സഹന ശക്തിയുടെ ആൾ രൂപം

സ്ത്രീ സഹന ശക്തിയുടെ ആൾ രൂപമാണ്.. 

ശരിയാണ്‌.. 

ഒരു സ്ത്രീ വാസ്തവത്തിൽ വളരെ ശക്തയാണ്, പൂർവ്വസ്ഥിതി പ്രാപിക്കുവാൻ കഴിവുള്ളവളാണ്. എന്നാൽ യുദ്ധം, സാമ്പത്തിക പ്രശ്നങ്ങൾ, കുടുംബ പ്രശ്നങ്ങൾ, പരിസ്ഥിതി പ്രശ്നങ്ങൾ, ജലക്ഷാമം, തൊഴിൽ രാഹിത്യം, തുടങ്ങി ജീവിതത്തിൻ്റെ എല്ലാ സമസ്യകളിലും ഇരകൾ എന്നതിന്റെ പര്യായം ആയി സ്ത്രീ ജീവിതങ്ങൾ മാറുന്നു. 

കാരണം…

സ്ത്രീ സഹന ശക്തിയുടെ ആൾ രൂപമാണ്!

അവൾ എല്ലാം സഹിക്കേണ്ടവൾ ആണ്! അങ്ങനെ ഒരു പരിവേഷം കലാ കാലങ്ങളായി അവള്‍ക്ക് മേല്‍ ചാര്‍ത്തപ്പെട്ടുകഴിഞ്ഞിരിക്കുന്നു.. 

പുരാതന ഭാരതത്തിലെ പ്രധാന ഇതിഹാസങ്ങളിൽ പോലും സ്ത്രീകളെ വിധേയത്വമുള്ള, അനുസരണയുള്ള ഭാര്യമാരായും അമ്മമാരായും പെൺമക്കളായും ചിത്രീകരിക്കുന്നു. അവർക്ക് വ്യക്തിഗതമായ സ്വതന്ത്ര്യത്തിന്റെ അഭാവമുണ്ട്, കുറ്റപ്പെടുത്തലിന്റെയും വിധിയുടെയും ഭാരം അവർ വഹിക്കുന്നുമുണ്ട്. 

മഹാഭാരതത്തിലെ കുന്തി ചെറുപ്പത്തിൽ തന്നെ കാമത്തിന് ഇരയാകുന്നു. അങ്ങനെ തന്റെ ആദ്യജാതനായ കർണ്ണനെ ഉപേക്ഷിക്കുന്നത് മുതൽ ബലഹീനനായ തന്റെ ഭർത്താവ്, മറ്റ് പുരുഷന്‍മാര്‍ക്കൊപ്പം ശയിച്ച് കുട്ടികളെ ജനിപ്പിക്കാൻ നിർബന്ധിച്ചപ്പോൾ വരെ അവളെ ത്യാഗത്താലും സഹനത്താലും അടയാളപ്പെടുത്തിയിരിക്കുന്നു. ഒടുവില്‍ തന്റെ പുത്രന്മാരോടൊപ്പം നാടുകടത്തലിന്റെ കഷ്ടപ്പാടുകൾ സഹിക്കുമ്പോഴും ഒരു അമ്മ എന്ന നിലയിൽ അവളുടെ കടമബോധം പലപ്പോഴും വ്യക്തിപരമായ ആഗ്രഹങ്ങളെ മറികടക്കുന്നു.

അത് പോലെ തന്നെ ധൃതരാഷ്ട്രരുടെ ഭാര്യയും കൗരവരുടെ അമ്മയുമായ ഗാന്ധാരി, ആത്മത്യാഗത്തിന്റെയും വിശ്വസ്തതയുടെയും പ്രതീകമാണ്. അന്ധനായ ഭർത്താവിനോടുള്ള ഐക്യദാർഢ്യത്താൽ ജീവിതകാലം മുഴുവൻ കണ്ണടയ്ക്കാനുള്ള ഗാന്ധാരിയുടെ തീരുമാനം, അവളുടെ വിവാഹത്തോടുള്ള ആഴമായ പ്രതിബദ്ധതയെ പ്രതീകപ്പെടുത്തുന്നു. തന്റെ മക്കളുടെ വിനാശകരമായ സ്വഭാവം അറിയാമായിരുന്നെങ്കിലും, ഒരു ഭാര്യയും അമ്മയും എന്ന നിലയിലുള്ള തന്റെ കടമകളിൽ അവൾ ബന്ധിതയാണ്. ഗാന്ധാരിയുടെ ത്യാഗങ്ങൾ വളരെ വലുതാണ്, യുദ്ധത്തിൽ അവളുടെ എല്ലാ പുത്രന്മാരുടെയും നഷ്ടം ഉൾപ്പെടെ. ഈ നഷ്ടങ്ങളെ അവൾ സ്വീകരിക്കുന്നത് അവളുടെ ആഴത്തിലുള്ള കടമബോധത്തെയും ധർമ്മത്തോടുള്ള ദാരുണമായ പ്രതിബദ്ധതയെയും പ്രതിഫലിപ്പിക്കുന്നു.

രാജകുമാരിയായിരുന്ന ദ്രൗപദിയെ പകിട കളിയിലെ വെറുമൊരു പണയം വസ്തു ആക്കുന്നത് മുതൽ ; പൊതു സദസ്സിലെ വസ്ത്രാക്ഷേപവും ഒടുവിൽ, അവർ അവളെ എല്ലാ അർത്ഥത്തിലും ക്ഷീണിതയായ, പൂർണ്ണമായും ഋക്തയായ ഒരു ദരിദ്രയെപ്പോലെ വഴിയരികിൽ ഒറ്റയ്ക്ക് മരിക്കാൻ വിടുന്നത് വരെയും അവൾ സഹനശക്തിയുടെ പ്രതീകമാണ് കണക്കാക്കപ്പെടുന്നത്.

രാമായണത്തിലെ സീത, ഭർത്താവിനായി എല്ലാം ഉപേക്ഷിച്ച് 14 വര്‍ഷക്കാലം വനവാസം സ്വീകരിച്ച അവളുടെ വിശുദ്ധിയും ഭക്തിയും നിരപരാധിത്വവും ഒടുവില്‍ ചോദ്യം ചെയ്യപ്പെട്ടു. താൻ എത്ര ശുദ്ധയാണെന്ന് എല്ലാവർക്കും കാണിക്കാൻ വേണ്ടി അഗ്നി പരീക്ഷ നേരിടേണ്ടി വന്ന അവൾ ഗര്‍ഭിണി ആയിരിക്കെ തന്നെ ഭർത്താവിനാൽ കാട്ടിൽ ഉപേക്ഷിക്കപ്പെട്ടു. ഒടുവില്‍ ആ ഭർത്താവ് തന്നിലേക്ക് തിരികെ വരാൻ ആവശ്യപ്പെട്ടപ്പോൾ, സീതയുടെ – താൻ ജീവിത്തിൽ നേരിട്ട അനീതിയിൽ നിന്നും ദുഖങ്ങളിൽ നിന്നും എന്നെന്നും മോചനം നേടാനുള്ള – അപേക്ഷ കേട്ട് ഭൂമിദേവി രണ്ടായി പിളർന്നു. ഭൂമിയില്‍ കണ്ടെത്തിയ ആ പെണ്‍കുഞ്ഞ് മറ്റാരേക്കാളും കൂടുതൽ പരീക്ഷണങ്ങളും കഷ്ടപ്പാടുകളും സഹിച്ച ഒരു സ്ത്രീയായി, ഒടുവിൽ അവൾ വീണ്ടും ഭൂമിയായി. 

ഇപ്രകാരം നോക്കിയാൽ രാമായണവും മഹാഭാരതവും എല്ലാം സ്ത്രീകളുടെ വേദനകളും സഹനവും തുറന്നു പറയുന്ന ഗ്രന്ഥങ്ങള്‍ ആണ്. ഈ ആധുനിക കാലത്തും സ്ത്രീകള്‍ അനുഭവിക്കുന്ന സഹനത്തിന്റെയും കൊടിയ പീഡനങ്ങളുടെയും ചരിത്രം പറയുന്ന ഗ്രന്ഥങ്ങള്‍. മഹാഭാരത – രാമായണ കാലഘട്ടത്തിലെ സ്ത്രീകളെ ഇന്നത്തെ സ്ത്രീകളുമായി താരതമ്യം ചെയ്യുമ്പോൾ, വേഷങ്ങൾ, അവകാശങ്ങൾ, സാമൂഹിക പ്രതീക്ഷകൾ എന്നിവയുടെ കാര്യത്തിൽ വൈരുദ്ധ്യങ്ങളും തുടർച്ചകളും വെളിപ്പെടുന്നു. സന്ദർഭവും സാഹചര്യങ്ങളും ഗണ്യമായി മാറിയിട്ടുണ്ടെങ്കിലും, അടിസ്ഥാനപരമായ ചില വിഷയങ്ങൾ ഇപ്പോഴും പ്രസക്തമായി തുടരുന്നു. ദുരന്തങ്ങുടെ സഹന വേനലിൽ ഈയാംപാറ്റകളായി എരിഞ്ഞടങ്ങുന്ന കുന്തിയും ദ്രൗപതിയും സീതയുമൊക്ക നമുക്ക് ഇടയില്‍ ഇപ്പോഴും ഉണ്ട് ; അല്ലെങ്കില്‍ നമ്മൾ തന്നെ ആവാം. ഇങ്ങനെ സഹനത്തിൽ പൊലിയുന്ന സ്ത്രീ ജീവിതങ്ങളുടെ ഇരുൾ കാലത്താണ് വീണ്ടും ഒരു വനിതാ ദിനം കടന്ന് പോകുന്നത്. സഹനത്തിന്റെ മൂടുപടം അഴിച്ചു മാറ്റി പ്രതികരണത്തിന്റെയും ആത്മാഭിമാനത്തിന്റെയും കിരീടം ധരിക്കുക. വനിതാ ദിനങ്ങൾ ഈ ചിന്തകളുടെ ആഴത്തിലുള്ള പ്രയോഗങ്ങളാക്കി മാറ്റാം. കാലം അതാണാവശ്യപ്പെടുന്നത്. 

സ്ത്രീയെ ആദരിക്കുകയും സ്ത്രീ സ്വത്വത്തേ മാനിക്കുകയും ചെയ്യുന്ന പുരുഷന്മാരും കുറവായി വരുന്ന കാലത്ത് വനിതാ ദിനങ്ങൾ, കെട്ട് കാഴ്ചകളായി ആണിപ്പോഴും മാറുന്നത്. സ്ത്രീ സ്വത്വത്തിൻ്റെ എല്ലാ പ്രകാശനങ്ങളേയും ആദരിക്കുകയും അവരുടെ സ്വപ്നാകാശങ്ങളെ നിർമ്മലമാക്കുകയും ചെയ്യുമ്പോഴാണ്, പുരുഷനും സ്ത്രീയും പരസ്പരം ബഹുമാനിക്കുന്ന ഇതര സ്വത്വങ്ങളുടെ പ്രകാശനം ഉണ്ടാകുമ്പോൾ മാത്രമാണ് വനിതാ ദിനങ്ങളുടെ മൂല്യങ്ങൾ അർത്ഥവത്തും സർഗ്ഗാത്മകവുമാകുക. 

 

#സ്ത്രീജീവിതം : കണ്ടതും കേട്ടതും /സഹന ശക്തിയുടെ ആൾ രൂപം