തിരുവോണത്തോണി – പമ്പയിലൂടെ ഒരു യാത്ര

ഉത്രാടം നാളിൽ, കാലാവസ്ഥയെ അതിജീവിച്ച്, രാത്രിയുടെ നിശബ്ദതയിൽ, നന്നായി എണ്ണ തേച്ചു മിനുക്കിയ ഈ വള്ളം കഠിനമായ യാത്ര ആരംഭിക്കുന്നു. നീരണിയൽ എന്നാണ് ഈ ചടങ്ങ് അറിയപ്പെടുന്നത്. കാട്ടൂർ ഗ്രാമത്തിലെ മഹാ വിഷ്‌ണു ക്ഷേത്രത്തിൽ നിന്ന്, 12 കിലോമീറ്റർ അകലെയുള്ള ആറന്മുള ശ്രീ പാർഥസാരഥി ക്ഷേത്രത്തിലേക്കാണ്, ഓണ വിഭവങ്ങൾ നൽകുന്നത്തിനായുള്ള ഈ യാത്ര. നദിയുടെ തീരങ്ങൾ ഈ ആഘോഷം കാണുവാനായി വന്ന സഞ്ചാരികളും ഭക്തജനങ്ങളും കൊണ്ട് നിറഞ്ഞൊഴുകുന്നു.

ക്ഷേത്ര പുരോഹിതരുടെ കുടുംബമായ മങ്ങാട്ട് ബ്രാഹ്മണ കുടുംബത്തിലെ മൂത്ത അംഗമായ ഭട്ടതിരിയുടെ വരവോടെ ആഘോഷങ്ങൾക്ക് തുടക്കമായി. വള്ളത്തിന് അകമ്പടി സേവിക്കുന്നത് ഭട്ടതിരിയാണ്. അദ്ദേഹം “തോണിയേറും”മ്പോൾ ഗ്രാമവാസികൾ ഊഷ്മള സ്വീകരണം നൽകുന്നു. നായർ കുടുംബങ്ങളിലെ 18 പ്രതിനിധികളും ദേവസ്വം ഉദ്യോഗസ്ഥരും ഭട്ടതിരിയോടൊപ്പം വള്ളത്തിലുണ്ടാവും.

പ്രത്യേകം തയാറാക്കിയ അറിയിപ്പ് തോണിയില്‍ ഭട്ടതിരി മീനച്ചിലാറും വേമ്പനാട് കായലും കടന്ന് പമ്പയിലൂടെ തുഴഞ്ഞ് രാവിലെ ആറന്മുളയിലും തുടര്‍ന്ന് ഉച്ചയോടെ കാട്ടൂരിലെത്തും. കാട്ടൂരിലെത്തുന്ന ഭട്ടതിരിക്ക് ആചാരങ്ങളോടെ വരവേല്പ് ലഭിക്കും. അയിരൂർ പുതിയകാവ് ക്ഷേത്രത്തിൽ ഉച്ചപൂജ ; തുടര്‍ന്ന് കാട്ടൂര്‍ മഹാവിഷ്ണു ക്ഷേത്രത്തില്‍ ദീപാരാധനയ്ക്ക് ശേഷമാണ് തിരുവോണത്തോണി ആറന്മുളയിലേക്ക് തിരിക്കുന്നത്.

കാട്ടൂർ ഗ്രാമവാസികളാണ് വിഭവങ്ങൾ സ്വരൂപിക്കുന്നത്. സന്ധ്യ മയങ്ങുമ്പോൾ തിരുവോണത്തോണി യാത്ര ആരംഭിക്കുന്നു. വഴിയിൽ, തിരുവോണത്തോണി രണ്ടിടത്ത് നിർത്താറുണ്ട്. ആദ്യത്തേത് അയിരൂർ മാടത്തിലാണ്, അതിന് ഉജ്ജ്വല സ്വീകരണവും ധാരാളം വഴിപാടുകളും നൽകുന്നു. പമ്പയുടെ ഇരു കരകളിലുമുള്ളവര്‍ മണ്‍ചിരാതുകള്‍ തെളിച്ചുകൊണ്ട്, ഉച്ചത്തിൽ വായ്ക്കുരവയിട്ടുകൊണ്ടു തിരുവോണത്തോണിയെ സ്വാഗതം ചെയ്യുന്നു. അർദ്ധരാത്രി വള്ളം ഇവിടെ നിന്ന് യാത്ര പുനഃ രാരംഭിക്കുന്നു. അടുത്ത സ്റ്റോപ്പ് മേലുകരയിലാണ്. വെച്ചൂർ മഠത്തിലും ആവേശകരമായ ജനക്കൂട്ടം ഗംഭീര സ്വീകരണം നൽകുന്നു. ഒരു ചെറിയ ഇടവേളയ്ക്ക് ശേഷം, യാത്ര പുനരാരംഭിക്കുന്നു.

ഗംഭീരമായ വെടിക്കെട്ട് പ്രദർശനം കൊണ്ട് പ്രകാശിതമാകുന്ന ആകാശത്തിന് താഴെ തിളങ്ങുന്ന തിരുവോണത്തോണി , വഞ്ചിപ്പാട്ടുകളുടെ ഈണത്തിനൊത്ത് ആടിയുലഞ്ഞ് സഞ്ചരിക്കുന്ന രാത്രികാല യാത്ര, നയന മനോഹര കാഴ്ച തന്നെയാണ്. ആറന്മുള പള്ളിയോടങ്ങളും തിരുവോണത്തോണിക്ക് അകമ്പടി സേവിക്കും. ആറന്മുള പാര്‍ഥസാരഥി ക്ഷേത്രത്തിലെ കെടാവിളക്കിലേക്ക് പകരാനുള്ള ദീപവും തിരുവോണ വിഭവങ്ങളോടൊപ്പം തോണിയിലേക്കു കൈമാറും. തോണിയെ യാത്രയയ്ക്കാന്‍ നിരവധി ഭക്തജനങ്ങളും ക്ഷേത്രത്തിലെത്തും. പമ്പയിലൂടെയുള്ള തോണിവരവ് കാണാന്‍ ഉത്രാടനാള്‍ രാത്രിയില്‍ തീരങ്ങളിലുള്ളവര്‍ ഉറക്കമൊഴിഞ്ഞ് കാത്തിരിക്കും.

തിരുവോണത്തോണി ആറന്മുള ക്ഷേത്രത്തിലേക്ക് ആനയിക്കുന്നു. വള്ളം ആറന്മുള മധു കടവിലെത്തുമ്പോൾ, ആറന്മുളയിൽ ഉത്സവപ്രതീതി വിതറിക്കൊണ്ട്, വഞ്ചിപ്പാട്ടുകളുടെ ആവേശപൂർണമായ ശബ്‌ദങ്ങൾ, അതിനെ സ്വാഗതം ചെയ്യുന്നു. ആയിരക്കണക്കിന് ആ ളുകളാണ് ഈ മഹത്തായ കാഴ്ച കാണാൻ നദിക്കരയിൽ തടിച്ചുകൂടുന്നത്.

തിരുവോണനാള്‍ പുലര്‍ച്ചെ ആറന്മുള പാര്‍ത്ഥസാരഥി ക്ഷേത്രക്കടവിലെത്തുന്ന മങ്ങാട്ട് ഭട്ടതിരിയെ ദേവസ്വം ബോര്‍ഡിന്റെയും ക്ഷേത്ര ഉപദേശകസമിതിയുടേയും പള്ളിയോട സേവാസംഘത്തിന്റെയും ഭാരവാഹികളുടെ നേതൃത്വത്തില്‍ ഭക്തജനങ്ങള്‍ സ്വീകരിക്കും. തോണിയില്‍ നിന്നുള്ള ദീപം ആറന്മുള ക്ഷേത്രത്തിലെ വിളക്കിലേക്ക് പകരും. തലേന്നാൾ വൈകിട്ട്, ദീപാരാധനയ്ക്കു ശേഷം ആറന്മുള പാർഥസാരഥി ക്ഷേത്രത്തിലെ എല്ലാ വിളക്കുകളും അണയ്ക്കും. തിരുവോണ നാൾ പുലർച്ചെ തിരുവോണത്തോണിയിൽ മങ്ങാട്ട് ഭട്ടതിരി കൊണ്ടുവരുന്ന ഭദ്രദീപം ക്ഷേത്രത്തിലെ കെടാവിളക്കിലേക്കു പകരും. അടുത്ത വർഷത്തെ ഉത്രാട ദിവസം വരെ ഈ ദീപമായിരിക്കും തിരുവാറന്മുളയപ്പന് പ്രകാശം ചൊരിയുന്നത്.

തുടര്‍ന്ന് ഓണസദ്യയ്ക്കുള്ള ഒരുക്കങ്ങള്‍ നടക്കും. തിരുവോണ ത്തോണിയില്‍ കൊണ്ടുവരുന്ന വിഭവങ്ങള്‍കൂടി ചേര്‍ത്താണ് തിരുവോണ സദ്യ ഒരുക്കുന്നത്. ഉച്ചയോടെ, എണ്ണമറ്റ രുചികളുള്ള വിഭവങ്ങളുടെ ഒരു വലിയ നിര തയ്യാറാക്കി വിളമ്പുന്നു. തിരുവോണ നാൾ ആസ്വദിക്കാനായി ഭക്തർ ക്ഷേത്രത്തിൽ നിറയുന്നു.

പണ്ട് ആറന്മുളയ്ക്കടുത്ത് കാട്ടൂരില്‍ മാങ്ങാട്ട് എന്ന ഒരു ഇല്ലം ഉണ്ടായിരുന്നു. കാട്ടൂർ മഠത്തിലെ ഭട്ടതിരി എല്ലാ വർഷവും തിരുവോണ നാളില്‍ “കാല്‍ കഴുകിച്ചൂട്ട്” (ഒരു ബ്രാഹ്മണന് ഓണസദ്യ വാഗ്ദാനം) എന്ന ചടങ്ങ് നടത്തിയിരുന്നു. എന്നിരുന്നാലും, ഒരു വർഷം, ആരും എത്തിയില്ല. ഇതിൽ അതീവ ദുഖിതനായ ഭട്ടതിരി ആറന്മുളയിൽ പാർഥസാരഥിയോട് പ്രാർത്ഥിച്ചു, താമസിയാതെ ഒരു ചെറിയ കുട്ടി വന്ന് സദ്യ കഴിച്ചു. ക്ഷേത്രത്തിൽ തന്നെ ഓണസദ്യ നൽകുന്നതാണ് നല്ലതെന്നും ആ കുട്ടി ഭട്ടതിരിയോട് പറഞ്ഞു. ഭട്ടതിരി നിർദ്ദേശിച്ചതുപോലെ ചെയ്തു.

ഒരിക്കല്‍ അയിരൂരില്‍ തോണി എത്തിയപ്പോള്‍ കോവിലന്‍മാര്‍ ഭട്ടതിരിയെ ആക്രമിച്ചു. കരക്കാര്‍ കൊതുമ്പ് വള്ളങ്ങളില്‍ എത്തി ശത്രുക്കളെ തുരത്തി. പിന്നീട് നാട്ടുകാര്‍ ഭട്ടതിരിയെ അനുഗമിക്കുന്നത് പതിവായി. കൊതുമ്പ് വള്ളങ്ങളാണ് പിന്നീട് പള്ളിയോടങ്ങളായി മാറിയത്. മങ്ങാട്ട് ഇല്ലം ഇപ്പോള്‍ കോട്ടയം കുമാരനല്ലൂരിലേക്കു താമസം മാറ്റിയെങ്കിലും ഇല്ലത്തെ മുതിര്‍ന്ന ഭട്ടതിരി തന്നെ ആചാരനിര്‍വഹണത്തിനായി എല്ലാവര്‍ഷവും ആറന്മുളയിലെത്തുന്നു.

വർഷങ്ങളായി, ഈ മേഖലയിലെ മറ്റ് 18 കുടുംബങ്ങൾ ചേർന്നു, ഇപ്പോൾ ഇത് മുഴുവൻ പ്രദേശത്തിനും ഉത്സവമാണ്.

കാട്ടൂരിൽ താമസിച്ചിരുന്ന മങ്ങാട്ട് ഭട്ടതിരി കുടുംബം പാർഥസാരഥിയുടെ താൽപര്യപ്രകാരം കുമാരനെല്ലൂരിലേക്ക് കുടിയേറിയതായി വിശ്വസിക്കപ്പെടുന്നു. എല്ലാ വർഷവും തിരുവോണ നാളിൽ പ്രത്യേക പലഹാരങ്ങളുമായി അദ്ദേഹത്തെ സന്ദർശിക്കാനും ഭഗവാൻ ആവശ്യപ്പെട്ടു എന്നാണ് വിശ്വാസം. അന്നുമുതൽ, മങ്ങാട്ടു കുടുംബത്തിലെ മൂത്ത അംഗം എല്ലാ വർഷവും, മുറ തെറ്റിക്കാതെ, ക്ഷേത്രത്തിൽ ഓണസദ്യ വിളമ്പുകയും, തിരുവോണത്തോണിയിൽ തന്നെ വിഭവങ്ങൾ എത്തിക്കുക്കുകയും ചെയ്യുന്നത്, ഒരു ചടങ്ങായി തുടർന്നു.

നൂറ്റാണ്ടുകള്‍ക്കുമുമ്പ് തിരുആറന്മുള ക്ഷേത്രത്തിന് വമ്പിച്ച ഭൂസ്വത്തുക്കളുണ്ടായിരുന്നു. അന്ന് ദേശവാസികളുടെ ക്ഷേമൈശ്വര്യങ്ങൾ ക്ഷേത്രത്തിന്റെ ഉത്തരവാദിത്വമായിരുന്നു. ഓണക്കാലത്ത് ദേശത്ത് ആരും പട്ടിണികിടക്കാൻ ഇടയാവരുത് എന്നു കരുതി ദേശവഴിയില്‍ മൂന്നു പ്രധാന സ്ഥലങ്ങളില്‍ പാവപ്പെട്ടവർക്കു സൗജന്യമായി നെല്ല് വിതരണം ചെയ്തിരുന്നു. അക്കാലത്ത് ഇതു സ്വീകരിക്കാന്‍ എത്തുന്നവര്‍ക്കെല്ലാം നെല്ല് കൊടുക്കണമെന്നതും നിർബന്ധമായിരുന്നു. ഇതു വിതരണം നടത്തിയിരുന്നത് ചിങ്ങമാസത്തിലെ തിരുവോണത്തിന് മുൻപുള്ള ചോതി നാളിൽ കണ്ണങ്ങാട്ടുമഠത്തിലും, പമ്പാനദിയുടെ വടക്കേക്കരയിൽ ഉള്ള തോട്ടപ്പുഴശ്ശേരിയിൽ പാലക്കാട്ട് മഠത്തിലും, കോഴഞ്ചേരിയിലെ നാരങ്ങാനം മഠത്തിലും ആയിരുന്നു. ഇപ്പോൾ ക്ഷേത്രത്തില്‍ വെച്ച് ആണ് ഈ ചടങ്ങ് നിലവില്‍ നടക്കുന്നത്.. തിരുആറന്മുള ക്ഷേത്രത്തിന്റെ കൈസ്ഥാനിമാരായ മംഗലപ്പള്ളിൽ, തേക്കേടത്ത്,പുത്തേഴത്ത് എന്നീ 3 കുടുംബക്കാരാണ് ഈ ചടങ്ങ് നിർവഹിക്കുന്നത്. ക്ഷേത്രത്തില്‍ നിന്നും ചോതി നാളിൽ അളന്നുകൊടുക്കുന്ന പതിനെട്ടു പറനെല്ല് കാട്ടൂര്‍ മഠത്തില്‍ ആചാര പൂര്‍വ്വം എത്തിക്കുന്നു. അനന്തരം കാട്ടൂരിലെ പതിനെട്ടു നായർ തറവാട്ടിലെ സ്ത്രീ – പുരുഷന്‍മാർ മരവുരലിൽ കുത്തി അരി ആക്കുന്നു. ഈ അരിയാണ് ഉത്രാട സന്ധ്യക്ക് കാട്ടൂര്‍ മഠത്തില്‍ നിന്നും പുറപ്പെടുന്ന തിരുവോണത്തോണിയിൽ കൊണ്ടുവരുക. വളരെ ശുദ്ധവൃത്തിയോടെയാണ് ഇത് തയ്യാര്‍ ചെയ്യുക.

ഉത്രാടം നാളിൽ കാട്ടൂർ മഹാ വിഷ്ണു ക്ഷേത്രത്തിൽ നിന്ന് ‘തിരുവോണത്തോണി’ യാത്ര തുടങ്ങും. ഉത്രട്ടാതി ദിനത്തിൽ വള്ളംകളിയോടെ ആഘോഷങ്ങൾ അവസാനിക്കും. ആറന്മുള പാർഥസാരഥി ക്ഷേത്രത്തിൽ തിരുവോണ സദ്യയ്ക്ക് വിഭവങ്ങൾ വിളമ്പിയിരുന്ന, കുമാരനെല്ലൂർ സ്വദേശി മങ്ങാട്ട് ഇല്ലത്തിലെ ഇരവി നാരായണ ഭട്ടതിരി ഈയിടെ 70 -ആം വയസ്സിൽ അന്തരിച്ചു. കുടുംബത്തിലെ ഏറ്റവും മുതിർന്ന അംഗമായ അദ്ദേഹം, കഴിഞ്ഞ 21 വർഷമായി കാട്ടൂരിൽ നിന്ന് തിരുവോണത്തോണിയിൽ ആറന്മുള ക്ഷേത്രത്തിലേക്ക് ഓണക്കാലത്തെ പ്രത്യേക വിഭവങ്ങൾ എത്തിച്ചു നൽകിയിരുന്നു. 2021 വർഷത്തെ യാത്രക്ക് നായക സ്ഥാനം വഹിച്ചത് കുമാരനെല്ലൂർ മങ്ങാട്ട് ഇല്ലത്തെ രവീന്ദ്രബാബു ഭട്ടതിരിയാണ്. അദ്ദേഹത്തിന്റെ കന്നിയാത്രയായിരുന്നു.

ലേഖനം തയ്യാറാക്കിയത്: ദീപ പെരുമാൾ / ചരിത്രപ്പെരുമ fb page

ചിത്രങ്ങൾ: പത്ര, സമൂഹ മാധ്യമങ്ങൾ

തെറ്റുകൾ ഉണ്ടെങ്കിൽ ചൂണ്ടിക്കാട്ടിയാൽ തിരുത്തുന്നതാണ്….