ഇഷ്ടമാണ് നൂറുവട്ടം

നിന്നെ എനിക്കെന്നുമിഷ്ടമാണ്
ആദ്യമായ് നീ വരും നേരം പരക്കുന്ന
മണ്ണിൻ സുഗന്ധവും ഇഷ്ടമാണ്
നിന്നുടെ സംഗീതമിഷ്ടമാണ്
നിന്നുടെ മൃദു സ്പർശമേറ്റുകൊണ്ടിതുവഴി
കുളിർകാറ്റിലലയുവാനിഷ്ടമാണ്

നിന്നുടെ നൃത്തവും കണ്ടുകണ്ടങ്ങനെ
നോക്കിയിരിക്കുവാനിഷ്ടമാണ്
ജലകണമോരോന്ന് തുള്ളികളായെന്നെ
കുളിരണിയിക്കുന്നതിഷ്ടമാണ്
ജലമർമ്മരത്തിൻെറ സംഗീതധാരയിൽ
അലിഞ്ഞുറങ്ങീടുവാനിഷ്ടമാണ്

കണ്ണുകളീറനണിഞ്ഞനാൾ നീയെൻ്റെ
കണ്ണുനീർ തുള്ളികൾ ആരുമേ കാണാതെ
കഴുകിക്കളയുവാൻ കൊതിച്ചിരുന്നു
വറ്റിവരണ്ടുള്ള ചുണ്ടുകൾ നിന്നുടെ
ചുംബനത്തിന്നായ് കൊതിച്ചിരുന്നു

പാടവും തോടും തൊടികളുമെല്ലാം
നീവന്നു നിറയുന്നതിഷ്ടമാണ്
കടലാസുതോണികൾ ഉണ്ടാക്കി നിന്നുടെ
കൂടെ കളിക്കുവാനിഷ്ടമാണ്
വേനലിൻ ചൂടേറ്റ് നിന്നുടെ വരവിനായ്
കാത്തുകാത്തങ്ങനെ നിൽക്കുന്ന നേരത്ത്
കാറ്റിൻെറ ചുമലേറി ദൂരേക്കകലുന്ന
നിന്നുടെ കുസൃതികൾ ഇഷ്ടമാണ്.
സൂര്യ കോപത്തിൻ്റെ കഠിനമാം ചൂടേറ്റ്
കുടിനീരു വറ്റിയ തൊടിയിലെ കിണറിൻ്റെ
ഹൃദയത്തിന്നറകളിൽ ഉറവയായ് വന്നെത്തും
നിന്നുടെ കാരുണ്യമിഷ്ടമാണ്

എങ്കിലും ചില നേരം
ഭ്രാന്തിയെ പോലെ നീ
പേമാരിയായ് വന്ന്
ചുടല നൃത്തം ചെയ്ത്
സംഹാര താണ്ഡവമാടിടുമ്പോൾ
നിന്നെ പഴിക്കാതെ, നിന്നെ ശപിക്കാതെ,
എങ്ങിനെ ഞാനിതു കണ്ടു നിൽക്കും.

കാറ്റായി,മിന്നലായ്, മലവെള്ള പാച്ചിലായ്,
എല്ലാം തകർത്തു നീ പോയിടുമ്പോൾ
ഉറ്റവർ, ഉടയവർ, പിഞ്ചോമനകളും
നിരാലമ്പ ചിത്തരായ് നിലവിളിക്കേ
എങ്ങിനെ ഞാൻ നിൻ്റെ
വന്യ സംഗീതത്തെ
കണ്ണുമടച്ചിങ്ങു കേട്ടിരിക്കും

കാത്തിരിക്കുന്നു ഞാൻ
നിൻ്റെ ഈ ഭ്രാന്തൊക്കെ
മാറി നീ വരുമെന്ന ചിന്തയോടെ,
സുസ്മേര വദനയായ്
വന്നിങ്ങണഞ്ഞിട്ടു
കുളിരാർന്ന കരമോടെ
കെട്ടിപുണർന്നെൻ്റെ
പരിഭവം തീർത്തിടൂ
മമ സഖീ നീ…..

ഷീജിത്ത് – പിണറായി