അവൾക്കുമുണ്ടായിരിന്നിരിക്കണം
ഒരു കുഞ്ഞനിയത്തി….
നക്ഷത്ര കണ്ണുള്ള.
ചിരിക്കുമ്പോൾ നുണക്കുഴി വിടരുന്ന
ഇളം ചുണ്ടിൽ നിറയെ പാൽ പുഞ്ചിരിയുള്ള ഒരു കുഞ്ഞനിയത്തി
ചിറക് വിടർത്താൻ തുടങ്ങുമ്പോഴേക്കും
അവളിൽ നിന്നും അകന്ന് പോയ ഒരു കുഞ്ഞനിയത്തി..
കാലമോ വിധിയോ നരനോ നരാധമനോ.. ആരോ
അടർത്തി മാറ്റിയ ഒരിളം പൈതൽ
അവൾ നഷ്ടപെട്ട അനിയത്തിക്ക് വേണ്ടി
ഈ ലോകത്തോട് മുഴുവൻ കലഹിച്ചിരിക്കാം
ചിണുങ്ങി കൊണ്ട് പരാതി പറഞ്ഞിരിക്കാം…
അവളുടെ പരിദേവനങ്ങൾ ഒരു
ഇരുട്ടു മുറിയിലെ കരിങ്കൽ
ഭിത്തികളിൽ തട്ടി
പോകാനിടമില്ലാതെ അലിഞ്ഞു തീർന്നിരിക്കാം…
വിശപ്പിന്റെ വിളിയാളങ്ങളും
ഒറ്റപ്പെടലിന്റെ സങ്കടങ്ങളും
അവളുടെ പുഞ്ചിരിയുടെ
നിറം കെടുത്തിയിരിക്കാം
ഉത്സവ പറമ്പുകളിലും നാലാൾ
കൂടുന്നിടത്തും അവൾ പരതി
ഈ ആൾക്കൂട്ടത്തിനിടയിൽ
എവിടെയെങ്കിലും അവളുണ്ടോ
നക്ഷത്ര കണ്ണുള്ള ചിരിക്കുമ്പോൾ
നുണക്കുഴി തെളിയുന്ന
തന്റെ കൊച്ചനുജത്തി
അവളുടെ സ്വപ്നങ്ങളിൽ ഒരിളം പുഞ്ചിരിയോടെ
അവളുടെ കുഞ്ഞനിയത്തി കടന്ന് വരുന്നുണ്ടായിരിക്കാം..
ഹൃദയത്തിന്റെ ഭാഷകളിൽ അവർ
സംസാരിച്ചിട്ടുണ്ടായിരിക്കാം..
ഒരു കുഞ്ഞു ബലൂൺ അവൾ അനിയത്തി കുട്ടിക്ക് സമ്മാനിച്ചിരിക്കാം
ആ കുഞ്ഞു ഹൃദയം തുറന്നുള്ള ഒരു പുഞ്ചിരി അവൾ പകരം വാങ്ങിയിരിക്കാം….
ചില സ്വപ്നങ്ങളിങ്ങനെ കണ്മുന്നിൽ
നേരിൽ തെളിയുമ്പോൾ
തേങ്ങലടക്കിയ പുഞ്ചിരിയോടെ
അവൾ വിശപ്പിനെ മറന്നു..
ലോകത്തെ മറന്നു… ദൂരെ
ഒരു കോണിൽ നിന്നും സദാ വീക്ഷിക്കുന്ന ആ പൈശാചിക
കണ്ണുകളെ മറന്നു..
ഈ രാത്രി അവൾ സുഖമായുറങ്ങും
ചുണ്ടുകളിൽ ഒരു മന്ദഹാസവുമായി
ഇന്നവൾ നിറമുള്ള സ്വപ്നങ്ങൾ കാണും
സ്വപ്നത്തിന്റെ മാലാഖാമാർ അവളെ
തഴുകി കൊണ്ടിരിക്കും പ്രിയമുള്ളവളെ നാളെയുടെ നിന്റെ ദിനങ്ങൾ സുന്ദരമാകട്ടെ…പ്രാർഥനകൾ..
ഫൈസൽ മന്ദലാംകുന്ന്