മായം മാനവീയം

മായം കലരാത്തതെന്തുണ്ടു ഭൂമിയിൽ
മായമെന്ന രണ്ടക്ഷരമല്ലാതെ
അമ്മയെന്ന വാക്കുണ്ടായിരുന്നു,നീ
നിൻകുരുന്നിനെ കൊന്നു തള്ളും വരെ
അച്ഛനെന്ന വാക്കുണ്ടായിരുന്നു, നിൻ
പിഞ്ചു കുഞ്ഞിനെ കാമിപ്പതുവരെ
മക്കളെന്നവാക്കുണ്ടായിരുന്നു നിൻ
ജനയിതാക്കളെ നാടുതള്ളും വരെ

പാലും, പഴവും, പച്ചക്കറികളും
ജീവ ജലവും ജീവ വായു വരെ,
മായം ചേർത്തു വിപണിയിൽ വിറ്റു നീ
നേടിടുന്നൂ പണം, അധികാരവും
നന്മ, കാരുണ്യ ചിന്തകകളോരോന്നായ്
മണ്ണിൽ നിന്നും തുടച്ചു മാറ്റുന്നു നീ
നിൻ്റെ കഴുകൻ കണ്ണിൽ പെടാത്തതായ്
എന്തു ബാക്കിയുണ്ടിന്നീയനവിയിൽ

ക്രൂരതയാം കൊടുവിഷം തീണ്ടിയ
മനുഷ്യനെന്ന വാക്കെന്നേ മരിച്ചുപോയ്
പേടിയാണെന്നും ജീവജാലങ്ങൾക്ക്
മാനവനെന്ന പേരു കേൾക്കുമ്പൊഴേ
സ്വാർത്ഥ താൽപര്യമൊന്നുമാത്രം നോക്കി
ക്രൂര കൃത്യങ്ങൾ ചെയ്യാൻ മടിക്കാത്ത
വന്യ ജീവിതൻ പേരാണ് മാനുഷൻ
കാമ, ക്രോധങ്ങൾ ലോഭ, മോഹങ്ങൾ തൻ
തേരിലേറി നീ എങ്ങുമേ പായുന്നൂ
ലാഭക്കൊതിയൂറും വാളും പിടിച്ചു നീ
നിൻ്റെ മോഹങ്ങൾ വെട്ടി പിടിക്കുവാൻ

ദുര മൂത്ത്- മൂത്ത്, അന്ധനായ് മാറി നീ
സ്വന്ത ബന്ധങ്ങൾ എല്ലാം മറന്നിതാ
ചെയ്തു കൂട്ടുന്നു ക്രൂരത പലതുമേ
പരിഷ്കാരമെന്ന പേരും പറഞ്ഞുനീ
പിറന്നു വീഴുന്ന കുഞ്ഞിനെയെങ്കിലും
മായമില്ലാത്ത സ്നേഹം പകർന്നു നീ
സ്വാർത്ഥ താൽപര്യ മോഹങ്ങളില്ലാത്ത
കുഞ്ഞു മാലാഖമാരായ് വളർത്തിടൂ
ഇനി വരുന്നൊരു തലമുറയെങ്കിലും
സ്നേഹചിന്തകളോടെയീ ഭൂമിയിൽ
അല്ലലില്ലാതെ ജീവിച്ചുതീർക്കണം
മായമില്ലാത്ത മാനവ ജീവിതം.

ഇനി വരുന്നൊരു തലമുറയെങ്കിലും
സ്നേഹചിന്തകളോടെയീ ഭൂമിയിൽ
അല്ലലില്ലാതെ ജീവിച്ചുതീർക്കണം
മായമില്ലാത്ത മാനവ ജീവിതം.

ഷീജിത്ത് -പിണറായി