ലൈക്കുകളുടെ മനഃശാസ്ത്രം

മനോഹരമായൊരു കവിത. വൃത്തവും താളവും ഇഴ ചേർന്നിരിക്കുന്നു. അവസാന മിനുക്കുപണിയും കഴിഞ്ഞ് അവളാ രചന മുഖപുസ്തകത്തിൽ പോസ്റ്റ്ചെയ്തു.

അഞ്ച് മിനുട്ട്…

പത്തു മിനുട്ട്…

ഒരു ലൈക്കുപോലും വന്നില്ല.

ഒരു മണിക്കൂർ…

രണ്ടു മണിക്കൂർ…

ആരുംകണ്ട ഭാവമില്ല.

10k ഫോളോവേർസുള്ള തന്റെ കവിത വായിക്കാൻ ആരുമില്ലേ?

ഹൃദയം തപിച്ചു.

ഹൃദയതാപം കണ്ണിലൂടെ പ്രവഹിച്ചു.

കണ്ണുകൾ തുടച്ചവൾ വാലിട്ടുമഷിയെഴുതി.

അലമാരയിൽ നിന്നൊരു ചെമന്ന പട്ടെടുത്ത് നന്നായി ഞൊറിഞ്ഞുടുത്തു.

ചോര തൊട്ടെടുക്കുംവിധം ചുണ്ടിൽ ചായംതേച്ചു. വശ്യമായി പുഞ്ചിരിച്ചു.

ഒരു ക്ലിക്ക്..

കവിതയോടൊപ്പം സെൽഫി ചേർത്ത് ഒന്നൂടി പോസ്റ്റി

പത്തു മിനിറ്റിനുള്ളിൽ നൂറിലധികം ലൈക്സ്, ചറപറാ കമന്റ്സ്

1k, 2k..10k…50k

കവിത വൈറലായി. ഒപ്പം നീലമിഴികളിൽ നിറഞ്ഞുതുളുമ്പും പ്രണയവും.

ഫോൺ ഡിസ്പ്ലേയിൽ 10M ലൈക്ക് കാണേ അവളുടെ ചുണ്ടിന്റെ കോണിലൊരു പരിഹാസം ഊറിക്കൂടി .