“നിനക്ക് അച്ഛനെ മിസ് ചെയ്യാറുണ്ടോ?”
“ഒരിക്കലുമില്ല”
“അതെന്താ…?”
“അത് അങ്ങിനെ ആണ്…”
“എന്നാലും…???”
“അച്ഛൻ ഉള്ളപ്പോൾ ഞങ്ങള് സമാധാനത്തിൽ കഴിഞ്ഞിരുന്നത് അച്ഛൻ മലക്ക് പോകാൻ മാലയിടുമ്പോൾ മാത്രം ആണ്. മനസിലായില്ല?”
“ഇല്ല”
“ഉം. മലക്ക് അച്ഛൻ എല്ലാ വർഷവും പോകും. എല്ലാ തവണയും 41 ദിവസം നോമ്പ് എടുക്കും.
വസ്ത്രം മാറിയാൽ അച്ഛൻ പിന്നെ വീടിന് അകത്ത് കയറാറില്ല.
പുറത്തെ അടുക്കള വൃത്തി ആക്കിയെടുക്കും.
അതിൽ തന്നെ കിടത്തവും.
വെള്ളടി ഇല്ല.
തെറി വിളി ഇല്ല.
അമ്മയുടെ, എൻ്റെ മേലുള്ള കയ്യാങ്കളി ഇല്ല.
കഴപ്പ് തീർക്കുമ്പോൾ അമ്മയുടെ മേലുള്ള കടിയും കടിച്ചുപറിയും ഇല്ല.
നേരത്തെ എണീറ്റ്, ശരണം വിളിച്ച് അമ്പല കുളത്തിൽ കുളിക്കാൻ പോകും.
വന്ന് ഭക്ഷണം വെച്ച് ,കഴിച്ച് പണിക്ക് പോകും.
പണിക്ക് പോയി വന്നാൽ, അമ്പല കുളത്തിൽ പോയി കുളിക്കും.
ശരണം വിളിച്ച് വരും,
ഭക്ഷണം വെച്ച് കഴിച്ച്,
ഭക്തിഗാനം വെച്ച്, ശരണം വിളിച്ച്,
മൂപ്പര് കിടന്ന് ഉറങ്ങും.
അമ്മക്കും എനിക്കും സമാധാനം, സന്തോഷം.
അമ്മയുടെ, എൻ്റെ മുഖത്തെ ചിരി താനേ പുറത്ത് വരും.
അമ്മയുടെ മുഖത്തെ, ദേഹത്തെ മുറിവെല്ലാം ഉണങ്ങും.
ഞങ്ങൾക്കും സന്തോഷം, സമാധാനം,
അയൽപക്കത്ത് ഉള്ളവർക്കും സമാധാനം.
മലക്ക് പോയി വന്ന്, പിറ്റേന്ന് മാല ഊരും.
വൈകീട്ട് നോലുമ്പ് വീട്ടും.
പിന്നെ തുടങ്ങായി,
കുടി,
തെറി,
അടി,
കടി, കടിച്ച് പറി.
അമ്മയുടെ, എൻ്റെ മുഖത്തെ ചിരി താനേ പോകും.
സന്തോഷവും, സമാധാനവും പോകും.
അമ്മയുടെ, എൻ്റെ മുഖത്തെ അടിയുടെ പാടുകൾ തിരികെ വരും.
അമ്മയുടെ ദേഹത്ത് മുറിവുകൾ വരും.
അയൽപക്കത്തുള്ളവരുടേയും സമാധാനം പോകും.
അപ്പുറത്തെ സ്മിതേച്ചി തമാശക്ക് പറയും,
“അവൻ എന്നും മാല ഇടാണ് നിങ്ങൾക്കും, ഞങ്ങൾക്കും നല്ലത് ലേ”
ഞാനും അമ്മേം പുറത്ത് ചിരിക്കും.
അകത്ത് എന്താണ് എന്ന്, അതിപ്പോ എങ്ങിനെ പറയാ..”
“ഉം. എങ്ങനാ അച്ഛൻ..?”
“അതാണ് വിറ്റ്, മലക്ക് പോയപ്പോൾ,
പമ്പയിൽ കുളിക്കാൻ ഇറങ്ങിയതാ.
മുങ്ങി ചത്ത്.. ഹഹ…”
Vineeth valsala vijayan
9 Comments
ജീവിതത്തിന്റെ നേർക്കാഴ്ച കുറഞ്ഞ വരികളിൽ ഹൃദയസ്പർശിയായി എഴുതിയതിന് 👏🏾👏🏾🔥
ചെറിയ വരികളിൽ പച്ചയായ വലിയ സത്യം… പലവീടുകളും ഭാര്യമാരും ആഗ്രഹിക്കുന്നത്, മരിക്കാനല്ല കേട്ടോ എന്നും മാലയിൽ തന്നെ തുടരാൻ….
നോവൂറ്റിയവരികൾ.
ആ അവസാനത്തെ ഡയലോഗുകൾ പറയുമ്പോൾ ഉള്ള മുഖഭാവം എന്തായിരിക്കും എന്നതാണ് എന്റെ മനസ്സിൽ. വേദന നരച്ചു മങ്ങി പോയ നിർവികാരതയായിരിക്കുമോ?
നോവ് നിറഞ്ഞ ജീവിതക്കാഴ്ച്ചകൾ..
പച്ചയായ ഒരു ജീവിതകഥ
Dark !! നന്നായി എഴുതി. ഇത്തിരി വരികളിലൂടെ ഒത്തിരി പറഞ്ഞു ❤️🙏🏽
പച്ചയായ ജീവിതം.. എഴുത്ത് 👌
ഇങ്ങനെ അച്ഛൻ മരിച്ചു കാണാൻ ആഗ്രഹിച്ച കുട്ടിയെ എനിക്ക് അറിയാം. ഇത് പോലെ അച്ഛൻ മാല ഇടുമ്പോൾ മാത്രം ചിരിക്കാറുള്ള കുട്ടിയെ.
പലരുടെയും ജീവിതത്തിലെ നേര്കാഴ്ച മാത്രം ആണ് ഇത്