ചോറ് ഉരുട്ടി, എള്ളും വെള്ളവും നീട്ടാൻ എത്രായിരം രൂപ ചിലവാക്കുന്നു? എത്ര ദൂരം യാത്ര ചെയ്തു വരുന്നു… മക്കൾ…

കാക്കക്ക് ഉരുള ചോറ് കൊടുക്കുമ്പോൾ അവർക്ക് ആശ്വാസം

കാക്കയ്ക്ക്… ചപ്പ് ചവറിൽ നിന്ന് കിട്ടുന്ന ചോറും ഇങ്ങനെ കിട്ടുന്ന ചോറും ഒരുപോലെ തന്നെ. 

നീ ഇങ്ങനെ ഒരുക്കങ്ങൾ ഒരുക്കി അവൻ ബലിയിടുന്നതും നോക്കി ഉമ്മറ കൊലയിൽ നിന്ന് കണ്ണുനീർ തുടക്കാതെ. 

വാ. എന്റെ കൂടെ

നമുക്ക് ഒരുമിച്ച് ആരെങ്കിലും ഞാതിയും അല്ലാത്തവർക്കും നീട്ടുന്ന എള്ളും വെള്ളവും കിട്ടും. 

മ്മ്. 

ശരിയാണ്. നിങ്ങൾ പറഞ്ഞതാണ് ശരി. 

കാക്കക്ക് ഉരുള ചോറ് കൊടുക്കുമ്പോൾ അവർക്ക് ആശ്വാസം

കാക്കയ്ക്ക്… ഉരുള ചോറിലും ചപ്പ് ചവറിൽ നിന്ന് കൊത്തി തിന്നുന്നചൊറിലും നിന്ന് കിട്ടുന്നത് ഒരേ ആശ്വാസം തന്നെ. 

അതു തിരിച്ചറിയണമെങ്കിൽ. 

”മരിച്ചു നോക്കണം “

ഞാൻ അനന്തമായ എന്റെ നിദ്രയിലേക്ക് ഇറങ്ങി ചെല്ലട്ടെ…

 ✍️ജെകെ

ചിത്രത്തിന് കടപ്പാട് : ഗൂഗിൾ