പുഴയരികിൽ..

അമ്മ പോയ ശേഷം വല്ലപ്പോഴും മാത്രമേ കൃഷ്ണ തന്റെ വീട്ടിലേക്കെത്താറുള്ളു. പുഴയ്ക്ക് സമീപമൊരു വീട്. പുഴയിലേക്ക് കാഴ്ചയെത്തുന്ന ജനാലകൾ. മുന്നിലെ ചെടികളുടെ വർണ്ണാഭ. ഒക്കെയും അമ്മയുടെ ആഗ്രഹങ്ങളായിരുന്നു. അമ്മയും താനുമായി ഈ വീടൊരു കുഞ്ഞു സ്വർഗ്ഗമായിരുന്നു. അമ്മയുടെ എഴുത്തുകൾ, പുസ്തകങ്ങൾ അടുക്കി വച്ച അലമാര. അവിടേക്ക് കയറിയപ്പോൾ തന്നെ അമ്മ മണം. അവൻ മൂക്കു വിടർത്തി ശ്വാസമെടുത്തു. തണുത്ത കൈത്തലം കൊണ്ട് അമ്മയൊന്നു തലോടിയോ..

ഓർമ്മകൾ !!

പുഴയരികിൽ വസ്ത്രങ്ങൾ അലക്കുകയായിരുന്ന അമ്മയ്ക്കരികിലെത്തി. പുഴയിൽ കാലിട്ട് അനക്കി ഓളങ്ങളുണ്ടാക്കി അമ്മയോട് വർത്തമാനം പറഞ്ഞിരിക്കുന്ന തന്നെ,  കൃഷ്ണയവിടെ കണ്ടു.

” ഇങ്ങനെ ഇവിടെ ഇരിക്കാൻ എന്ത് രസമാ അല്ലേ അമ്മേ “.

അമ്മയൊന്നു വാത്സല്യത്തോടെ പുഞ്ചിരിച്ചു. തണുത്ത കൈത്തലം കൊണ്ട് തന്റെ കവിളിൽ തലോടി.

വേനൽക്കാലത്ത് പുഴയിലെ വെള്ളം കുറയുമ്പോൾ അമ്മ പരിതപിക്കും. മഴക്കാലത്ത് വെള്ളമങ്ങനെ നിറഞ്ഞൊഴുകുമ്പോൾ അമ്മ കൊച്ചു കുട്ടികളെപ്പോലെ സന്തോഷിക്കും.

ചിലപ്പോൾ അമ്മയുടെ മടിയിൽ തലവച്ച് കിടക്കുമ്പോൾ അമ്മ പഴയ കഥകൾ പറഞ്ഞു തരും. അമ്മയും ഇളയമ്മയുമായി കുളത്തിൽ കുളിക്കാൻ പോയതും. ആമ്പൽ പൂ പറിക്കാൻ ഇറങ്ങിയ ഇളയമ്മ വെള്ളത്തിൽ മുങ്ങിപ്പോയപ്പോൾ, അമ്മ രക്ഷിച്ചതുമൊക്കെ. അവരുടെ കുട്ടിക്കാലം കേട്ടിരിക്കുമ്പോൾ, ഒറ്റ മകനായ തനിക്ക്, വല്ലാത്ത ഏകാന്തത അനുഭവപ്പെട്ടിരുന്നു.

പുഴയ്ക്കു കുറകേയുള്ള പാലം കടന്ന് അപ്പുറത്തു ചെന്നാൽ കൃഷ്ണന്റെ അമ്പലമാണ്, ഓഫീസിൽ നിന്നെത്തിയാൽ മടിപിടിച്ച്, മൊബൈലും നോക്കി ഇരിക്കുന്ന തന്നെ അമ്മ നിർബന്ധിച്ചാണ് അമ്പലത്തിലേക്ക് കൂട്ടിക്കൊണ്ടു പോകാറുണ്ടായിരുന്നത്. വലിയ കൃഷ്ണഭക്തയായ അമ്മ തന്നെയാണ് തനിക്ക് കൃഷ്ണയെന്ന പേരിട്ടതും.

അച്ഛന്റെ മരണശേഷം, അമ്മയുടെ ഒറ്റപ്പെടലിൽ കൂട്ടായതും പുഴ തന്നെയായിരുന്നു. പുഴയുടെ പടവിൽ ചെന്നിരുന്ന് എന്തോ ഓർത്തിരിക്കുന്ന അമ്മ, അന്നൊക്കെ ആ നിശബ്ദത തന്നെ വല്ലാതെ സങ്കടപ്പെടുത്തിയിരുന്നു.

പുഴയ്ക്കരികിലെ കണിക്കൊന്ന മരത്തിൽ നിറയെ പൂക്കളുണ്ടാകുമ്പോഴും അമ്മ ഒത്തിരി സന്തോഷിച്ചിരുന്നു.

ഒടുവിൽ ആ പുഴ തന്നെ നിറഞ്ഞ ഒഴുക്കിൽ അമ്മയേയും കൊണ്ടു പോയി.

അന്ന് ഓഫീസ് മീറ്റിങ്ങിനായി കുറച്ച് അകലേക്ക് പോയതായിരുന്നു കൃഷ്ണ.

മഴയത്ത് നിറഞ്ഞൊഴുകിയ പുഴയിലേക്ക് വീട്ടിലെ പൂച്ചക്കുട്ടി അകപ്പെട്ടു പോയി. അവളെ രക്ഷിക്കാൻ ഇറങ്ങിയതാണത്രേ അമ്മ. നിലവിളി ശബ്ദം കേട്ട് അടുത്ത വീട്ടുകാർ ഓടിയെത്തിയപ്പോഴേക്കും ഒഴുക്കിൽ പെട്ടിരുന്നു. അമ്മ ഏറെ സ്നേഹിച്ച പുഴ. അമ്മയെയും തിരികെ സ്നേഹിച്ചിരുന്നുവോ?  എവിടേക്കാവും കൊണ്ടു പോയത്. ശരീരം പോലും കിട്ടിയില്ല.

അമ്മ രക്ഷപെട്ട്  എവിടെയോ ജീവിച്ചിരിക്കുന്നു എന്നാണ് വിശ്വാസം. എന്നെങ്കിലും വീട്ടിലേക്ക് തിരികെ എത്തുമെന്ന പ്രതീക്ഷയിൽ അയലത്തെ വീട്ടിൽ താക്കോലേൽപ്പിച്ചാണ് പോകാറ്.

ചില നേർത്ത പ്രതീക്ഷയുടെ പച്ച ഞരമ്പുകൾ !!!

അമ്മ പോയതിൽ പിന്നെ  അത്രയും വലിയ മഴ പെയ്തിട്ടേയില്ല. കഴിഞ്ഞ ഒരു വർഷമായി വറ്റി വരണ്ടു നൂലുപോലെ, ഇതിലേ ഒരു പുഴ ഒഴുകിയിരുന്നു എന്നതിന്റെ അടയാളം പോലെ പുഴ..

സരിത സുനിൽ ✍️