Hknn
അയാൾ ഇന്നലെയും ഒരു സ്വപ്നം കണ്ടിരുന്നു.
അയാളും അവളും, മുൻപ് നടന്നിരുന്ന ആ കടൽ തീരത്തിലൂടെ കൈകൾ കോർത്ത് പിടിച്ച്, അങ്ങനെ നടക്കുന്നതായി.
കടൽ തിരകൾ നനക്കുന്ന കല്പാദങ്ങളിൽ അടുത്ത നിമിഷം പുതയുന്ന മണൽ തരികൾ.
തീരത്തെ അവരുടെ ഓരോ കാൽപാടുകളും അടുത്ത തിര മായ്ച്ചു കൊണ്ടേ ഇരുന്നു.
അവർ കണ്ട സ്വപ്നങ്ങളെ, അവർ ആഗ്രഹിച്ച നിമിഷങ്ങളെ കുറിച്ച് എല്ലാം അവർ സംസാരിച്ചു.
അകലെ കാണുന്ന ആ തണൽ മരത്തിനടുത്തേക്ക് നടന്നടുക്കവേ, ആഞ്ഞടിച്ച ആ വലിയ തിരയിൽ അവർ മണലിലേക്ക് വീണു.
അതിനു പിറകെ വന്ന തിര അവരെയും നനച്ച്, കരയിലേക്കും തിരികെ കടലിലേക്കും ഒഴുകി.
ആ മണൽ പരപ്പിൽ കിടന്ന് കൊണ്ട് കുസൃതി നിറഞ്ഞ കണ്ണുകളോടെ, അവളുടെ മേലേക്ക് കയറിയവൻ, അവളോടുള്ള അവന്റെ പ്രണയത്തെ മുഴുവൻ അവന്റെ കണ്ണുകളിൽ നിറച്ച്, വാത്സല്യത്തോടെ അതിലേറെ സ്നേഹത്തോടെ അവളുടെ നെറ്റിയിൽ ചുംബനം അർപ്പിച്ചു.
പ്രണയത്തോടെയും വാത്സല്യത്തോടെയും തിരികെ കിട്ടുന്ന മറ്റൊരു ചുംബനത്തിനായി, അവന്റെ കൈവിരലുകളും, ചുണ്ടുകളും അത്രമേൽ ആഗ്രഹിച്ചു.
അത് ലഭിക്കാനായി അവൻ, അവളുടെ ശരീരത്തിൽ നിന്ന് മണലിലേക്ക് ഊർന്ന് മാറിയെങ്കിലും, അവരുടെ സ്നേഹത്തിൽ, പ്രണയത്തിൽ അസൂയ പൂണ്ട കടലിൽ നിന്ന് വന്നൊരു വലിയൊരു തിര അവളെയും വലിച്ച് കൊണ്ട് കടലിലേക്ക് തിരികെ പോയി.
ആ തീരത്ത് അവൻ മാത്രമങ്ങനെ കിടന്നു. അവളെ കൊണ്ട് പോയ തിര, തിരിച്ച് വന്ന് അവനെയും കൊണ്ട് പോകുന്നതും കാത്ത്.